မဲခေါင်၊ ဇူလိုင် ၂၅
ချင်းပြည်နယ်ကို စိုးမိုးဖို့ အင်အားအလုံးအရင်းနဲ့ စစ်ကြောင်းထိုးလာတဲ့ စစ်ကောင်စီတပ်ကို ဇူလိုင် ၂၁ ရက်၊ မနက် ၉ နာရီက ကန်ပက်လက်မြို့နယ်၊ လှိုင်ဒုတ်ကျေးရွာသစ်အနီးမှာ ကန်ပက်လက် CDF ပူးပေါင်းအဖွဲ့က တိုက်ခိုက်ရာ စစ်သား ၄ ဦးသေပြီး အများအပြား ဒဏ်ရာရရှိခဲ့တယ်လို့ သိရပါတယ်။
ဒါ့အပြင် ဇူလိုင် ၂၄ ရက်က ကန်ပက်လက်မြို့နယ်၊ မောချောင်းနဲ့ လှိုင်ဒုတ်ကျေးရွာသစ်အနီး တိုက်ပွဲဖြစ်ပွားရာ စစ်ကောင်စီဘက်မှ ၇ ဦး ထပ်မံသေဆုံးပြီး မဟာမိတ် ပူးပေါင်းတပ်ဖွဲ့ဘက်က မင်းဘူးခရိုင် တပ်ရင်း (၆) မှ ရဲဘော် တစ်ဦးနဲ့ CDF-Kanpetlet မှ ရဲဘော် ၃ ဦး ဒဏ်ရာ ရရှိခဲ့တယ်လို့ သိရပါတယ်။
“ အာဏာသိမ်းပြီး ကန်ပက်လက်မြို့ပေါ်နဲ့ ကျင်ဒွေးမြို့ ၂ နေရာမှာပဲ စစ်ခွေး တွေ စခန်းချနိုင်တယ်။ ကျန်တာကို ကာကွယ်ရေးတပ်ဖွဲ့တွေက ထိန်းထားတဲ့ အခြေအနေ ရောက်နေပါပြီ” လို့ CDF-Kanpetlet တာဝန်ခံက ပြောပါတယ်။
ဒီစစ်ကောင်စီ စစ်ကြောင်းဟာ မကွေးတိုင်း၊ ဆိပ်ဖြူမြို့နယ်၊ စလင်းစေတုတ္တရာ လောင်းရှည် လမ်းကြောင်း ကနေ အင်အား ၃၀၀ ကျော်နဲ့ စစ်ကြောင်းထိုးလာတာ ဖြစ်ပါတယ်။
“ အာဏာမသိမ်းခင်က ကျင်ဒွေးမြို့မှာ စစ်ခွေးစခန်းက ရှိပြီးသားပါ။ အခုအဲဒီ သူတို့စခန်းဆီကို ရိက္ခာပို့ဖို့အတွက် ယာဥ်တန်းတွေနဲ့အတူ အင်အား ၃၀၀ ကျော်လောက်နဲ့ လာတာကိုကြည့်ရင် အဲဒီစခန်းက သူတို့အတွက် တော်တော်အရေးပါတယ်လို့ ပြောနိုင်တယ်” လို့ CDF-Kanpetlet တာဝန်ခံက ဆက်ပြောပါတယ်။
ဒါ့အပြင် ရဲလောင်းပန်းကျေးရွာနဲ့ ကန်းလောင်းကျေးရွာကြား လေယာဥ်ကွင်းအနီး တပ်စွဲထားတဲ့ စစ်ကြောင်းနဲ့ ဇူလိုင် ၂၄ ရက် မနက်ပိုင်းမှာ တိုက်ပွဲဖြစ်ပွားရာ CDF-Kanpetlet မှ ရဲဘော်တပ်ကွီး အသက်ပေးလှူခဲ့ရပါတယ်။
ကန်ပက်လက်မြို့နယ်ဟာ မကွေးတိုင်းနဲ့ ချင်းပြည်နယ် နယ်စပ်မြို့ဖြစ်လို့ ချင်းပြည်နယ်ကို ကုန်းလမ်းနဲ့ ဝင်ရောက်ဖို့ မဖြစ်မနေ ဖြတ်သန်းရမယ့် မြို့နယ် ဖြစ်ပါတယ်။
လက်ရှိမှာ စစ်ကောင်စီက ချင်းပြည်နယ် စိုးမိုးနိုင်ရေးအတွက် အင်အားသုံး ကြိုးပမ်းမှုကို Chin Defense Force-Kanpetlet နဲ့ မဟာမိတ်ပူးပေါင်းအဖွဲ့တွေ တားဆီး တိုက်ထုတ်နေပြီး အကူအညီတွေ အရေးပေါ် လိုအပ်နေတယ်လို့ သိရပါတယ်။
CJ-005
#ကျင်ဒွေး
#နယ်စပ်မြို့
#ကန်ပက်လက်
#Chin_Defense_Force_Kanpetlet
