မဲခေါင်၊ မေ ၃၀
ရှမ်းပြည်နယ် တောင်ပိုင်း၊ ကွန်ဟိန်းမြို့နယ်၊ ဝမ်းစိမ်းနဲ့ ဆိုင်မွန်းကျေးရွာကြားမှာ မေလ ၂၈ ရက်နေ့က ကားမောင်းလာတဲ့ အမျိုးသမီး တစ်ဦး ပစ်သတ်ခံလိုက်ရတယ်လို့ ဒေသခံတွေက ပြောပါတယ်။
အဆိုပါ အမျိုးသမီးဟာ ကာလိမြို့နယ်၊ ဝမ်တုံကျေးရွာမှာ နေထိုင်တဲ့ နန်းခမ်းစန် ဆိုသူ ဖြစ်ပြီး ရှမ်းပြည် ပြန်လည်ထူထောင်ရေး ကောင်စီ RCSS/ SSA တပ်ဖွဲ့က ပစ်သတ်လိုက်တာလို့ ဒေသခံ မျက်မြင်သက်သေ တစ်ဦးက ပြောပါတယ်။
“ အဲ့အမျိုးသမီးရဲ့ ကားကို RCSS တပ်ဖွဲ့ အင်အား ၁၀ ယောက်လောက်တားတယ်။ တားပြီး စစ်ဆေးတယ်။ အဲ့အချိန်မှာ သေနတ်သံ ကြားမိတယ်။ ကျနော်တို့လည်း သွားမကြည့်ရဲဘူး” လို့ သူကပြောပါတယ်။
ပစ်သတ်ခံရတဲ့ အမျိုးသမီး ရုပ်အလောင်းကို မိသားစုဝင်တွေ လာရောက် သယ်ဆောင်သွားတယ်လို့ ဒေသခံတွေက ဆိုပါတယ်။
ဒီကိစ္စနဲ့ ပတ်သက်ပြီး မိသားဝင်တွေကို ဆက်သွယ်ဖို့ ကြိုးစားခဲ့ပေမဲ့ ဝမ်တုံကျေးရွာမှာ ဖုန်းလိုင်း မရတာကြောင့် ဆက်သွယ်လို့ မရခဲ့ပါဘူး။
ပစ်သတ်ခံရတာနဲ့ ပတ်သက်ပြီး RCSS ပြောရေးဆိုခွင့်ရှိသူ ဗိုလ်မှူကြီး စိုင်းအွမ်ခေးကို ဆက်သွယ်ပေမယ့် ဖုန်းပိတ်ထားပါတယ်။
နန်းခမ်းစန် ပစ်သတ်ခံရမှုနဲ့ ပတ်သက်ပြီး မဲခေါင်သတင်းဌာန အနေနဲ့ ဆက်လက် စုံစမ်းနေဆဲ ဖြစ်ပါတယ်။
#MeKongNews
#ကွန်ဟိန်းမြို့နယ်
#RCSS
#ပစ်သတ်
