မဲခေါင်၊ ဇွန် ၁၃
စစ်ကိုင်းတိုင်း၊ ကန့်ဘလူခရိုင်၊ ချပ်သင်းတိုက်နယ်က စစ်ရှောင်တဲတွေကို စစ်ကောင်စီတပ်တွေ ဇွန်လ ၁၂ ရက်နေ့မှာ မီးရှို့ဖျက်ဆီး ခဲ့တယ်လို့ ဒေသခံတွေက ပြောပါတယ်။
ချပ်သင်းတိုက်နယ်ထဲက ဇင်းကျေးရွာ အနီးမှာရှိတဲ့ တနယ်ကြီးကွင်း(ဒေသအခေါ်) စစ်ရှောင်တဲတွေကို ခမရ (၃၆၁) နဲ့ ပျူစောထီး ပူးပေါင်း စစ်ကြောင်းက မီးရှို့သွားခဲ့တာကြောင့် စစ်ရှောင်တဲ ၉ လုံး၊ ကျွဲ တစ်ရှင်း၊ ဆန် တင်း ၆၀ နဲ့ ဝက် တစ်ကောင် ဆုံးရှုံးခဲ့ရတယ်လို့ ဒေသခံတွေက ဆိုပါတယ်။
“စစ်ရှောင်တွေ ဖမ်းမိတယ်လို့တော့ မကြားမိသေးပါဘူး။ ရွာသားတွေက တောထဲမှာပဲ တဲထိုးနေကြတော့ တာပါ။ စစ်ကြောင်းကတော့ ထွက်သွားပါပြီ။ ဒီနေ့တော့ နဂါးပေါ်ရွာရဲ့ အရှေ့ဘက်နား ရောက်နေတယ်လို့ သိရပါတယ်” လို့ ကန့်ဘလူမြို့နယ် ဒေသခံ တစ်ဦးက မဲခေါင်သတင်းဌာနကို ပြောပါတယ်။
အဆိုပါ တနယ်ကြီးကွင်း စစ်ရှောင်တဲ အစုမှာ ဇင်းကျေးရွာက ပြည်သူတွေ အများဆုံး လာရောက် တိမ်းရှောင်နေတာဖြစ်ပြီး လက်ရှိ စစ်ကြောင်းတွေကြောင့် စစ်ရှောင်တဲတွေကနေ ထပ်မံ ထွက်ပြေးခဲ့ရတာ ဖြစ်ပါတယ်။
ကန့်ဘလူခရိုင်အတွင်း ကျေးရွာတွေကို စစ်ကောင်စီ စစ်ကြောင်းတွေ နေ့စဉ် စစ်ကြောင်းထိုးပြီး နေအိမ် အပါအဝင် စားစရာနဲ့ သယ်လို့မရတဲ့ အသုံးအဆောင် ပစ္စည်းတွေကို မီးရှို့တာ၊ ရွာသားတွေကို သတ်ဖြတ်တာတွေ လုပ်နေတာကြောင့် ဒေသခံတချို့ ရွာမှာ မနေရဲဘဲ တောထဲမှာ တဲထိုးနေတယ်လို့ ဒေသတွင်း သတင်းရင်းမြစ်တွေက ဆိုပါတယ်။
“ရွာထဲမှာ အများအားဖြင့် အပြင်ထွက်မရတဲ့ ရွာသူရွာသားတွေနဲ့ ပျူတွေလောက် ကျန်နေတာပါ။ သူတို့ကလည်း စစ်ကြောင်းနဲ့ မတွေ့တာပါ။ တွေ့ရင်မလုပ်ဘူးတော့ မဟုတ်ပါဘူး။ အများအားဖြင့် သတ်ခံရတာတွေ များပါတယ်” လို့ ဒေသခံ တစ်ဦးက ပြောပါတယ်။
ပြီးခဲ့တဲ့ မေလ ထဲမှာ ခမရ (၃၆၁) အင်အား ၇၀ ကျော် ဝင်ရောက်မီးရှို့ ဖျက်ဆီးတာကြောင့် နေအိမ် ၃ လုံးနဲ့ ကန်ကြီးတောထဲက စစ်ရှောင်တဲ ၁၅ လုံး မီးလောင်ဆုံးရှုံး ခဲ့သေးတယ်လို့ ကျွန်းလှ တက်ကြွလှုပ်ရှားသူများအဖွဲ့က ထုတ်ပြန်ထားပါတယ်။
ကန့်ဘလူခရိုင်ထဲက ကျေးရွာတွေကို ခမရ (၃၆၁)၊ ခမရ (၃၆၈)၊ ခလရ (၁၃၇)၊ ကန့်ဘလူ အမြောက်တပ်ရင်း (၆၀၀၆) က တပ်သားတွေနဲ့ ပျူစောထီးတွေ ပူးပေါင်း စစ်ကြောင်းထိုးလေ့ရှိတယ်လို့ ဒေသတွင်း သတင်းရင်းမြစ်တွေထံက သိရပါတယ်။
စစ်တပ်အာဏာသိမ်းပြီးနောက် စစ်ရေးပဋိပက္ခတွေကြောင့် တနိုင်ငံလုံးမှာ လူဦးရေ ၁ ဒဿမ ၈ သန်းကျော် အိုးမဲ့အိမ်မဲ့ ဖြစ်ရပြီး လူသားချင်း စာနာမှုဆိုင်ရာ အကူအညီတွေပေးနိုင်ဖို့ ကန့်သတ်ချက်နဲ့ ရန်ပုံငွေ လိုအပ်ချက်တွေ ရှိနေတယ်လို့ ကုလသမဂ္ဂ လူသားချင်း စာနာမှုဆိုင်ရာ ညှိနှိုင်းရေးရုံးက အခုနှစ် မေလ အစောပိုင်းမှာ ထုတ်ပြန်ထားပါတယ်။
MK – 009
#MeKongNews
#ချပ်သင်းတိုက်နယ်
#စစ်ရှောင်တဲ
#ပျူစောထီး
