မဲခေါင်၊ ဧပြီ ၁၀
တိုက်ပွဲတွေပြင်းထန်နေတဲ့ ကရင်နီပြည်နယ်မှာ တိုက်ပွဲတွေကြား စစ်ဘေးတိမ်းရှောင်နေကြရတဲ့ ပြည်သူ ၂သိန်း နီးပါးထိ ရှိလာပြီး ပွင့်လင်းရာသီမှာ စစ်ရှောင်ဦးရေ ပိုတိုးလာတယ်လို့ ကရင်နီစစ်ဘေးရှောင် ကူညီစောင့်ရှောက်ရေးကွန်ယက်က မဲခေါင်သတင်းကို ဧပြီလ ၉ရက်က ပြောပါတယ်။
ကရင်နီပြည်နယ်မှာ စစ်ရှောင်စခန်း ထောင်ဂဏန်းအထိရှိနေပြီး အခြေခံစားသောက်ကုန်က အစ အမိုး၊ အကာတွေအထိ လိုအပ်ချက်တွေများပြားနေတယ်လို့ ကရင်နီစစ်ဘေးရှောင် ကူညီစောင့်ရှောက်ရေးကွန်ယက်ရဲ့ တာဝန်ရှိသူတစ်ဦးက ပြောပါတယ်။
“လူတွေများလာတော့ လိုအပ်ချက်တွေ ရှိလာတယ်။ အဓိကလိုတာက ဆန်၊ ဆီ၊ ဆား အခြေခံစားနပ်ရိက္ခာတွေ၊ ပြီးတော့ သောက်သုံးရေနဲ့ဆေးဝါးတွေပေါ့နော်။ သောက်သုံးရေရှားပါးမှုတွေလည်း ကြုံရတယ်။ နေရာထိုင်ခင်းအတွက်လည်း လိုတယ်။ ခဏခဏရွေ့ပြောင်းနေရတော့ တဲလုပ်ဖို့ မိုးကာတွေပေါ့ လိုပါတယ်”လို့ သူကပြောပါတယ်။
ကရင်နီပြည်နယ်မှာ ပွင့်လင်းရာသီရောက်တိုင်း တိုက်ပွဲတွေပိုပြင်းထန်လာတတ်သလို လက်ရှိမှာလည်း တိုက်ပွဲတွေက နေရာအနှံ့ဖြစ်လာတာကြောင့် စစ်ရှောင်ဦးရေက ထပ်တိုးလာနိုင်တယ်လို့ စစ်ဘေးရှောင်စောင့်ရှောက်ကူညီရေးအဖွဲ့ တာဝန်ရှိသူက ဆိုပါတယ်။
“စစ်မျက်နှာကျယ်လာတာနဲ့ အမျှ စစ်ရှောင်ကတိုးလာမှာပဲလေ။ အခုဆိုလည်း စစ်မဖြစ်တဲ့နေရာက အနည်းအကျည်းပဲရှိတော့တယ်။ တချို့ကတော့ စားသောက်နေထိုင်ဖို့ အဆင်မပြေလို့ တောင်ယာလေးပြေးလုပ်လိုက်၊ စစ်ရှောင်စခန်းကို ပြန်လာလိုက်နဲ့ သူတို့လည်း ပင်ပန်းနေကြပါပြီ”လို့ သူကပြောပါတယ်။
စစ်ရှောင်ဦးရေတွေများလာပေမဲ့ တဖက်မှာလည်းထောက်ပံ့ကူညီတဲ့ အလှူရှင်တွေက နည်းသထက်နည်းလာနေပြီး ကုန်စျေးနှုန်းတွေက တတ်လာတာကြောင့် အလှူရှင်တွေအနေနဲ့ ပိုပြီး အားစိုက်ကူညီပေးကြဖို့ ကရင်နီစစ်ဘေးရှောင် ကူညီစောင့်ရှောက်ရေးအဖွဲ့က တိုက်တွန်းထားပါတယ်။
စစ်ကောင်စီကတော့ ကရင်နီပြည်နယ်အတွင်းကို စားနပ်ရိက္ခာသယ်ယူပို့ဆောင်မှုတွေကို ကန့်သတ်ထားပြီး ပစ္စည်းအများအပြားသယ်ယူမှုတွေကို ပိတ်ပင်ထားတာကြောင့် စစ်ဘေးရှောင် ကူညီထောက်ပံ့ရေးအဖွဲ့တွေ အခက်တွေ့နေရတယ်လို့ ပါ၀င်ကူညီနေသူ တစ်ဦးက ပြောပါတယ်။
MK-007
#MeKongNews
#ကရင်နီ
#စစ်ရှောင်
