မဲခေါင်၊ စက်တင်ဘာ ၂၄

ရှမ်းပြည်တောင်ပိုင်း၊ ရွာငံမြို့နယ်အတွင်း တောင်သူများ ခြံများထဲတွင် စိုက်ပျိုးထားသည့် လိမ္မော်၊ လက်ဖက်နှင့် ကော်ဖီပျိုးပင်များကို လိုက်လံခိုးယူမှုများရှိနေသဖြင့် တောင်သူများအနေဖြင့် အခက်အခဲများ ကြုံတွေ့နေရကြောင်း ဒေသခံတောင်သူများထံမှ သိရသည်။

အဆိုပါ ပျိုးပင်များကို တောင်သူများက စိုက်ပျိုးရန်အတွက် ငွေကြေးကုန်ကျခံကာ ဝယ်ယူထားရခြင်းဖြစ်ပြီး ခြံအတွင်း စိုက်ပျိုးပြီးနောက် အပင်ရှင်သန်လာချိန်တွင် လာရောက်ခိုးယူခံနေရခြင်းဖြစ်သည်။

အချို့ခြံများတွင် တစ်ကြိမ်တည်း ပျိုးပင်အများအပြား ပျောက်ဆုံးသွားသည့်အပြင် ခိုးယူသူများက ပျိုးပင်များကို အမြစ်မှတူးယူသွားခြင်းကြောင့် တောင်သူများအနေဖြင့် ပြန်လည်စိုက်ပျိုးရန် အချိန်နှင့် ငွေကြေး ထပ်မံကုန်ကျရကြောင်း သိရသည်။

“ပျိုးပင်တွေကို ဝယ်ပြီး စိုက်ထားတာပါ။ အပင်ကောင်းကောင်းဖြစ်လာတော့မှ တူးယူသွားတာဆိုတော့ တော်တော်စိတ်ညစ်ရတယ်။ ပြန်ဝယ်ပြီး ပြန်စိုက်ရတာလည်း ငွေကုန်တယ်။ ခြံထဲမှာလည်း အမြဲတမ်းလူစောင့်ထားလို့ မရတော့ ညဘက်ဆို ပျိုးပင်တွေ မရှိတော့မှာကို စိုးရိမ်နေရတယ်” ဟု ဒေသခံတောင်သူတစ်ဦးက ပြောသည်။

ပျိုးပင်များ ခိုးယူခံနေရသည့်အတွက် တောင်သူများအနေဖြင့် မိမိတို့၏ ခြံများကို အချိန်ပြည့် စောင့်ကြည့်ရန် လိုအပ်လာပြီး အလုပ်သမားငှားရမ်း၍ ခြံစောင့်ခိုင်းရပါကလည်း အပိုကုန်ကျစရိတ်များ ရှိလာကြောင်း ဒေသခံများက ဆိုသည်။

ထို့အပြင် လိမ္မော်၊ လက်ဖက်နှင့် ကော်ဖီကဲ့သို့ နှစ်ရှည်စိုက်ပျိုးသီးနှံများသည် အပင်ကြီးထွားရန် အချိန်ယူရသဖြင့် ပျိုးပင်များ ခိုးယူခံရခြင်းသည် တောင်သူများ၏ လာမည့်နှစ်များအတွက် မျှော်မှန်းထားသည့် ဝင်ငွေကိုပါ ထိခိုက်စေနိုင်ကြောင်း တောင်သူများက ပြောသည်။

“တစ်ပင်ကို တန်ဖိုးနဲ့ပဲတွက်လို့မရဘူး။ အပင်ကို ပြန်စိုက်ပြီး ရှင်သန်အောင်လုပ်ရတာ အချိန်လည်းကြာတယ်။ ခိုးသွားရင် ပျိုးပင်ဖိုးတင်မကဘူး၊ အလုပ်ခနဲ့ အချိန်ပါ ဆုံးရှုံးရတာဖြစ်တယ်” ဟု အခြားတောင်သူတစ်ဦးက ပြောသည်။

လက်ရှိတွင် ပျိုးပင်များ ခိုးယူနေသူများကို ဖမ်းဆီး အရေးယူနိုင်ရန် ဒေသခံများ လိုလားနေကြပြီး ခိုးယူမှုများ ဆက်လက်ဖြစ်ပွားနေပါက တောင်သူများ၏ စိုက်ပျိုးရေးလုပ်ငန်းအပေါ် ထိခိုက်မှုများ ပိုမိုရှိလာနိုင်ကြောင်း ဒေသခံများက ပြောသည်။

#MeKongNews
#ရွာငံ
#လိမ္မော်
#လက်ဖက်
#ကော်ဖီ
#ပျိုးပင်
#ခိုးယူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)