မဲခေါင်၊ ဖေဖော်ဝါရီ ၁၀
ရန်ကုန်တိုင်းအတွင်း ဖွင့်လှစ်ထားတဲ့ ပုဂ္ဂလိက ဆေးရုံ၊ ဆေးခန်းတွေမှာ စစ်ကောင်စီနဲ့ လက်အောက်ခံအဖွဲ့တွေက စစ်ဆေးရေးအကြောင်းပြပြီး CDM ကျန်းမာရေးဝန်ထမ်း စာရင်းတွေ လိုက်လံကောက်ယူနေတယ်လို့ အမည်မဖော်လိုသူ ဝန်ထမ်းတစ်ဦးက မဲခေါင်သတင်းကို ပြောပါတယ်။
ဇန်နဝါရီလမှ စတင်ကာ ရန်ကုန်တိုင်းအတွင်း ဖွင့်လှစ်ထားတဲ့ ပုဂ္ဂလိက ဆေးရုံတွေကို ရှောင်တခင် ဝင်ရောက်စစ်ဆေးတာတွေရှိပေမယ့် ဖမ်းဆီးတာမရှိသေးဘူးလို့ ရပ်ကွက်အုပ်ချုပ်ရေးမှူး တစ်ဦးက ပြောပါတယ်။
“ စစ်တပ်နဲ့ပတ်သက်တဲ့ ဆေးရုံတွေ စစ်တာ မရှိဘူး။ အုပ်ကြီး အများစုကတော့ ရပ်ကွက်ဆေးခန်းတွေ ဝင်စစ်တာ လုပ်ရတယ်။ ဆေးရုံကြတော့ စစ်တပ်နဲ့ရဲက ဝင်စစ်တယ်။ ကျွန်တော်တို့ကတော့ အသိသက်သေ ပုံစံမျိုး လိုက်ရတာတွေရှိတယ်။ ဒီနှစ်ကုန်ကစပြီး စစ်ဆေးတာတွေ လုပ်တာပါ။ သတင်းတစ်ခုခုရလို့ စစ်ဆေးတာ ထင်တယ်” လို့ သူကပြောပါတယ်။
လက်ရှိ တောင်ဒဂုံ၊ သာကေတ၊ မြောက်ဒဂုံနဲ့ မြောက်ဥက္ကလာပမှာ ဖွင့်လှစ်ထားတဲ့ ပုဂ္ဂလိက ဆေးရုံနဲ့ ဆေးခန်းအချို့ကို စစ်ကောင်စီတပ်တွေ ဝင်ရောက်ရှာဖွေ စစ်ဆေးခဲ့ပေမယ့် ဖမ်းဆီးခံရသူ မရှိသေးဘူးလို့ ဒေသခံတွေက ပြောပါတယ်။
မန္တလေးတိုင်းမှာတော့ စစ်ကောင်စီက CDM ကျန်းမာရေး ဝန်ထမ်းတွေကို ဖမ်းဆီးခဲ့ပြီး ပုဂ္ဂလိက ဆေးရုံတွေကို ဝင်ရောက်စစ်ဆေးကာ ပိတ်သိမ်းတာတွေ ရှိခဲ့ပါတယ်။
စစ်အာဏာ ဖီဆန်ခဲ့တဲ့ ကျန်းမာရေး ဝန်ထမ်း ၅၅၇ ဦးကို စစ်ကောင်စီက ဆေးကုသခွင့်လိုင်စင်-ဆမ လက်မှတ်တွေ တစ်နှစ်တိတိ ရုပ်သိမ်းထားပြီး နိုင်ငံ့ဝန်ထမ်းအဖြစ်မှ ထုတ်ပယ်တာတွေလည်း ရှိတယ်လို့ CDM ဆရာဝန် တစ်ဦးက မဲခေါင်သတင်းကို ပြောပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း-AAPP က ထုတ်ပြန်ထားတဲ့ စာရင်းအရ စစ်တပ်အာဏာသိမ်းပြီးနောက် ဖမ်းဆီးခံထားရတဲ့ ကျန်းမာရေးဝန်ထမ်း ၁၀၈ ဦးထက်မနည်း ရှိတယ်လို့ သိရပါတယ်။
MK-005
#MeKongNews
#ပုဂ္ဂလိကဆေးရုံ #CDM #ကျန်းမာရေးဝန်ထမ်း
