မဲခေါင်၊ ဖေဖော်ဝါရီ ၂၄
စစ်ကောင်စီတပ်ရဲ့ စီးနင်းသိမ်းပိုက်ခံခဲ့ရတဲ့ ကော့ကရိတ်မြို့နယ် ဒေါနအရှေ့ဘက်၊ မြဝတီတောင်ပိုင်းရှိ KNLA တပ်ရင်း (၁၀၃) ဌာနချုပ်ကို KNDO တပ်ရင်း(၈)၊ အထူးကွန်မန်ဒိုတပ်ရင်းနဲ့ Federal Wings ပူးပေါင်းတပ်ဖွဲ့တို့က ပြန်လည်တိုက်ခိုက် ရယူနိုင်ခဲ့တယ်လို့ သိရပါတယ်။
အဲဒီစခန်းကို စစ်ကောင်စီတပ် အင်အား ၅၀ ခန့်နဲ့ ဖေဖော်ဝါရီ ၂၁ ရက် မွန်းလွဲပိုင်းမှာ ဝေါလေဗျူဟာကုန်းမှ တဆင့် စစ်ကြောင်းထိုး ဝင်ရောက်စီးနင်း မီးရှို့ခဲ့တာ ဖြစ်ပါတယ်။
KNDO လုံခြုံရေး တပ်ရင်း (၈) တပ်ဖွဲ့၊ အထူးကွန်မန်ဒိုတပ်ရင်းနဲ့ Federal Wings ပူးပေါင်းတပ်ဖွဲ့တွေက ဒရုန်း တိုက်ခိုက်မှုတွေနဲ့အတူ ဖေဖော်ဝါရီ ၂၂ ရက်၊ နေ့လယ် ၁၂ နာရီခန့်မှာ တပ်ရင်းဌာနချုပ်ကို ပြန်လည် တိုက်ယူနိုင်ခဲ့တာလို့ သိရပါတယ်။
KNLA (၁၀၃) ဌာနချုပ် ဝင်ရောက်စီးနင်းခံရမှု ဖြစ်စဉ်မှာ အဆောက်အအုံတွေ မီးရှို့ဖျက်ဆီး ခံရတာကလွဲပြီး တပ်ဖွဲ့တွေ ထိခိုက်သေဆုံးမှု မရှိခဲ့ဘူးလို့ KNLA ဘက်က ပြောပါတယ်။
စစ်ကောင်စီ ဝါဒဖြန့် လူမှုကွန်ရက်စာမျက်နှာ အချို့ကတော့ ဖေဖော်ဝါရီ ၂၁ ရက် ညနေ ၄ နာရီမှာ ဝေါလေနယ်ရှိ ဦးကရစ်ခီး KNLA/PDF စခန်းကို စစ်တပ်က တိုက်ခိုက်သိမ်းပိုက်ခဲ့ပြီး အလောင်း ၆ လောင်းနဲ့ လက်နက်ခဲယမ်းတွေ၊ ဒရုန်းနဲ့ ယာဉ်တွေ သိမ်းဆည်းရမိတယ်လို့ ဖော်ပြထားပါတယ်။
စစ်ကောင်စီတပ် ဝင်ရောက်စီးနင်း မီးရှို့ခဲ့တဲ့ KNLA တပ်ရင်း (၁၀၃) ဌာနချုပ်ဟာ ဗိုလ်ချုပ်နယ်ဒါးမြ ဦးဆောင်တဲ့ ကော်သူးလေအာမီ -KTLA ဌာနချုပ် ဥကရစ်ခီးစခန်းနဲ့ ကိုက် ၁၀၀ ကျော် အကွာအဝေးသာ ရှိတယ်လို့လည်း သိရပါတယ်။
ဓာတ်ပုံ-KNDO တပ်ရင်း (၈) တပ်ရင်းမှူး ဗိုလ်မှူးကြီးစောအယ်မြထူးနဲ့ Federal Wings တပ်ဖွဲ့ဝင်တွေ။
MK-003
#MeKongNew
#ကော့ကရိတ်မြို့နယ်
#KNLA
#KTLA