မဲခေါင်၊ ဖေဖော်ဝါရီ ၁၄
ဖေဖော်ဝါရီ ၁၂ ရက် ဒေသစံတော်ချိန် ညနေ ၄ နာရီမှာ ဘန်ကောက်က ဆောက်လုပ်ရေးဝန်းအတွင်း ဆောက်လက်စ တိုက်တစ်လုံးပြိုကျလို့ မြန်မာလုပ်သား ၅ ယောက် ဒဏ်ရာရရှိခဲ့ကြောင်း သိရပါတယ်။
မက္ကဆန်ရဲစခန်းကို တိုက်ပြိုကြောင်း အကြောင်းကြားလာလို့ သွားရောက်စစ်ဆေးရာမှာ ဟိုင်ခွမ်းခရိုင်၊ ခမ်ဖမ်းပတ် ၇ လမ်းက အဆောက်အအုံဖြစ်ကြောင်း သိရပြီး လေးထပ်အဆောက်အအုံဟာ နှစ်ထပ်ကနေ ပြိုကျ ရာမှာ မြန်မာလုပ်သား ၁၀၀ ကျော် လွတ်ရာထွက်ပြေးခဲ့ကြောင်းနဲ့ ၅ ယောက် ဒဏ်ရာရလို့ ကယ်ဆယ်ရေး အဖွဲ့တွေက ဆေးရုံပို့ခဲ့ရတယ်လို့ ဆိုပါတယ်။
ကယ်ဆယ်ရေးလုပ်သားတွေဟာ အပျက်အစီးပုံကြားထဲ ပိတ်မိနေတဲ့ မြန်မာလုပ်သား ကျား ၁ ၊ မ ၂ ယောက်ကို ကယ်ထုတ် ခဲ့ရာမှာ ဦးခေါင်းနဲ့ ခန္ဓာကိုယ်ပေါ်မှာ ဒဏ်ရာတွေရခဲ့တာတွေ့ရကြောင်း၊ နောက်အမျိုးသမီးနှစ် ယောက်က အခင်းဖြစ်မှုမှာ မေ့လဲသွားလို့ စုစုပေါင်း ၅ ယောက်ကို ပက်ချရာဗက် ဆေးရုံကို ပို့ပေးခဲ့တယ်လို့ ဘေးအန္တရာယ်ကာကွယ်ရေးနှင့် လျော့ပါးရေးဦးစီးဌာနက ထုတ်ပြန်ခဲ့တယ်။
ပြိုကျတဲ့တိုက်ရဲ့ ဆောက်လုပ်ရေး ကုမ္ပဏီဟာ ၂၀၂၂ ဇူလိုင် ၈ ရက်ကနေ ၂၀၂၃ ဇူလိုင် ၇ ရက်နေ့အထိ လူနေအိမ်ခန်းတွေနဲ့ ရုံးခန်းတွေပါတဲ့ ဒီတိုက် ကို တစ်နှစ်အတွင်းအပြီးဆောက်ဖို့ ရက်ချိန်းသတ်မှတ်ခံထားရကြောင်း၊ တစ်ဆက်တည်း အဆောက်အအုံ ၁၀ လုံးနဲ့ လမ်းတွေကိုပါ ဖောက်လုပ်ပေးဖို့ တာဝန်ယူထားရပြီး ဆောက်လုပ်ရေးလုပ်သား ၁၃၀ ငှားထားတဲ့အနက် အများစုက မြန်မာလုပ်သားတွေဖြစ်ကြောင်း၊ အခု တိုက်ပြိုကျမှုဖြစ်လို့ လုပ်ငန်းတွေကို ရပ်ဆိုင်းပိတ်သိမ်းထား ကြောင်း မက္ကဆန်ရဲစခန်း ရဲမှူး သီသီက ရှင်းလင်းပြောကြားခဲ့ပါတယ်။
MKF – 001
Ref: thethaiger
#MeKongNews
