မဲခေါင်၊ ဧပြီ ၂၉
နှစ်ပေါင်း ၅၀ ကျော်ကြာခဲ့ပြီးနောက် ရေနံထုတ်လုပ်တင်ပို့ရောင်းချသော နိုင်ငံများအဖွဲ့- OPEC မှ မေ ၁ ရက်မှ စ၍ နုတ်ထွက်တော့မည်ဟု ယူအေအီးနိုင်ငံက ယမန်နေ့က ပြောကြားခဲ့ရာ ကြီးမားသော ရေနံထုတ်လုပ်သူများဖြင့် ဖွဲ့စည်းထားသော ဩဇာကြီးမားသည့် အဖွဲ့အတွက် ထိုးနှက်ချက်တစ်ရပ် ဖြစ်လာသည်။
ယူအေအီးနိုင်ငံသည် အိုပက်အဖွဲ့၏ တတိယအကြီးဆုံး ရေနံထုတ်လုပ်သူ ဖြစ်သောကြောင့်လည်း ၎င်းနုတ်ထွက်သွားခြင်းကြောင့် ရေနံထုတ်လုပ်မှု နှင့် ဈေးနှုန်းကို ထိန်းချုပ်ရန် ပိုမိုခက်ခဲသွားမည် ဖြစ်သည်။
အိုပက်အဖွဲ့၏ ဈေးကွက်စီမံခန့်ခွဲရေး မဟာဗျူဟာအရ ထုတ်လုပ်မှုများ အချိုးကျ ကန့်သတ်ထားခြင်းကို အတိတ်ကာလတွင် မကျေမနပ် ဖြစ်ခဲ့သော်လည်း အဖွဲ့မှနုတ်ထွက်ခြင်းမှာ အံ့အားသင့်စရာ ဖြစ်ခဲ့သည်။
အလယ်အလတ်ကာလနှင့် ရေရှည်အတွက် လောင်စာဝယ်လိုအား မြင့်တက်နေခြင်းကို ယူအေအီးက ထောက်ပြခဲ့သည်။
၎င်းတို့၏ ဆုံးဖြတ်ချက်သည် ပြည်တွင်းစွမ်းအင် ထုတ်လုပ်မှုလုပ်ငန်းအပေါ် တိုးမြှင့်ရင်းနှီးမြုပ်နှံခြင်း အပါအဝင် ယူအေအီးနိုင်ငံ၏ မဟာဗျူဟာမြောက်နှင့် စီးပွားရေးဆိုင်ရာ မျှော်မှန်းချက်နှင့် ပြောင်းလဲလာသော စွမ်းအင်ကဏ္ဍကို ထင်ဟပ်နေကြောင်း ယူအေအီး စွမ်းအင်ဝန်ကြီးဌာနက ပြောကြားသည်။
ကမ္ဘာ့စွမ်းအင် ဈေးကွက်များတွင် တာဝန်ယူမှုရှိသော၊ ယုံကြည်စိတ်ချရသော၊ ရှေ့သို့မျှော်မှန်းသော အခန်းကဏ္ဍအတွက် ယူအေအီးနိုင်ငံ၏ ပိုင်းဖြတ်မှုကို ယခုလုပ်ရပ်က အားဖြည့်ပေးလိုက်သည်ဟုလည်း ယူအေအီးက ထုတ်ပြန် ပြောကြားသည်။
ဈေးကွက်တည်ငြိမ်ရေးကို ဆက်လက် အာရုံစိုက်သွားမည်ဟုလည်း ၎င်းတို့က သန္နိဌာန်ပြုသည်။
အီရန်စစ်ပွဲ မတိုင်မီတွင် ယူအေအီးက တစ်နေ့လျှင် ရေနံစည်ပေါင်း ၃ သန်းအထိ ထုတ်လုပ်ခဲ့သော်လည်း စစ်ပွဲကြောင့် ထုတ်လုပ်မှုများ လျှော့ချထားရသည်။
ယူအေအီးက တစ်နေ့လျှင် ရေနံစည်ပေါင်း ၄ ဒသမ ၈ သန်းအထိ ထုတ်လုပ်နိုင်ပြီး ဆက်လက်၍လည်း ထုတ်လုပ်နိုင်စွမ်းကို တိုးချဲ့နေသည်။
“ဒါဟာ မူဝါဒဆိုင်ရာ ဆုံးဖြတ်ချက် ဖြစ်ပါတယ်။ ထုတ်လုပ်မှုအဆင့်နဲ့ ပတ်သက်ပြီး လက်ရှိနဲ့ အနာဂါတ် မူဝါဒတွေကို သေသေချာချာ သုံးသပ်ပြီးနောက် လုပ်ဆောင်ခဲ့တာ ဖြစ်ပါတယ်” ဟု ယူအေအီးစွမ်းအင်ဝန်ကြီး ဆူဟေးလ်မိုဟာမက် အယ်လ်အာဇူအီ က ရိုက်တာသတင်းဌာနကို ပြောကြားသည်။
အေးကျော်
Ref: Axios/ Reuters
#MeKongNews
#ရေနံထုတ်လုပ်မှု
#တိုးမြှင့်
#အိုပက်အဖွဲ့
#ယူအေအီး
