မဲခေါင်၊ ဖေဖော်ဝါရီ ၂၁
စစ်ကိုင်းတိုင်း၊ ကန့်ဘလူခရိုင်၊ ပင့်သာတိုက်နယ်၊ ချောင်းကြားရွာကို စစ်ကောင်စီတပ်နဲ့ ပျူစောထီး စုပေါင်း အင်အား ၁၂၀ ခန့် အကြမ်းဖက် ဝင်ရောက် မီးတင်ရှို့နေတယ်လို့ ကျွန်းလှ ကန့်ဘလူ တက်ကြွလှုပ်ရှားသူများအဖွဲ့-ကန့်ဘလူခရိုင်က ဒီကနေ့ ထုတ်ပြန်ပါတယ်။
ကျွန်းလှမြို့ပေါ်မှာ အထိုင်ချထားတဲ့ စစ်ကောင်စီတပ်နဲ့ ပျူစောထီး အင်အား ၈၀ ခန့်ဟာ ကန့်ဘလူမြို့နယ် ပေကုန်းတောင်ရွာမှ ပျူအင်အား ၄၀ ခန့်နဲ့ စုပေါင်းပြီး ဒီနေ့ မနက် ၆ နာရီမှာ ပေကုန်းရွာမြောက်ဘက်သို့ စစ်ကြောင်းထိုးကာ မနက် ၈ နာရီမှာ ချောင်းကြားရွာကို တတိယ အကြိမ် မီးရှို့ဖျက်ဆီး ခဲ့တာပါ။
ချောင်းကြားရွာမှာ အိမ်ခြေ ၁၁၈ အိမ်ရှိတဲ့အနက် ၂၀၂၂ ခုနှစ်၊ ဒီဇင်ဘာ ၄ ရက်မှာ စစ်ကောင်စီတပ်က ပထမ အကြိမ် မီးရှို့ဖျက်ဆီးခဲ့ရာ နေအိမ် ၈ လုံး၊ အခုနှစ် ဇန်နဝါရီ ၂၉ ရက်မှာ ဒုတိယအကြိမ် မီးရှို့ရာ နေအိမ် ၂၃ လုံးနဲ့ စပါးကျီ ၁၃ ခု မီးလောင်ပျက်စီးခဲ့ပြီး စုစုပေါင်း နေအိမ် ၃၁ လုံးနဲ့ စပါးကျီ ၁၃ ခု မီးလောင် ဆုံးရှုံးထားတယ်လို့ သိရပါတယ်။
အခု တတိယအကြိမ် မီးရှို့ဖျက်ဆီးခံချိန် ပျက်စီးဆုံးရှုံးမှု စာရင်းကို ဆက်လက်စုံစမ်းလျက်ရှိတယ်လို့ ဆိုပါတယ်။
စစ်ကောင်စီစစ်ကြောင်းဟာ ချောင်းကြားရွာကို မီးရှို့ဖျက်ဆီးပြီးနောက် မနက် ၁၁ နာရီခန့်မှာ ပြန်ထွက်သွားပြီး ပေကုန်းရွာမှ တစ်ဆင့် ကျွန်းလှမြို့ပေါ်သို့ ၆ ဘီးကားတစ်စီး၊ ခွေးဘီလူး တစ်စီးနဲ့ အင်အားအပြည့် ပြန်လည် ဝင်ရောက်သွားတယ်လို့ သိရပါတယ်။
အဲဒီ စစ်ကြောင်းကြောင့် ချောင်းကြားရွာနဲ့ အနီးတစ်ဝိုက်ရှိ မန်ကျီးကုန်း၊ ဖလားရ၊ ပင့်သာ၊ ရှမ်းကုန်းနဲ့ အင်းမရွာမှ ပြည်သူထောင်နဲ့ချီပြီး အိုးအိမ်စွန့်ခွာကာ ဘေးလွတ်ရာ ထွက်ပြေးတိမ်းရှောင် နေရပါတယ်။
ပုံစာ- ဇန်နဝါရီ ၂၉ ရက်နေ့က မီးရှို့ဖျက်ဆီးခံရတဲ့ ချောင်းကြားရွာကို အဝေးမှ မြင်တွေ့ရစဉ်။
MK-003
#MeKongNews
#မီးရှို့ဖျက်ဆီး #ချောင်းကြားရွာ #ပကဖ
