မဲခေါင်၊ ဇန်နဝါရီ ၁၄
သဘာဝ တောတောင် ရှူခင်းတွေနဲ့ တွဲဖက်ထားတဲ့ ရှမ်းပြည်နယ်က သဘာဝ အပန်းဖြေ စခန်းတွေကို စစ်ကောင်စီက ဝင်ငွေခွန် စတင်ကောက်ခံ နေတာကြောင့် ဝင်ငွေနဲ့ မျှတတဲ့ နှုန်းထား မဟုတ်ပါက လုပ်ငန်း ပိတ်သိမ်းရမလို ဖြစ်နေတယ်လို့ ရှမ်းပြည်နယ် တောင်ပိုင်းရှိ ခရီးသွား လုပ်ငန်းရှင်တွေက ပြောပါတယ်။
စစ်ကောင်စီက ရှမ်းပြည်နယ် အတွင်းရှိ သဘာဝ အပန်းဖြေစခန်း တစ်ချို့ကို ဝင်ငွေခွန် စတင် ကောက်ခံနေပြီး ၂၀၂၂-၂၀၂၃ ခုနှစ် အတွက် စတင် ပေးဆောင်နေရသူတွေ ရှိနေပြီ ဖြစ်ရာ လက်ရှိ ကာလ နေ့စဉ်ဝင်ငွေ ခန်းမှန်းရ ခက်ခဲတဲ့ အတွက် နှုန်းထား မြင့်မားစွာ သတ်မှတ် ကောက်ခံမှာကို စိုးရိမ်တယ်လို့ လုပ်ငန်းရှင်တွေက ဆိုပါတယ်။
“ တကယ်တော့ အရပ်သား အစိုးရခေတ် လက်ထက်မှာ ခရီးသွား လုပ်ငန်း ပိုပြီး ချဲ့ထွင်နိုင်ဖို့ အခုလို အခွန်ကောက်တာ မရှိဘူး။ စစ်ကောင်စီက ငွေရပေါက် ကြံဖန်တဲ့ သဘောပေါ့။ မြေပြင် အခြေနေနဲ့ တစ်နေ့ဝင်ငွေကို မှန်းဆလို့ မရဘူး။ သင့်တင့်မျှတတဲ့ နှုန်းထား မဟုတ်ရင်တော့ လုပ်ငန်း ရပ်ဆိုင်းရမယ့် သဘော ရှိတယ်။ နိုဝင်ဘာ ဒီဇင်ဘာက ဧည့်သည် ဝင်ပေမယ့် နယူးရီးယား နောက်ပိုင်း ညောင်ရွှေ တိုက်ပွဲကြောင့် ဘိုကင် လုပ်ထားတာတွေပါ ပြန်ဖျက်သွားပြီး အခုလို တင်းကျပ်မှုတွေ လုပ်နေတာကြောင့် ခရီးသွား လုပ်ငန်းက ပိုဆိုးသွားနိုင်ပါတယ်” လို့ ရှမ်းတောင်ရှိ အပန်းဖြေ စခန်း ပိုင်ရှင် တစ်ဦးက ဆိုပါတယ်။
NLD အစိုးရ လက်ထက်က သဘာဝကို အခြေခံတဲ့ ခရီးသွား လုပ်ငန်းတွေကို ဝန်ကြီးဌာနက သတ်မှတ်ထားတဲ့ လိုင်စင် ၄ မျိုးထဲ ထည့်သွင်းတာ ဝင်ငွေခွန် ကောက်ခံတာ မရှိဘဲ ကုမ္ပဏီ အနေနဲ့သာ အခွန်ဆောင်ခိုင်းကာ လုပ်ငန်း တိုးတက်ဖို့ ဦးစားပေးခဲ့ပေမယ့် စစ်ကောင်စီ ကတော့ ယိမ်းယိုင်နေတဲ့ ခရီးသွား လုပ်ငန်းကို ရပ်ဆိုင်းအောင် တင်းကျပ်မှုတွေ လုပ်နေတယ်လို့လည်း သူကပြောပါတယ်။
“ ဒီကာလမှာ တည်းခို လာရောက် လည်ပတ်မယ့် စရိတ်တောင် နှုန်းထား သတ်မှတ်လို့ မရဘူး။ ဧည့်သည်နဲ့ ညှိနိူင်း လုပ်ဆောင်နေရတာ။ ဘယ်လို ပုံစံမျိုးနဲ့ ကောက်မှာလဲပေါ့။ မီတာခ ကောက်ခံတာ၊ အခြား အခွန်တွေ ကောက်သလို ကျသင့်ငွေ အတိုင်း မဟုတ်ဘဲ သူတို့ ခန့်မှန်းခြေ အတိုင်း ကောက်မယ်ဆို လုပ်ငန်းရှင်က လုပ်ငန်း ရပ်ဆိုင်းရမှာပဲ။ ပိတ်ထားတဲ့ ဟိုတယ်တောင် အခွန်အခတွေ ကောက်နေတာ။ အခုက ဧည့်သည် အဝင်ကလည်း မရှိ၊ လုံခြုံမှု မရှိရင် ပြည်ပရော ပြည်တွင်းကရော လာပြီး လည်ပတ်မှာ မဟုတ်ဘူး” လို့ ခရီးသွား လုပ်ငန်းရှင် တစ်ဦးက ဆိုပါတယ်။
သဘာ၀ ရှူခင်းတွေနဲ့ ခရီးသွားတွေကို ဆွဲဆောင်နေတဲ့ အပန်းဖြေစခန်း အများစုဟာ ရှမ်းပြည်နယ်မှာရှိပြီး ကလောမြို့နဲ့ အင်းလေးဒေသကို ခရီးသွားတွေ ကြိုက်နှစ်သက်တယ်လို့ သိရပါတယ်။
MK-006
