မဲခေါင်၊ ဇူလိုင် ၂၀

ကရင်နီပြည်နယ်မှာ တိုက်ပွဲတွေကြောင့် နေရပ်စွန့်ခွာထွက်ပြေးနေရတဲ့ စစ်ရှောင်ပြည်သူတွေကို လူသားချင်းစာနာထောက်ထားမှုဆိုင်ရာ အကူအညီတွေ မရောက်ရှိစေဖို့ INGO၊ NGO အဖွဲ့တွေကို လက်ရှိအချိန်ထိ စစ်ကောင်စီက ကန့်သတ်ထားတာကြောင့် စစ်ဘေးရှောင်တွေ အခက်အခဲတွေဖြစ်နေရတယ်လို့ JOB FOR KAYAH တာဝန်ရှိသူက မဲခေါင်သတင်းကိုပြောပါတယ်။

ပြီးခဲ့တဲ့ ၂၀၂၃ ဖေဖော်ဝါရီလ နှောင်ပိုင်းကစပြီး စစ်ကောင်စီက လူသားချင်းစာနာထောက်ထားမှုဆိုင်ရာ နိုင်ငံတကာအဖွဲ့အစည်းတွေဖြစ်တဲ့ INGO၊ NGO အဖွဲ့တွေ အပေါ် ကန့်သတ်မှုတွေ စတင်ပြုလုပ်ထားတာပါ။

ကရင်နီပြည်နယ်အတွင်း အဓိက လမ်းမတွေမှာ စစ်ကောင်စီ ဂိတ်တွေချပြီး စစ်ရှောင်စခန်းတွေ ရှိရာဘက်ကို စားနပ်ရိက္ခာတွေ သယ်ဆောင်ခွင့်မပြုတာ၊ သိမ်းဆည်းတာတွေကို ပြုလုပ်နေတာဖြစ်တယ်လို့ ဆိုပါတယ်။

ဒီလို စစ်ကောင်စီက စစ်ရှောင်တွေကို ကူညီနေတဲ့ နိုင်ငံတကာ အရပ်ဖက်အဖွဲ့အစည်းတွေကို ကန့်သတ်မှုတွေ၊ ဖိအားပေးမှုတွေ ရှိလာတာကြောင့်လည်း စစ်ရှောင်စခန်းတွေမှာ လူသားချင်းစာနာထောက်ထားမှုဆိုင်ရာ အကူအညီတွေမရရှိတာ ၄ လကျော်ခန့်ရှိနေပြီဖြစ်တယ်လို့ ဒီးမော့ဆိုအနောက်ခြမ်း စစ်ရှောင်တွေကို ကူညီစောင့်ရှောက်နေသူတစ်ဦးက ပြောပါတယ်။

ဒါပေမဲ့ ရှမ်းပြည်နယ်တောင်ပိုင်း၊ ဆီဆိုင်မြို့နယ် စစ်ရှောင်စခန်းတွေမှာတော့ ကရင်နီပြည်နယ်လို နိုင်ငံတကာ အရပ်ဘက်အဖွဲ့အစည်းတွေကို လုံး၀ ကန့်သတ်လိုက်တာတော့ မဟုတ်ဘဲ စစ်ကောင်စီက ပစ္စည်းတွေကို အပိုင်စီးထားပြီး ရံဖန်ရံခါ အနည်းစုသာ စစ်ရှောင်တွေကိုလာပေးတယ်လို့ ဆီဆိုင်မြို့နယ် စစ်ရှောင်ကူညီနေသူတစ်ဦးကပြောပါတယ်။

ဒါ့အပြင် အရပ်ဖက်အဖွဲ့အစည်းတွေက စစ်ရှောင်ပြည်သူတွေအတွက် ပေးတဲ့ လူသားချင်းစာနာထောက်ထားမှုဆိုင်ရာ ပစ္စည်းတွေကိုလည်း စစ်ကောင်စီတပ်သားတွေနဲ့ ပအိုဝ်းပြည်သူ့စစ်-PNOအဖွဲ့က လိုသလောက်ယူထားပြီး ပိုတဲ့ ပစ္စည်းတွေကိုသာ ခွဲတမ်းနဲ့ ပြန်ချပေးနေတာကြောင့်လည်း မလုံလောက်မှုတွေဖြစ်နေတယ်လို့ သူကပြောပါတယ်။

“အရပ်ဘက်အဖွဲ့အစည်းတွေကလည်း တကယ်ကိုယ်တိုင်ဆင်းလာကြတာလည်းမဟုတ်တော့ စစ်ကောင်စီနဲ့ PNO ပြုသမျှနုရတာပဲ။ အခု ၂ နှစ်ကျော်အတွင်းမှာတော့ ၂ ခါပဲရသေးတယ်။ သူတို့( INGO၊ NGOs) လာရင်လည်း ဓာတ်ပုံရိုက်ပြန်သွားတာဆိုတော့ အခြေအနေကို မသိကြဘူး” လို့ သူကရှင်းပြပါတယ်။

စစ်ကောင်စီလက်အောက်ခံ ပအိုဝ်းပြည်သူ့စစ်-PNO လှုပ်ရှားရာဒေသဖြစ်တဲ့ ဆီဆိုင်မြို့နယ်ထဲက စစ်ရှောင်စခန်းတွေမှာ တိုက်ပွဲတွေကြောင့် ထွက်ပြေးလာရတဲ့ ကရင်နီစစ်ရှောင်ပြည်သူ ၈၀၀၀ ကျော်ခိုလှုံနေရတာဖြစ်ပါတယ်။

ကရင်နီစစ်ရှောင်တွေကို လူသားချင်းစာနာထောက်ထားမှုဆိုင်ရာ အကူအညီတွေပေးနေတဲ့ နိုင်ငံတကာ အရပ်ဘက်အဖွဲ့အစည်းတွေကိုသာ စစ်ကောင်စီက ကန့်သတ်လိုက်တာမဟုတ်ဘဲ ကရင်နီပြည်နယ်အတွင်း ရိက္ခာသယ်ယူပို့ဆောင်မှုကိုလည်း ကန့်သတ်ပိတ်ပင်တာတွေလည်း ပြုလုပ်နေတာပါ။

စစ်‌ကောင်စီဘက်က ကရင်နီစစ်‌ရှောင်တွေကို ရည်ရွယ်ချက်ရှိရှိ ရိက္ခာဖြတ်တောက်မှုတွေ၊ ကန့်သတ်ပိတ်ပင်မှုတွေကြောင့် စစ်ရှောင်ပြည်သူတွေမှာ အခက်အခဲတွေကြုံတွေ့နေရတယ်လို့ သိရပါတယ်။

စားနပ်ရိက္ခာတစ်ခုတည်းကိုသာ ပိတ်ပင်တာမဟုတ်ဘဲ အမိုးအကာနဲ့ ဆေးဝါးတွေကိုပါ ဖြတ်တောက်ဖို့ ကြိုးစားနေတယ်လို့ ဆိုပါတယ်။

ဒီလို ရည်ရွယ်ချက်ရှိရှိ စားနပ်ရိက္ခာ ၊ အမိုးအကာနဲ့ ဆေးဝါးတွေကို စစ်ကောင်စီက ဖြတ်တောက်ဖို့ ကြိုးစားနေတာဟာ စစ်ရှောင်ပြည်သူတွေနဲ့ ပြည်သူ့ကာကွယ်ရေးတပ်ဖွဲ့တွေ ရပ်တည်လို့ မရအောင် ပြုလုပ်နေတာဖြစ်တယ်လို့ ကရင်နီတော်လှန်ရေးတပ်သားတစ်ဦးက ပြောပါတယ်။

စစ်ကောင်စီရဲ့ ရိက္ခာဖြတ်တောက်ဖို့ ကြိုးစားမှု၊ စီးပွားရေးကျဆင်းမှုနဲ့ စစ်တပ်ဂိတ်တွေကို ဆက်ကြေးပေးဆောင်ရမှုတွေကြောင့် အခြေခံစားသောက်ကုန်ဖြစ်တဲ့ ဆန်၊ ဆီ၊ဆား စတာတွေဟာ ဈေးနှုန်းအဆမတန်မြင့်တက်နေပြီး ဆန်တစ်အိတ်ကို ငွေကျပ် ၈,၀၀၀ နီးပါးထိပေးဝယ်နေရတယ်လို့ ဆိုပါတယ်။

လူသားချင်းစာနာထောက်ထားမှုဆိုင်ရာ နိုင်ငံတကာအဖွဲ့အစည်းတွေကို စစ်ကောင်စီ ဖိအားပေးကန့်သတ်ထားမှု၊ အခြေခံစားသောက်ကုန်တွေ ဈေးမြင့်တက်လာမှု၊ ဆေးဝါးနဲ့ အမိုးအကာ အလုံအလောက်မရရှိမှု ရိက္ခာသယ်ရာလမ်းကြောင်းတွေကို ပိတ်ဆို့ထားမှုနဲ့ ရန်ပုံငွေအားနည်းလာမှုတွေကြောင့် ကရင်နီစစ်ရှောင်တွေ ၁,၃၀၀၀၀ ကျော် ခိုလှုံရာ နေရာဖြစ်တဲ့ ဒီးမော့ဆို အနောက်ခြမ်း စစ်ရှောင်စခန်းတွေအပါအဝင် ထိုင်း-ကရင်နီနယ်စပ်စစ်ရှောင်စခန်းတွေ၊ ဆီဆိုင်မြို့နယ် စစ်ရှောင်စခန်းတွေမှာလည်း အခြေခံစားနပ်ရိက္ခာဖြစ်တဲ့ ဆန် ပြတ်တောက်မှုတွေကို ရင်ဆိုင်နေရပါတယ်။

MK-007

#MeKongNews

#ကရင်နီ

#စစ်ဘေးရှောင်

#စစ်ကောင်စီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)