မဲခေါင် | ဩဂုတ် ၁

ရှမ်းပြည်တောင်ပိုင်း၊ ဟိုပုံးမြို့နယ် နောင်တောင်းနှင့် ညောင်ပင်ကျေးရွာအနီးရှိ ပြည်သူပိုင်စိုက်ပျိုးမြေများကို စစ်တပ်က တပ်ပိုင်မြေအဖြစ် သတ်မှတ်သိမ်းယူပြီးနောက် ဟိုပုံးအခြေစိုက် စစ်တပ်ကွန်ပျူတာနှင့် နည်းပညာသိပ္ပံကျောင်းအုပ် ဗိုလ်မှူးချုပ် သန့်ထင်စိုးအပါအဝင် စစ်အရာရှိများက ကိုယ်ပိုင်မြေကွက်များအဖြစ် ခွဲဝေရယူထားကြောင်း မြေသိမ်းခံဒေသခံများက ပြောသည်။

ဒေသခံများ၏ ပြောကြားချက်အရ ဗိုလ်မှူးချုပ် သန့်ထင်စိုးက မြေသုံးဧက ရယူထားပြီး ဒုဗိုလ်မှူးကြီးများ၊ ဗိုလ်မှူးများနှင့် ဗိုလ်ကြီးအဆင့်ရှိ စစ်အရာရှိများလည်း အမည်ပေါက်ဖြင့် မြေယာများကို ခွဲဝေပိုင်ဆိုင်ထားကြောင်း သိရသည်။

တပ်ပိုင်မြေအဖြစ် သတ်မှတ်ထားသော်လည်း လက်တွေ့တွင် တပ်ရင်းအသုံးပြုခြင်းမရှိဘဲ စစ်ဘက်အရာရှိများ၏ ကိုယ်ပိုင်မြေများအဖြစ် အသုံးပြုနေကြောင်း ဒေသခံများက စွပ်စွဲထားသည်။

အဆိုပါမြေယာများမှာ မျိုးဆက်များစွာ စိုက်ပျိုးလုပ်ကိုင်လာသည့် လယ်ယာနှင့် ဥယျာဉ်ခြံမြေများဖြစ်သော်လည်း စစ်တပ်က တပ်ပိုင်မြေအဖြစ် သတ်မှတ်ပြီး မူလမြေပိုင်ရှင်များ၏ မြေယာအသုံးပြုခွင့်ကို ပိတ်ပင်ခဲ့ကြောင်း၊ ထို့နောက် မူလပိုင်ရှင်များကို ကျူးကျော်သူများဟု စွပ်စွဲကာ မြေယာများမှ အတင်းအကျပ် ဖယ်ရှားခဲ့ကြောင်းလည်း သိရသည်။

မြေသိမ်းခံပြည်သူများက မြေပိုင်ဆိုင်မှုအထောက်အထားများ၊ မြေစာရင်းမှတ်တမ်းများနှင့် အခွန်ဆောင်စာရွက်စာတမ်းများကို စုဆောင်းထားပြီး မြေသိမ်းမှုဖြစ်စဉ်နှင့် စစ်အရာရှိများအကြား မြေယာခွဲဝေမှုများကို ဖော်ထုတ်စုံစမ်းပေးရန်နှင့် မူလပိုင်ရှင်များထံ မြေယာများ ပြန်လည်ပေးအပ်ပေးရန် တောင်းဆိုထားကြသည်။

“တပ်ပိုင်မြေလို့ သိမ်းပြီး နောက်ဆုံးတော့ အရာရှိတွေက ကိုယ်ပိုင်အမည်တွေနဲ့ ပြန်ခွဲယူသွားကြတာပါ။ သိမ်းထားတဲ့ မြေကွက်တွေကလည်း လမ်းမကြီးဘေးမှာရှိတဲ့ တန်ဖိုးမြင့်မြေတွေ ဖြစ်ပါတယ်။ မျိုးဆက်အဆက်ဆက် လုပ်ကိုင်လာတဲ့ မြေတွေကို ဆုံးရှုံးလိုက်ရတော့ စားဝတ်နေရေးအတွက် အခက်အခဲတွေ အများကြီး ကြုံနေရပါတယ်” ဟု မြေသိမ်းခံတောင်သူတစ်ဦးက မဲခေါင်သို့ ပြောသည်။

ဟိုပုံးမြို့နယ် နောင်တောင်းနှင့် ညောင်ပင်ကျေးရွာအနီးရှိ မြေယာများနှင့်ပတ်သက်၍ ဒေသခံများနှင့် စစ်တပ်အကြား အငြင်းပွားမှုမှာ ၂၀၂၆ ခုနှစ်အစပိုင်းကတည်းက ဆက်တိုက်ဖြစ်ပွားနေခြင်းဖြစ်သည်။

ဖေဖော်ဝါရီလအတွင်း စစ်တပ်က အဆိုပါဒေသရှိ မြေဧက ၅၆၁ ဒသမ ၇၅ ဧကကို “လပ်လပ်မြေ” အဖြစ် သတ်မှတ်ခဲ့ပြီး ဒေသခံတောင်သူများကို ဖယ်ရှားရန် အကြောင်းကြားခဲ့သည်။

သို့သော် ဒေသခံများက ယင်းမြေများမှာ လပ်လပ်မြေမဟုတ်ဘဲ မျိုးဆက်များစွာ စိုက်ပျိုးအသုံးပြုလာသည့် လယ်ယာနှင့် ဥယျာဉ်ခြံမြေများဖြစ်ကြောင်း ကန့်ကွက်ခဲ့ကြသည်။

ယင်းနောက် မြေသိမ်းမှုကို ကန့်ကွက်သည့် ဒေသခံများက သတင်းစာရှင်းလင်းပွဲပြုလုပ်ခဲ့ပြီး ဟိုပုံးမြို့နယ်အတွင်း မြေဧက ၁၈,၃၆၀ ကျော် သိမ်းယူခံထားရကာ အိမ်ထောင်စု ၂၀၀ ကျော် ထိခိုက်ခဲ့ကြောင်း ထုတ်ဖော်ပြောဆိုခဲ့သည်။

မတ်လနှောင်းပိုင်းနှင့် ဧပြီလအစပိုင်းတွင် နောင်တောင်းနှင့် ညောင်ပင်ကျေးရွာများ၌ မြေဖျက်သိမ်းမှုကို ကန့်ကွက်ခဲ့သည့် ဒေသခံ ၁၂ ဦးကို စစ်တပ်၊ ရဲတပ်ဖွဲ့နှင့် PNO ဆက်စပ်လုံခြုံရေးအဖွဲ့များက ဖမ်းဆီးခဲ့ကြောင်း သိရသည်။

ဖမ်းဆီးခံရသူအချို့သာ ပြန်လည်လွတ်မြောက်ခဲ့ပြီး ကျန်သူများမှာ ကာလအတန်ကြာ မိသားစုများနှင့် အဆက်အသွယ်မရဘဲ ထိန်းသိမ်းခံခဲ့ရကြောင်း ဒေသခံများက ပြောဆိုထားသည်။

ဇွန်လအတွင်းတွင်လည်း မြေသိမ်းခံရသည့် အိမ်ထောင်စုများအား နေအိမ်များကို ကိုယ်တိုင်ဖျက်သိမ်းရန်နှင့် ဖျက်သိမ်းစရိတ်အဖြစ် ငွေကျပ် ၅ သိန်းစီ ပေးဆောင်ရန် တောင်းဆိုခံရကြောင်း သိရပြီး ယခုနောက်ဆုံးတွင် သိမ်းယူထားသည့်မြေများကို စစ်ဘက်အရာရှိများ၏ ကိုယ်ပိုင်အမည်များဖြင့် ခွဲဝေထားသည်ဆိုသော စွပ်စွဲချက်များ ထပ်မံထွက်ပေါ်လာခြင်း ဖြစ်သည်။

#MeKongNews
#ရှမ်းတောင်
#ဟိုပုံး
#လယ်မြေ
#ကိုယ်ပိုင်မြေ
#သိမ်းယူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)