မဲခေါင်၊ ဧပြီ ၃၀
ယူကရိန်းရေတပ်သည် သိမ်းပိုက်ခံ ခရိုင်းမီးယားဒေသရှိ ကာ့ချ်တံတားကို စောင့်ကြပ်နေသော ရုရှားရေယာဉ်များကို ယနေ့ ဧပြီလ ၃၀ ရက်၊ ကြာသပတေးနေ့ အစောပိုင်းတွင် တိုက်ခိုက်ခဲ့ကြောင်း သိရသည်။
“ယူကရိန်းရေတပ်၏ အင်အားစုများနှင့် လက်နက်ကိရိယာများသည် ကာ့ချ်ရေလက်ကြားအတွင်းရှိ ရုရှားရေတပ် တပ်ဖွဲ့ဝင်များကို ထိခိုက်ပျက်စီးမှုများ ဖြစ်ပေါ်စေခဲ့သည်” ဟု ယူကရိန်းရေတပ်က ၎င်းတို့၏ တီလီဂရမ် လူမှုကွန်ရက်စာမျက်နှာမှတစ်ဆင့် ထုတ်ပြန်ရာတွင် ဖော်ပြထားသည်။
ယင်းထုတ်ပြန်ချက်အရ တိုက်ခိုက်မှုအတွင်း ရုရှားဖက်ဒရယ်လုံခြုံရေးအဖွဲ့ (FSB) ၏ ကင်းလှည့်ရေယာဉ် ဆိုဘိုလ် နှင့် ဟန့်တားရေးရေယာဉ် ဂရာချိုနော့တို့ ထိမှန် ပျက်စီးခဲ့ကြောင်း သိရှိရသည်။
“ယင်းတိုက်ခိုက်မှုကြောင့် ရန်သူ့ဘက်တွင် ပြန်လည်ကုစား၍ မရနိုင်သော အသေအပျောက်များနှင့် ထိခိုက်ဒဏ်ရာရမှုများ ရှိခဲ့သည်” ဟု ထုတ်ပြန်ချက်တွင် ဆက်လက် ဖော်ပြထားသည်။
၎င်းရေယာဉ်များသည် FSB နယ်ခြားစောင့်တပ်ဖွဲ့နှင့် ရုရှားရေတပ်တို့၏ ကမ်းခြေစောင့်တပ်ဖွဲ့တွင် အဓိကကျသော ယူနစ်များဖြစ်ပြီး၊ ကာ့ချ်တံတားကို စောင့်ကြပ်ရန်နှင့် အဖျက်အမှောင့်လုပ်ငန်းများကို တားဆီးရန်အတွက် အသုံးပြုနေခြင်းဖြစ်ကြောင်း ယူကရိန်းရေတပ်က ဆိုသည်။
“ဒါဟာ ယူကရိန်းရေတပ်ရဲ့ ထိရောက်တဲ့ လုပ်ဆောင်ချက်ဖြစ်သလို ပင်လယ်နက်အတွင်း ရန်သူ့ရဲ့ စွမ်းဆောင်ရည်တွေကို အစဉ်တစိုက် လျှော့ချနေနိုင်တယ်ဆိုတဲ့ နောက်ထပ် သာဓကတစ်ခုပါပဲ” ဟု ထုတ်ပြန်ချက်တွင် ဖော်ပြထားသည်။
ယူကရိန်းရေတပ်မှ ထုတ်ပြန်သည့် ဗီဒီယိုအတိုတစ်ခုတွင် ရေတပ်သုံး ဒရုန်းများဖြင့် တိုက်ခိုက်နေသည့် အခိုက်အတန့်ကို တွေ့မြင်ရသော်လည်း ယင်းရုပ်သံမှတ်တမ်း၏ အချိန်နှင့် တည်နေရာကိုမူ သီးခြားအတည်ပြုနိုင်ခြင်း မရှိသေးကြောင်း Kyiv Post က ဖော်ပြထားသည်။
ယူကရိန်းစစ်ဦးစီးချုပ်ရုံး၏ သတင်းထုတ်ပြန်ချက်အရ ယူကရိန်းရေတပ်သည် ဧပြီ ၂၉ ရက်က တူအပ်ဆဲ အနီးတွင် ပိတ်ဆို့အရေးယူခံထားရသည့် မားကွစ် ရေနံတင်သင်္ဘောကို ရေတပ်သုံးဒရုန်းများဖြင့် တိုက်ခိုက်ခဲ့ကြောင်း သိရသည်။
တန်ချိန် ၃၇၀၀၀ ကျော် တင်ဆောင်နိုင်သော ယင်းကင်မရွန်းနိုင်ငံအလံတင် သင်္ဘောသည် ရုရှားနိုင်ငံ တူအပ်ဆဲမြို့မှ ကီလိုမီတာ ၂၁၀ (၁၃၀ မိုင်) ခန့်အကွာတွင် ကုန်ပစ္စည်း တင်ဆောင်ထားခြင်း မရှိဘဲ ကျောက်ချ ရပ်နားထားခြင်း ဖြစ်သည်။
တိုက်ခိုက်ခံရချိန်တွင် ၎င်းသင်္ဘောသည် အလိုအလျောက် သင်္ဘောခြေရာခံစနစ် (AIS) ကို ပိတ်ထားခဲ့ပြီး သင်္ဘောအချင်းချင်း ကုန်စည်လွှဲပြောင်းရန် စောင့်ဆိုင်းနေပုံ ရသည်ဟုလည်း သတင်းက ဆိုသည်။
တိုက်ခိုက်မှုသည် သင်္ဘောအမြီးပိုင်းကို ထိမှန်ခဲ့ရာ ပန်ကာနှင့် အင်ဂျင်ခန်းဧရိယာတွင် ပေါက်ကွဲမှု ဖြစ်ပွားခဲ့ပြီး လက်ရှိတွင် ပျက်စီးဆုံးရှုံးမှု အခြေအနေကို ဆက်လက် ဆန်းစစ်နေဆဲ ဖြစ်ကြောင်း သိရသည်။
ထို့ပြင် ဧပြီလ အစောပိုင်းတွင်လည်း ယူကရိန်းစစ်ဘက် ထောက်လှမ်းရေးဌာန (HUR) ၏ အထူးတပ်ဖွဲ့များသည် ကာ့ချ်ရေလက်ကြားတွင်ရှိသော ရုရှား၏ နောက်ဆုံးကျန်ရှိသည့် ရထားတင်ကူးတို့သင်္ဘော ဆလဗ်ယာနင် ကို ဖျက်ဆီးနိုင်ခဲ့ကြောင်း သတင်းထုတ်ပြန်ခဲ့သည်။
HUR ၏ ပြောကြားချက်အရ ယင်းသင်္ဘောသည် သိမ်းပိုက်ခံ ခရိုင်းမီးယားရှိ ရုရှားတပ်ဖွဲ့များအတွက် လောင်စာဆီ၊ လက်နက်ခဲယမ်းနှင့် စစ်ဘက်ဆိုင်ရာ အသုံးအဆောင်ပစ္စည်းများကို ထောက်ပံ့ ပို့ဆောင်ပေးနေသည့် ရုရှား၏ ကာ့ချ်ကူးတို့လမ်းကြောင်းတွင် အဓိကကျသော သင်္ဘောတစ်စင်း ဖြစ်ကြောင်း သိရသည်။
ယင်းတိုက်ခိုက်မှုကို ဧပြီ ၆ ရက် အစောပိုင်းတွင် လုပ်ဆောင်ခဲ့ခြင်းဖြစ်ပြီး HUR ၏ လှုပ်ရှားမှုဌာနက ဒရုန်းများ အသုံးပြုကာ ကူးတို့သင်္ဘောကို အသုံးမပြုနိုင်အောင် လုပ်ဆောင်ခဲ့ခြင်းဖြစ်သည်။
၎င်းသင်္ဘောသည် ယခုတစ်ကြိမ်သာ တိုက်ခိုက်ခံရခြင်း မဟုတ်ဘဲ ပြီးခဲ့သည့် မတ်လအတွင်းက လုပ်ဆောင်ခဲ့သော စစ်ဆင်ရေးတစ်ခုတွင်လည်း ထိခိုက် ပျက်စီးခဲ့ဖူးသော်လည်း နစ်မြုပ်သွားခြင်း မရှိဘဲ ဆက်လက် ရှိနေခဲ့ခြင်း ဖြစ်သည်။
ထို့ပြင် ပြီးခဲ့သည့် ၂၀၂၄ ခုနှစ်၊ ဇူလိုင်လ ၂၃ ရက်ကလည်း ယူကရိန်းရေတပ်သည် အခြားသော စစ်ဘက်ဆိုင်ရာယူနစ်များနှင့် ပူးပေါင်းကာ ရုရှားနိုင်ငံ၊ ကော့ကပ်စ်ဆိပ်ကမ်း၌ ယင်းကူးတို့သင်္ဘောကို တိုက်ခိုက်ခဲ့ဖူးပြီး ထိုစဉ်က တိုက်ရိုက်ထိမှန်မှု အများအပြား ရှိခဲ့ကြောင်း သိရသည်။
Ref: Kyive Post
#MeKongNews
#ကာ့ချ်တံတား
#ရုရှား
#စစ်သင်္ဘော
#ယူကရိန်း
#တိုက်ခိုက်
