မဲခေါင်၊ ဧပြီ ၇
စစ်ကောင်စီက ရက် ၁၀၀ စီမံကိန်းအဖြစ် ရှမ်းမြောက်၊ ပြည်ထောင်စုလမ်းမကြီးနှင့် နမ့်လမ် – သီပေါလမ်းတွင် တရုတ်ထုတ် ကုန်စည်များကို ဖမ်းဆီးနေသဖြင့် ကုန်စည်တင်ပို့သည့် လုပ်ငန်းများ ရပ်ဆိုင်းထားရသည်ဟု လုပ်ငန်းရှင်များက ပြောသည်။
မေ ၁ ရက်မှ စတင်ကာ လားရှိုး – သီပေါ – နမ့်လမ် – မိုင်းကိုင် – ကျောက်ဂူ စသည့် လမ်းများပေါ်တွင် တရုတ်ကုန်စည် တင်ဆောင်လာသည့် ကားများကို စစ်ကောင်စီက စစ်ဆေးရေး တင်းကျပ်ကာ ဖမ်းဆီးမှုများ ပြုလုပ်လာခဲ့သည်။
“အခု တရုတ်ကုန်စည်တွေကို လက်ခံပို့ပေးတာတွေကို အကုန်ရပ်နားထားပါတယ်ရှင့်။ လားရှိုး – မန္တလေး အော်ဒါကိုလည်း အခု ရပ်နားထားတယ်။ ရက် ၁၀၀ စီမံကိန်းနဲ့ ဖမ်းနေလို့ ဘယ်ဂိတ်မှ ပစ္စည်းတင်လို့လည်း မရလို့ အကုန်ရပ်နားထားရတယ်ရှင့်”ဟု လားရှိုးလုပ်ငန်းရှင်တစ်ဦးက ပြောသည်။
တရုတ်နိုင်ငံမှ တင်သွင်းလာသည့် စိုက်ပျိုးရေးထွက်ကုန်များ၊ အိမ်သုံးကုန်ပစ္စည်းများ၊ လူသုံးကုန်ပစ္စည်းများ၊ စားသောက်ကုန်ပစ္စည်းများ၊ ဆောက်လုပ်ရေးပစ္စည်းများအပြင် အဝတ်အစားများကအစ စစ်ကောင်စီ စစ်ဆေးရေးဂိတ်တွင် ဖမ်းဆီးနေခြင်းဖြစ်သည်။
“အခုက စစ်ကောင်စီဂိတ်ကနေ ဖမ်းတာ၊ အခြားအဖွဲ့က ဖမ်းတာတော့ မရှိဘူး။ တရုတ်ပစ္စည်း အကုန်လုံး သိမ်းနေတာ၊ အဝတ်အစား မုန့်ကအစ မီးဖိုးချောင်သုံးပစ္စည်းအဆုံး ဖမ်းတယ်။ တခြားတင်လို့ရတဲ့ ပစ္စည်းတွေကျတော့လည်း တန်ဆာခက ဈေးကြီးတယ်”ဟု လားရှိုး သတင်းရင်းမြစ်တစ်ဦးကပြောသည်။
စစ်ကောင်စီ ယင်းကဲ့သို့ တရုတ်ကုန်စည်များကို တင်းကျပ်စွာ စစ်ဆေး ဖမ်းဆီးလာခြင်းကြောင့် ပြည်တွင်းတွင် ရောက်ရှိပြီးသည့် တရုတ်ကုန်စည်များ ဈေးနှုန်း မြင့်တက်လာနိုင်သည်ဟုလည်း ကုန်သည်တစ်ဦးက ပြောသည်။
ရှမ်းမြောက် နယ်စပ်အသီးသီးမှ ဝင်ရောက်လာကြသည့် တရုတ်ကုန်စည်များသည် လမ်းတလျောက်ရှိ စစ်ကောင်စီနှင့် လက်နက်ကိုင်တပ်ဖွဲ့များ၏ ဂိတ်များစွာကို ဖြတ်ကျော်ပြီး လားရှိုးမှတစ်ဆင့် နိုင်ငံအနှံ့အပြားသို့ ထပ်မံ ဖြန့်ချိကြသည်။
MeKongNews
#ရှမ်းမြောက်
#တရုတ်ကုန်စည်
#တင်ပို့
#လုပ်ငန်းများ
#ရပ်ဆိုင်း
ဓာတ်ပုံ – ပုံဟောင်း
