မဲခေါင်၊ ဇူလိုင် ၂၇
ပဲခူးတိုင်း၊ ညောင်လေးပင်ခရိုင်၊ ကျောက်ကြီးမြို့နယ်နဲ့ နတ်သံကွင်းမြို့နယ်ကြား ကားလမ်းမပေါ် ဖြတ်သန်း သွားလာမှု မပြုလုပ်ဖို့ ကရင်အမျိုးသား ကာကွယ်ရေးအဖွဲ့-KNDO မှ ညွှန်ကြားချက် တစ်စောင် ဒီကနေ့ ရက်စွဲနဲ့ ထုတ်ပြန်ပါတယ်။
ပြည်သူလူထုရဲ့ လုံခြုံရေး အတွက် ဆောင်ရွက်နေတဲ့ ကရင်အမျိုးသား ကာကွယ်ရေးအဖွဲ့ အနေနဲ့ အကြမ်းဖက် စစ်တပ်မှ ပြည်သူကို လူသားဒိုင်းကာ သဘော အသုံးချ၊ အကာအကွယ်ယူပြီး စစ်ဆင်ရေး လှုပ်ရှားမှုများ ပြုလုပ်နေလို့ အဆိုပါ လမ်းပိုင်းကို လုံခြုံရေးအရ သွားလာခွင့် ကန့်သတ် ပိတ်ပင်လိုက်တယ်လို့ ဆိုပါတယ်။
ဒါ့အပြင် ပြည်သူများ အနေနဲ့ ည ၆ နာရီမှ မနက် ၆ နာရီအထိ ဖြတ်သန်း သွားလာမှု မပြုရန်၊ အရေးပေါ် သွားလာဖို့ လိုအပ်ပါက တာဝန်ရှိ ခေါင်းဆောင်များကို အသိပေး အကြောင်းကြား သွားလာကြဖို့ ထုတ်ပြန်ချက်မှာ ဖော်ပြထားပါတယ်။
အဆိုပါ ညွှန်ကြားစာပါ အချက်များ ပြန်လည် မရုတ်သိမ်းမချင်း လိုက်နာကြဖို့နဲ့ လိုက်နာဖို့ ပျက်ကွက်ပါက နောက်ဆက်တွဲ ပြဿနာများ တာဝန်ယူ ဖြေရှင်းပေးမှာ မဟုတ်ဘူးလို့လည်း အသိပေး ထားပါတယ်။
အဆိုပါ ညွှန်ကြားစာကို KNDO အမှတ် (၃) တပ်ရင်းရဲ့ တပ်ရင်းမှူး စောလှရွှေဟဲ လက်မှတ်နဲ့ ထုတ်ပြန်ထားတာ ဖြစ်ပါတယ်။
MK-005
#Mekongnews
#ညောင်လေးပင်ခရိုင်
#KNDO
#လူသားဒိုင်းကာ
#တပ်ရင်းမှူး_စောလှရွှေဟဲ
