မဲခေါင်၊ ဇူလိုင် ၂၃
ကျေးရွာတွေကို မီးရှို့ဖျက်ဆီးပြီး စစ်ကြောင်းထိုးလာတဲ့ စစ်ကောင်စီတပ်နဲ့ တော်လှန်ရေးတပ်ပေါင်းစုတွေ ဖားဆောင်းမြို့နယ်မှာ တိုက်ပွဲ ပြန်လည်ဖြစ်ပွားနေတယ်လို့ ဖားဆောင်း ပြည်သူ့ကာကွယ်ရေးတပ်ဖွဲ့(PPDF) က မနေ့ညက ထုတ်ပြန်ပါတယ်။
ဇူလိုင်လ ၂၁ ရက်နေ့မှ စပြီး ဖားဆောင်းမြို့နယ် သံလွင်အရှေ့ဖက်ကမ်းရှိ ကျောက်ပန်းညိုကျေးရွာနဲ့ ရှမ်းဝမ်အောင်းကျေးရွာဘက်ကို စစ်ကောင်စီတပ် အင်အားအများအပြားနဲ့ စစ်ကြောင်းထိုးလာခဲ့တယ်လို့ PPDF က ပြောပါတယ်။
စစ်ကြောင်းထိုးလာတဲ့ စစ်ကောင်စီတပ်ကို တော်လှန်ရေးအင်အားစုများဖြစ်တဲ့ ဖားဆောင်းပြည်သူ့ကာကွယ်ရေးတပ်၊ ဘောလခဲပြည်သူ့ကာကွယ်ရေးတပ်၊ ကလလတ၊ KNDF အမှတ် (၂၀) တပ်ရင်းနဲ့ KRU တပ်ပေါင်းစုတို့က ခုခံတိုက်ခိုက်လျက်ရှိတယ်လို့ ထုတ်ပြန်ချက်မှာဖော်ပြထားပါတယ်။
စစ်ကောင်စီတပ်နဲ့ တော်လှန်ရေးတပ်ပေါင်းစုတို့ ဇူလိုင်လ ၂၁ ရက် မနက် ၆ နာရီမှ ဇူလိုင်လ ၂၂ ရက်နေ့ အထိ တိုက်ပွဲပြင်းထန်လျက်ရှိပြီး စစ်ကောင်စီတပ်တွေ ထိခိုက်သေဆုံးတာရှိပေမယ့် အသေးစိတ် မသိရသေးဘူးလို့ ကရင်နီစစ်ရေးသတင်းရင်းမြစ် တစ်ဦးက ပြောပါတယ်။
“စစ်ကောင်စီက စစ်ကြောင်းထိုးလာလို့ တိုက်ပွဲကတော့ ဆက်ဖြစ်နေဦးမှာပဲ ဖြစ်တယ်။ အထူးသတိပေးချင်တာကတော့ မိဘပြည်သူတွေအနေနဲ့ စစ်ကောင်စီနဲ့ မတွေ့အောင် ဘေးကင်းရာမှာ သတိနဲ့ နေကြပါလို့ တိုက်တွန်းချင်တယ်။ ပြီးတော့ ကရင်နီက တော်လှန်ရေးတပ်ဖွဲ့တွေကို ဒီထက်ပိုပြီး ကူညီပေးကြဖို့ တိုက်တွန်းချင်တယ်” လို့ အဲ့ဒီသတင်းရင်းမြစ်ကပြောပါတယ်။
တိုက်ပွဲအတွင်း တော်လှန်ရေးတပ်ပေါင်းစုဘက်က ထိခိုက်တာတွေ မရှိပေမယ့် ကျောက်ပန်းညို ကျေးရွာနဲ့ ရှမ်းဝမ်အောင်းကျေးရွာကိုတော့ စစ်ကောင်စီတပ်က လက်နက်ကြီး လက်နက်ငယ်နဲ့ ပစ်ခတ်ပြီး မီးရှို့ခဲ့တယ်လို့ ဖာဆောင်းPDF က ထုတ်ပြန်ပါတယ်။
စစ်ကောင်စီက လက်နက်ကြီး လက်နက်ငယ်တွေ ပစ်ခတ်ပြီး စစ်ကြောင်းထိုးလာတာကြောင့် ရှမ်းဝမ်အောင်းကျေးရွာဟာ ရွာလုံးကျွတ် ထွက်ပြေးခဲ့ရပြီး ရွာလည်း မီးလောင်သွားတယ်လို့ ရှမ်းဝမ်အောင်း ဒေသခံတွေကလည်း ပြောဆိုထားပါတယ်။
စစ်ကောင်စီဟာ တိုက်ပွဲမဖြစ်ပွားခင် စစ်ကြောင်းမထိုးခင်ကတည်းက လေကြောင်းကနေ အဲ့ဒီကျေးရွာတွေကို တိုက်ခိုက်မှု ပြုလုပ်တာကြောင့် ဒေသခံဂတစ်ချို့ဟာ ယခင်ကတည်းက ထွက်ပြေးတိမ်ရှောင်ခဲ့ရတယ်လို့ ဒေသခံတွေရဲ့ပြောကြားချက်အရသိရပါတယ်။
လက်ရှိအချိန်မှာ စစ်ကောင်စီဟာ ဖားဆောင်းမြို့နယ်မှ တဆင့် မယ်စဲ့မြို့နယ်ထဲ ထိုးဖော်ဝင်ရောက်နိုင်ဖို့အတွက် တပ်မ (၄၄) လက်အောက်ခံ တပ်ရင်း၂ ခု အင်အား ၂၀၀ ခန့်နဲ့ ထိုးစစ်ဆင်နေတာဖြစ်ပါတယ်။
ဒါ့အပြင် ဖားဆောင်းမြို့နယ်မှာ စစ်ကောင်စီရဲ့ ခလရ (၁၃၄) နဲ့ ခလရ (၁၃၅) တပ်ရင်း ၂ ခု အခြေစိုက်ထားပါတယ်။
ဒါကြောင့် တိုက်ပွဲများ ပိုမိုပြင်းထန်လာနိုင်တဲ့အတွက် ဖားဆောင်းမြို့နယ် ပြည်သူများအနေနဲ့ ဘေးကင်းရာမှာ သတိနဲ့ နေထိုင်ကြဖို့ ဖားဆောင်းဂPDFက တိုက်တွန်းထားပါတယ်။
CJ-002
#MekongNews
#ဖားဆောင်း
#တိုက်ပွဲ
