မဲခေါင်၊ ဇူလိုင် ၁၈
ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်အတွင်း စစ်ကောင်စီနဲ့ တအာင်းအမျိုးသား လွတ်မြောက်ရေး တပ်မတော် TNLA တို့ မနေ့က တိုက်ပွဲ ၂ ကြိမ်ဖြစ်ပွားခဲ့တယ်လို့ TNLA က ထုတ်ပြန်ပါတယ်။
ကွတ်ခိုင်မြို့နယ်၊ မန်ပြိန်း နဲ့ ကောင်းခမ်း ကျေးရွာကြားမှာ စစ်ကောင်စီရဲ့ ခြေလျင်တပ်ရင်း ခလရ (၆၉) တပ်ကို TNLA က ဇူလိုင်လ ၁၇ ရက်နေ့၊ မနက်ပိုင်း ၈ နာရီ ၂၅ မိနစ်အချိန်မှာ တိုက်ခိုက်ခဲ့တယ်လို့ TNLA ရဲ့ ထုတ်ပြန်ချက်မှာ ဖော်ပြထားပါတယ်။
အဲ့ဒီနေရာမှာ တိုက်ပွဲဖြစ်ပွားတာ နာရီဝက်ခန့် ကြာမြင့်ပြီး စစ်ကောင်စီဘက်က ထိခိုက်သေဆုံးမှု ရှိတယ်လို့လည်း TNLA က ဆိုပါတယ်။
အဲ့ဒါပြင် ညနေ ၃ နာရီ ၂၅ မိနစ်အချိန်မှာလည်း ကွတ်ခိုင်ဘက်ကနေ သိန္နီဘက်ကို ဆင်းလာတဲ့ စစ်ကောင်စီ ကား ၇ စီးကို ဆက်လက်တိုက်ခိုက်ခဲ့တယ်လို့ TNLA က ပြောပါတယ်။
တိုက်ပွဲဖြစ်ပွားတာနဲ့ ပတ်သက်ပြီး နှစ်ဖက်ထိခိုက်မှု အသေးစိတ် အခြေအနေကိုတော့ TNLA ရဲ့ ထုတ်ပြန်ချက်မှာ မဖော်ပြထားပါဘူး။
တိုက်ပွဲဖြစ်ပွားတဲ့ အခြေအနေနဲ့ ပတ်သက်ပြီး TNLA ရဲ့ ပြောရေးဆိုခွင့်ရှိသူတွေကို ဆက်သွယ် မေးမြန်းပေမယ့် ပြန်လည် ဖြေကြားခြင်း မရှိပါဘူး။
မနေ့က စစ်ကောင်စီ နဲ့ TNLA ဖြစ်ပွားခဲ့တဲ့ တိုက်ပွဲမှာ နှစ်ဖက်စလုံး ထိခိုက်မှုရှိတယ်လို့ ဒေသခံတွေက ပြောပါတယ်။
“မန်ပြိန်းနဲ့ ကောင်းခမ်းကြားမှာ ဖြစ်တာကတော့ စစ်ကောင်စီဘက်က သေတာလည်းရှိတယ်။ ဒဏ်ရာ ရတာလည်း ရှိတယ်လို့ ကြားရတယ်။ TNLA ဘက်မှာက ၂ ယောက်ဒဏ်ရာ ရတယ်လို့လည်း ကြားရတယ်ဗျ။ အတိအကျတော့ မသိရဘူး။ ပြီးတော့ စစ်တပ်ကားတန်းလည်း မိုင်းဆွဲခံရတယ်” လို့ ဒေသခံ တစ်ဦးက ပြောပါတယ်။
ဇူလိုင်လအတွင်းမှာ စစ်ကောင်စီနဲ့ TNLA တပ် တိုက်ပွဲ မကြာခဏ ဖြစ်ပွားတာကို တွေ့ရပြီး မိုင်းငေါ့မြို့နယ်မှာ တစ်ကြိမ်၊ မူဆယ်မြို့နယ်မှာ တစ်ကြိမ်နဲ့ ကွတ်ခိုင်မြို့နယ်မှာ တစ်ကြိမ် တိုက်ပွဲ ဖြစ်ပွားခဲ့တာ ဖြစ်ပါတယ်။
CJ-002
#MeKongNews
#ကွတ်ခိုင်မြို့နယ်
#TNLA
#မိုင်းဆွဲ
