မဲခေါင်၊ မေ ၁၂
ရှမ်းပြည်မြောက်ပိုင်း၊ စစ်ကောင်စီ ထိန်းချုပ်ထားသည့် လားရှိုးမြို့တွင် စစ်ကောင်စီနှင့် MNDAA တို့ ပြီးခဲ့သည့် မေလ ၁၀ ရက်က တွေ့ဆုံဆွေးနွေးမှု ပြုလုပ်ခဲ့ကြောင်း သတင်းရင်းမြစ်များထံမှ သိရသည်။
ယင်းတွေ့ဆုံမှုကို လားရှိုးမြို့ရှိ ဆင်နှစ်ကောင်ဟိုတယ်၌ ပြုလုပ်ခဲ့ခြင်းဖြစ်ပြီး ပုံမှန်တွေ့ဆုံမှုဟု ဆိုသော်လည်း ဆွေးနွေးသည့် အကြောင်းအရာများမှာ ထူးခြားချက်များရှိနေကြောင်း သိရသည်။
“လောက်ကိုင်ဘက်မှာ စစ်ကောင်စီ ကင်းထောက်လေယာဉ် ဝဲတာတွေ၊ နယ်စပ်ခြံစည်းရိုးကိစ္စတွေ ပါတယ်လို့ ကြားတယ်။ ပြီးတော့ BRI လမ်းကြောင်းက တပ်တွေရှင်းဖို့ကိစ္စလည်း ပါတယ်။ ထူးခြားတာက နမ္မတူနဲ့ နမ့်ခမ်းမြို့တွေအတွက် ထွေအုပ် အပါအဝင် ဌာနဆိုင်ရာ Non-CDM ဝန်ထမ်းတွေကို လားရှိုးမှာ စုဖွဲ့ထားတဲ့ကိစ္စတွေလည်း ပါဝင်တယ်” ဟု သတင်းရင်းမြစ်တစ်ခုက ပြောသည်။
တွေ့ဆုံမှုနှင့် ပတ်သက်ပြီး နှစ်ဖက်စလုံးက သတင်းထုတ်ပြန်ခြင်း မရှိသလို၊ ဆွေးနွေးမှု ရလဒ်များကိုလည်း အသေးစိတ် စုံစမ်း၍ မရသေးပေ။
အခြား စစ်ရေးသတင်းရင်းမြစ်တစ်ခုကမူ ရှမ်းပြည်အရှေ့ပိုင်းရှိ မိုင်းဆတ် စကခ ၁၄ နှင့် မိုင်းဖြတ် စကခ ၁၈ တပ်များ ပြန်လည်စုဖွဲ့နေမှု၊ ကြည်းဒီချုပ် ရှမ်းပြည်အရှေ့ပိုင်းသို့ လာရောက်ခဲ့မှု၊ RCSS တပ်များ၏ လှုပ်ရှားမှုနှင့် UWSA တပ်များ ကျားဖြန့်အကြောင်းပြကာ မိုင်းလားအထိ လှုပ်ရှားလာမှုများသည် သတိထားရမည့် ဖြစ်စဉ်များ ဖြစ်သည်ဟု ထောက်ပြသည်။
“ရှမ်းပြည်အရှေ့ပိုင်းမှာ အင်အားတွေ စုဖွဲ့လာတာဟာ တပ်တွေ နားတယ်လို့ အကြောင်းပြပေမဲ့ စစ်ရေးသဘောအရတော့ အင်အားဖြည့်တင်းတာပဲ။ အခု ‘ဝ’ တောင်ပိုင်း ၁၇၁ ဘက်ကို စောင့်ကြည့်ရမယ်။ အဲဒီဘက်က တပ်တွေ လှုပ်ရှားလာရင် ရှမ်းပြည်အရှေ့ပိုင်း စစ်ရေးအခြေအနေကို သတိထားဖို့ လိုလာလိမ့်မယ်” ဟု စစ်ရေးအကဲခတ်တစ်ဦးက သုံးသပ်သည်။
လက်ရှိတွင် ရှမ်းပြည်မြောက်ပိုင်းရှိ စစ်ကောင်စီ၊ UWSA၊ MNDAA၊ TNLA နှင့် SSPP အဖွဲ့များအပြင် ရှမ်းပြည်အရှေ့ပိုင်းရှိ စစ်ကောင်စီ၊ UWSA နှင့် RCSS တို့၏ အခြေအနေများမှာ စစ်ရေးအရ ထူးခြားမှုများ ရှိလာနိုင်ကြောင်း လေ့လာသူများက သုံးသပ်နေကြသည်။
#MeKongNews
#လားရှိုး
#ဆင်နှစ်ကောင်ဟိုတယ်
#စစ်ကောင်စီ
#ကိုးကန့်တပ်ဖွဲ့
