မဲခေါင်၊ မေ ၃
ဆိုမာလီယာ ပင်လယ်ဓားပြများသည် ယီမင်နိုင်ငံကမ်းလွန်တွင် ရေနံတင်သင်္ဘောတစ်စီးကို အနုကြမ်းစီး၍ သိမ်းပိုက်ခဲ့ကြကြောင်း ဆိုမာလီယာ လုံခြုံရေး အရာရှိအများအပြားက ဘီဘီစီအား ပြောကြသည်။
MT Eureka သင်္ဘော အနုကြမ်းစီး သိမ်းပိုက်ခံခဲ့ရပြီး ဆိုမာလီယာသို့ ဦးတည်နေကြောင်း ယီမင်ကမ်းရိုးတန်းအစောင့်တပ်ဖွဲ့က ပြောသည်။
ကာနာ ဆိပ်ကမ်းအနီး အေဒင်ပင်လယ်ကွေ့တွင် ပင်လယ်ဓားပြများနှင့် ပြည့်နှက်နေကြောင်း သတင်းရင်းမြစ်များက ပြောကြားကြသည်။
ပင်လယ်ဓားပြများသည် အေဒင်ပင်လယ်ကွေ့တွင် တည်ရှိသော ကန်ဒါလာဟူသော ဝေးလံသည့် ပင်လယ်ကမ်းခြေမြို့နယ်လေးမှ ထွက်ခွာသွားခဲ့ကြကြောင်း တစ်စိတ်တစ်ပိုင်း ကိုယ်ပိုင်အုပ်ချုပ်ခွင့်ရ ပန့်လန်းဒေသမှ ဘီဘီစီနှင့် စကားပြောခဲ့သော လုံခြုံရေးအရာရှိများက ပြောပြကြသည်။
ယင်းမှာ ၁၀ ရက်အတွင်း ဒုတိ ယရေနံတင်သင်္ဘောတစ်စီး ဖမ်းဆီး သိမ်းပိုက်ခံခဲ့ရခြင်းဖြစ်ကာ Honor 25 ဟု ခေါ်သော ရေနံတင်သင်္ဘောကိုလည်း ဧပြီ ၂၂ ရက်တွင် ဆိုမာလီယာ ပင်လယ်ဓားပြများက ဖမ်းဆီးခေါ်ဆောင်သွားခဲ့ကြကြောင်း သိရသည်။
Honor 25 သည် ဆိုမာလီယာမြို့တော် မိုဂါဒစ်ရှူးသို့ ရေနံစိမ်းစည်ပေါင်း ၁၈၅၀၀ သယ်ဆောင်သွားခဲ့ကြောင်း သိရသည်။
တိုဂိုနိုင်ငံ အလံတင်ထားသော MT Eureka သည် ယမန်နေ့နံနက် ၅ နာရီတွင် ပြန်ပေးဆွဲခံခဲ့ရပြီး အေဒင်ပင်လယ်ကွေ့မှတစ်ဆင့် ဆိုမာလီယာနိုင်ငံသို့ ခေါ်ဆောင်ခံခဲ့ရကြောင်း လုံခြုံရေးအရာရှိများက ပြောသည်။
ဆိုမာလီယာနိုင်ငံသည် အာဖရိက၏ ကမ်းရိုးတန်းတွင် ကီလိုမီတာ ၃၃၃၃ ကို ပိုင်ဆိုင်ပြီး အာဖရိကတွင် အရှည်လျားဆုံး ကမ်းရိုးတန်းကို ပိုင်ဆိုင်ထားသည်။
ယခု ပြန်ပေးဆွဲမှုသည် သီတင်း ၂ ပတ်အတွင်း ၄ ကြိမ်မြောက် အောင်မြင်သော ပြန်ပေးဆွဲမှု ဖြစ်ကြောင်း သတင်းက ဖော်ပြသည်။
ဆိုမာလီယာရေပြင်တွင် ပြန်ပေးဆွဲမှုများကို တိုက်ဖျက်ရေး လုပ်ဆောင်နေသည့် ဆိုမာလီအာဏာပိုင်များ နှင့် အီးယူရေတပ်- EUNAVFOR တို့က ယခုနောက်ဆုံးပြန်ပေးဆွဲမှုနှင့် ပတ်သက်၍ ပြောဆို အရေးယူခြင်း မရှိသေးကြောင်း သိရသည်။
အေးကျော်
Ref:BBC
#MeKongNews
#ယီမင်ကမ်းလွန်
#ရေနံတင်သင်္ဘော
#ဆိုမာလီယာဓားပြများ
#ပြန်ပေးဆွဲ
