မဲခေါင်၊ မေ ၁၅
အမေရိကန်နိုင်ငံတွင် ပထမဆုံးဖော်ထုတ်နိုင်ခဲ့သော တရုတ်အစိုးရကိုယ်စား ခိုးဖွင့်ထားသည့် တရုတ်ရဲစခန်းတစ်ခုအား ကူညီလည်ပတ်ပေးခဲ့သည်ဆိုသော အမှုတွင် အမေရိကန်နိုင်ငံသားတစ်ဦးတွင် အပြစ်ရှိကြောင်း တရားရုံးက ဖော်ထုတ်နိုင်ခဲ့သည်။
အသက် ၆၄ နှစ်ရှိ လူကျန်ဝမ်း သည် ၂၀၂၂ ခုနှစ် အစောပိုင်းတွင် တရုတ်နိုင်ငံ၏ ပြည်သူ့လုံခြုံရေးဝန်ကြီးဌာနအတွက် နယူးယောက်မြို့၊ မန်ဟက်တန် တရုတ်တန်းရှိ ရဲစခန်းကို ဖွင့်လှစ်လုပ်ကိုင်ခဲ့ကြောင်း ဂျူရီလူကြီးအဖွဲ့က တွေ့ရှိခဲ့သည်။
ရဲစခန်းနှင့်ဆက်စပ်၍ တရုတ်အစိုးရ၏ တရားမဝင်စုံထောက်တစ်ဦး အဖြစ်လုပ်ကိုင်ခြင်း စွဲချက်တွင် လူကျန်ဝမ်းအပြစ်ရှိကြောင်း တွေ့ရှိခဲ့သလို ဆက်စပ်အထောက်အထားများကို ဖျက်ဆီးပစ်ခဲ့ခြင်းအတွက် တရားရေးလုပ်ငန်းအား တားဆီးပိတ်ဆို့မှု အတွက်လည်း ၎င်းတွင် အပြစ်ရှိကြောင်း တွေ့ရှိခဲ့သည်။
တရုတ်နိုင်ငံ၏ တရားမဝင်အေးဂျင့်အဖြစ် လုပ်ကိုင်ပေးခဲ့ခြင်းအတွက် တရားစွဲဆိုခံရပြီးနောက် ကယ်လီဖိုးနီးယားပြည်နယ်မှ မြို့တော်ဝန်တစ်ဦး နုတ်ထွက်သွားခဲ့သည့် သီတင်းပတ်အတွင်းမှာပင် လူကျန်ဝမ်းအမှု ပေါ်ထွက်လာခြင်း ဖြစ်သည်။
လူကျန်းဝမ်၏ အမှုအား နယူးယောက်မြို့ ဖက်ဒရယ်တရားရုံး၌ သီတင်းတစ်ပတ်ကြာ ဂျူရီအဖွဲ့ကြားနာမှု လုပ်ဆောင်ခဲ့ပြီး အပြစ်ရှိကြောင်း တွေ့ရှိခဲ့ကာ ဟယ်ရီလူဟုလည်း လူသိများသော လူကျန်းဝမ်သည် ထောင်ဒဏ်အနှစ် ၃၀ ကျခံရနိုင်ကြောင်း အစိုးရေရှေ့နေများက ပြောကြားကြသည်။
၎င်းနှင့်အတူ အရေးယူခံခဲ့ရသော ၆၂ နှစ်အရွယ် ချင်ကျင်ပင်းသည် နိုင်ငံရပ်ခြားရဲစခန်းနှင့်ဆက်စပ်၍ တရုတ်နိုင်ငံ၏ အေးဂျင့်အဖြစ် လုပ်ကိုင်ရန် ပူးပေါင်းကြံစည်ခဲ့မှုတွင် အပြစ်ရှိကြောင်း ၂၀၂၄ ခုနှစ် ဒီဇင်ဘာလတွင် ဝန်ခံခဲ့ပြီးနောက် ပြစ်ဒဏ်ချမှတ်မှုအတွက် စောင့်ဆိုင်းနေရကြောင်း သိရသည်။
နိုင်ငံပေါင်း ၅၃ နိုင်ငံတွင် အလားတူ ရဲစခန်းပေါင်း ၁၀၀ ကျော် တည်ရှိနေကြောင်း သတင်းများက ဖော်ပြကြပြီး ပြည်ပရောက် တရုတ်နိုင်ငံသားများကို ခြိမ်းခြောက်ရန်နှင့် စောင့်ကြည့်ရန် တရုတ်က ယင်းစခန်းများကို အသုံးပြုနေကြောင်း လူ့အခွင့်အရေးလှုပ်ရှားသူများက ပြောကြားကြသည်။
ယင်းစခန်းများမှာ ရဲစခန်းများ ဖြစ်သည်ဆိုခြင်းကို တရုတ်က ငြင်းဆိုပြီး ပြည်ပရောက် တရုတ်နိုင်ငံသားများအတွက် အုပ်ချုပ်ရေးရာ ဝန်ဆောင်မှုပေးသော ဝန်ဆောင်မှုစဌာနများသာ ဖြစ်ကြောင်း ပြောသည်။
အေးကျော်
Ref:BBC
#MeKongNews
#နယူးယောက်
#တရုတ်ရဲစခန်း
#စပိုင်
#အမေရိကန်နိုင်ငံသား
