မဲခေါင်၊ ဇူလိုင် ၁၅
ရုရှားက သိမ်းပိုက်ထားသော ယူကရိန်းတောင်ပိုင်းမှ သူတင်ကိုယ်တင်ဖြစ်နေသည့် ကမ်းရိုးတန်းဒေသတစ်ခု၌ ပင်လယ်ပြင်ဒရုန်းများ၊ မြေပြင်တိုက်ခိုက်ရေး ရိုဘော့များ အသုံးပြု၍ လူမဲ့ကမ်းတက်တိုက်ပွဲ စစ်ဆင်ရေးတစ်ခုကို ဖော်ဆောင်ခဲ့သည်ဟု ယူကရိန်းစစ်ဘက်က ပြောကြားသည်။
၎င်းမှာ ကမ္ဘာ့ပထမဆုံး လူမဲ့ကမ်းတက်မစ်ရှင်ဟုလည်း ၎င်းတို့က ပြောသည်။
တနင်္လာနေ့တွင် ယူကရိန်းစစ်တပ်က ထုတ်ပြန်ခဲ့သော ဗီဒီယိုတွင် အလိုအလျောက်စနစ်နှင့် သင်္ဘောတစ်စီး ရေထဲမှသွားလာပြီး ကမ်းကပ်သွားသည်ကို မြင်တွေ့ရသည်။
ထို့နောက် မောင်းသူမဲ့ယာဉ်တစ်စီး သင်္ဘောပေါ်မှ ဆင်းသွားပြီး မြေပြင်ပေါ်တက်သွားသည်ကို မြင်တွေ့ရသည်။
ကမ်းပေါ်တက်ပြီးချိန်မှာပင် ယင်းယာဉ်က တပ်ဆင်ထားသည့် လက်နက်ဖြင့် ပစ်ခတ်နေသည်ကိုလည်း မြင်တွေ့ရသည်။
ယင်းအောင်မြင်မှု၏ အရေးပါပုံနှင့် ပတ်သက်၍ မစ်ရှင်ကို ကွပ်ကဲခဲ့သော ယူကရိန်းတပ်ဖွဲ့က အလေးထား ပြောကြားခဲ့ရာတွင် လူလိုက်ပါခြင်းမရှိ သောပင်လယ်ပြင် ပလက်ဖောင်းတစ်ခုဖြင့် မြေပြင်ရိုဘော့စက်ရုပ်တစ်ခုအား သိမ်းပိုက်နယ်မြေတစ်ခုသို့ ပို့ဆောင်၍ တိုက်ခိုက်ခိုင်းခြင်းမှာ ကမ္ဘာပေါ်တွင် ပထမဆုံးအောင်မြင်မှု ဖြစ်သည်ဟု ပြောသည်။
မောင်းသူမဲ့ရေယာဉ် ကမ်းကပ်ခဲ့သော နေရာသည် ပင်လက်နက်ကို မျက်နှာမူနေသော ယူကရိန်း၏ မိုက်ကိုလေ့ဗ်ဒေသ တစ်စိတ်တစ်ပိုင်းဖြစ်သော ကင်းဘန်းစပစ်ဒေသမှ ကျဉ်းမြောင်းသည့်သဲသောင်ပြင်နေရာတစ်ခု ဖြစ်ကြောင်း ယူကရိန်းစစ်တပ်က ပြောသည်။
ထိုနေရာနှင့်ကပ်လျက် ခါဆန်ဒေသကို ရုရှားတို့က သိမ်းပိုက်ထားသည်။
ရုရှားတို့၏ စောင့်ကြည့်စနစ်များ၊ လက်နက်ကြီးများနှင့် ဒရုန်းလှုပ်ရှားမှုများ ရှိနေသောကြောင့် ကင်းဘန်းစပစ်ဒေသသည် သမားရိုးကျ ကမ်းတက်တိုက်ပွဲ ဆင်နွဲမည့် စစ်ဆင်ရေးများအတွက် အလွန်အန္တရာယ်များကြောင်း ယူကရိန်းမီဒီယာသတင်းများက ဖော်ပြကြသည်။
လူလိုက်ပါခြင်းမရှိသော ရေပြင်သွားသင်္ဘောများ အသုံးပြု၍ လက်နက်တပ်ဆင်ထားသော မြေပြင်ရိုဘော့များ ပို့ဆောင်နိုင်ခြင်းသည် စစ်သားများကို အသက်အန္တရာယ် မဖြစ်စေဘဲ သိမ်းပိုက်ခံနယ်မြေများတွင် စစ်ဆင်ရေးများ လုပ်နိုင်မည့် နည်းလမ်းတစ်ခု ဖြစ်ကြောင်းလည်း သတင်းဌာနက မှတ်ချက်ပြုသည်။
အေးကျော်
Ref:NHK
#MeKongNews
#ကမ္ဘာ့ပထမဆုံး
#လူမဲ့
#ကမ်းတက်တိုက်ပွဲ
#စစ်ဆင်ရေး
#ယူကရိန်း
