မဲခေါင်၊ ဇန်နဝါရီ ၁၃
တော်လှန်ရေး တပ်ဖွဲ့ ၆ ဖွဲ့က ရှေ့တန်းပြန် ရဲဘော် ၁၀၀ ကျော်ကို ကနီမြို့နယ် ကျေးရွာ ၂၀ နီးပါးက ပြည်သူ ထောင်နဲ့ချီ သောင်းသောင်းဖြဖြ ကြိုဆိုကြတယ်လို့ Myanmar Defense Force ဗဟိုပြန်ကြားရေး ကော်မတီက မနေ့က ထုတ်ပြန်ပါတယ်။
စစ်ကိုင်းတိုင်း၊ ကနီမြို့နယ်၊ ချင်းတွင်းမြစ်ကြောင်း တစ်လျှောက် ကုန်းကြောင်း၊ ရေကြောင်း ထိုးလားတဲ့ စစ်ကောင်စီ စစ်ကြောင်းတွေနဲ့ တော်လှန်ရေးတပ်ဖွဲ့တွေရဲ့ တိုက်ပွဲတွေ တစ်လနီးပါး ကြာမြင့်ခဲ့ပြီးနောက် တော်လှန်ရေးတပ်ဖွဲ့တွေ အောင်ပွဲဆင်နိုင်ခဲ့တယ်လို့ သိရပါတယ်။
တိုက်ပွဲတွေ အတွင်း စစ်ကောင်စီဘက်မှ ၅၀ ကျော် သေဆုံးပြီး စစ်ကောင်စီတပ်သားတွေထံမှ လက်နက်ကြီး၊ လက်နက်ငယ်တွေလည်း သိမ်းဆည်းရမိခဲ့တယ်လို့ ဆိုပါတယ်။
စစ်ကောင်စီတပ်တွေ အရှုံးနဲ့ပြန်ဆုတ်သွားပြီးနောက် အောင်ပွဲနဲ့ ပြန်လာကြတဲ့ တော်လှန်ရေးတပ်ဖွဲ့တွေကို ကနီမြို့နယ် အတွင်းရှိ ကျေးရွာ ၂၀ နီးပါးမှ ပြည်သူထောင်ချီဟာ စုရပ် ၇ ခုမှာ စုဝေးကာ အောင်သပြေပန်းတွေ၊ အိုးစည်ဒိုးပတ် အကအခုန်များစွာနဲ့ သောင်းသောင်းဖြဖြ ကြိုဆိုကြပြီး အစားအသောက်တွေ ဧည့်ခံ ကျွေးမွေးတာနဲ့ တော်လှန်ရေး ထောက်ပံ့ငွေ လှူဒါန်းတာတွေ ပြုလုပ်ခဲ့တယ်လို့ သိရပါတယ်။
အခု အောင်ပွဲပြန် ကြိုဆိုပွဲသို့ MDF နဲ့ ဒေသတွင်း တော်လှန်ရေး ၆ ဖွဲ့မှ ပြည်သူ့ရဲဘော် ၁၀၀ ကျော် တက်ရောက်ကာ ပြည်သူ့မေတ္တာ ခံယူကြတယ်လို့ သိရပါတယ်။
ဓာတ်ပုံ- ဗဟိုပြန်ကြားရေး ကော်မတီ Myanmar Defense Force။
MK-003
