မဲခေါင်၊ ဇွန် ၂
ကရင်ပြည်နယ်၊ ကြာအင်းဆိပ်ကြီးမြို့နယ်မှာ ဒီနေ့ ဇွန်လ ၂ ရက်နေ့၊ မနက်ပိုင်းကစပြီး စစ်ကောင်စီတပ်နဲ့ တော်လှန်ရေးပူးပေါင်းတပ် တိုက်ပွဲ ဖြစ်ပွားရာ စစ်ကောင်စီ လေကြောင်းက မြို့ပေါ်ရပ်ကွက်တွေကို ဗုံးကြဲ တိုက်ခိုက်ခဲ့တယ်လို့ ဒေသခံတွေက ပြောပါတယ်။
ဒီကနေ့ မနက် ၈ နာရီ ဝန်းကျင်မှာ စစ်ကောင်စီက လေကြောင်းနဲ့ ပစ်ခတ်တိုက်ခိုက်မှုကြောင့် ကြာအင်းဆိပ်ကြီးမြို့ပေါ် ရပ်ကွက်က လူနေအိမ်တွေ ထိမှန်ပျက်စီးခဲ့ပြီး အမှတ် (၃) ရပ်ကွက်၊ မဏိရတနာ စာသင်တိုက်က ဘုန်းကြီး တစ်ပါး ပျံလွန်တော်မူကာ အမှတ် (၆) ရပ်ကွက်က အရပ်သား ၃ ဦး သေဆုံးခဲ့တယ်လို့ ဒေသခံတွေက ဆိုပါတယ်။
စစ်ကောင်စီတပ်ရင်းတွေကို တော်လှန်ရေးတပ်တွေ တိုက်ခိုက်ရာက တိုက်ပွဲ စတင် ဖြစ်ပွားခဲ့ပြီး တပ်ရင်း (၃၂) စခန်းကနေ လက်နက်ကြီးတွေနဲ့ ပစ်ခတ်ခဲ့တယ်လို့ ကြာအင်းဆိပ်ကြီး နယ်မြေ စစ်ဘက်ဆိုင်ရာ သတင်းအရင်းအမြစ်က ပြောပါတယ်။
“ရန်သူရှိတဲ့ နေရာကို ပူးပေါင်းတပ်ဖွဲ့တွေက သွားပြီးတော့ ပစ်ခတ်တိုက်ခိုက်တဲ့ ပုံစံမျိုးပါပဲ။ ကြာအင်းဆိပ်ကြီးမှာ စစ်တပ်ရဲ့ တပ်ရင်းတွေရှိတယ်။ အဲ့ဒီနေရာတွေကို သွားပြီး ပစ်ခတ်တဲ့ ပုံစံပေါ့။ စစ်ကောင်စီဘက် ကတော့ ထုံးစံအတိုင်း လေကြောင်း ပစ်ခတ်မှု၊ လက်နက်ကြီး ပစ်ခတ်မှုတွေလုပ်လို့ ပြည်သူတွေ ဒဏ်ရာရရှိတာ၊ ပျက်စီးတာမျိုးတွေရှိတယ်။ လက်ရှိ အခြေအနေနဲ့ ထိခိုက်ကျဆုံးတဲ့ အနေအထားတွေ ကိုတော့ သေသေချာချာ မသိရသေးပါဘူး” လို့ စစ်ရေး သတင်းအရင်းမြစ်က မဲခေါင်သတင်းဌာနကို ပြောပြပါတယ်။
ဒီတိုက်ပွဲတွေမှာ ၂ ဖက် ထိခိုက်ကျဆုံးမှုတွေ ရှိနေတယ်လို့ ဒေသခံတွေက ပြောပေမယ့် မဲခေါင်သတင်းဌာန အနေနဲ့ သက်ဆိုင်ရာ တပ်ဖွဲ့တွေနဲ့ သီးခြား အတည်ပြုနိုင်တာ မရှိသေးပါဘူး။
ဒီကနေ့ ဖြစ်ပွားခဲ့တဲ့ တိုက်ပွဲကြောင့် မြို့တွင်း လူနေအိမ်၊ ဗလီ၊ နာရေးကူညီမှုကား စတာတွေ ထိခိုက်ပျက်စီးမှု များစွာ ရှိခဲ့ပြီး လက်ရှိ ပူးပေါင်းတပ်ဖွဲ့တွေ ဆုတ်ခွာသွားပေမယ့် မြို့အပြင်ဘက်မှာတော့ လက်နက်ကြီး၊ လက်နက်ငယ် ပစ်ခတ်သံတွေ ကြားနေရဆဲလို့ ဒေသခံတွေက ပြောပါတယ်။
MK-009
#MeKongNews
#ကြာအင်းဆပ်ကြီး
#လေကြောင်းတိုက်ခိုက်မှု
#တပ်ရင်း(၃၂)
