မဲခေါင်၊ ဧပြီ ၂၄
ထိုင်းနိုင်ငံမြောက်ပိုင်း၊ ဖယောင်းခရိုင်ရှိ ငှားရမ်းထားသော နေအိမ်တစ်လုံးအတွင်း ပုန်းအောင်းနေသည့် အထောက်အထားမဲ့ မြန်မာ ရွှေ့ပြောင်းအလုပ်သမား ၆၃ ဦးကို တာဝန်ရှိသူများက ဖမ်းဆီး ထိန်းသိမ်းလိုက်ကြောင်း သိရသည်။
ဒေသတွင်း ရဲတပ်ဖွဲ့၏ ကနဦး ဖမ်းဆီးမိမှုများမှတစ်ဆင့် လူမှောင်ခိုဂိုဏ်းကြီးတစ်ခုနှင့် ဆက်နွှယ်နေသည့် သဲလွန်စများ ရရှိခဲ့ပြီးနောက်၊ ယမန်နေ့ မွန်းလွဲ ၃ နာရီခွဲတွင် မူအန်းခရိုင်၊ မယ်တမ်တိုက်နယ်ရှိ ယင်းနေအိမ်ကို ဝင်ရောက်စီးနင်းခဲ့ခြင်းဖြစ်သည်။
ဖယောင်းခရိုင် အုပ်ချုပ်ရေးမှူး ဦးဆောင်သော ယင်းစစ်ဆင်ရေးတွင် ခရိုင်ရဲတပ်ဖွဲ့၊ လူဝင်မှုကြီးကြပ်ရေး၊ အလုပ်သမားညွှန်ကြားမှုဦးစီးဌာနနှင့် ပြည်တွင်း လုံခြုံရေးတပ်ဖွဲ့များ ပူးပေါင်းပါဝင်ခဲ့ကြသည်။
တာဝန်ရှိသူများသည် ယခုဖြစ်စဉ်တွင် အဓမ္မခိုင်းစေမှုနှင့် လူကုန်ကူးမှုဆိုင်ရာ ဆက်နွှယ်မှုများ ရှိ၊ မရှိကိုပါ အသေးစိတ် စစ်ဆေးလျက်ရှိသည်။
ဖမ်းဆီးရမိသူများထဲတွင် ပအိုဝ်း၊ ရှမ်းနှင့် ကရင်အပါအဝင် တိုင်းရင်းသားမျိုးနွယ်စုဝင် အမျိုးသား ၃၃ ဦးနှင့် အမျိုးသမီး ၃၀ ဦး ပါဝင်ပြီး၊ ၎င်းတို့အနက် ၃ ဦးမှာ အသက် ၁၈ နှစ်မပြည့်သေးသည့် အရွယ်မရောက်သေးသူများ ဖြစ်ကြောင်း သိရသည်။
မူလ စစ်ဆေးမေးမြန်းချက်များအရသည် ၎င်းတိုသည် ချင်းရိုင်ခရိုင်၊ မယ်ဆိုင်လမ်းကြောင်းမှတစ်ဆင့် ထိုင်းနိုင်ငံအတွင်းသို့ တရားမဝင် ဝင်ရောက်လာခြင်းဖြစ်ပြီး ဆမ်နှင့် ပမ်းလ် ဟု အမည်ရသည့် ပွဲစားများက ကူညီဆောင်ရွက်ပေးခဲ့ခြင်း ဖြစ်ကြောင်း သိရသည်။
၎င်းတို့ကို ဗင်ကားများ၊ ကိုယ်ပိုင်ကားများဖြင့် အဆင့်ဆင့် သယ်ဆောင်လာခဲ့ခြင်းဖြစ်ကာ ဘန်ကောက်မြို့နှင့် ဖိစနုလောက်ခရိုင်ရှိ ရထားလမ်းအနီးတစ်ဝိုက်သို့ ဆက်လက်ထွက်ခွာရန် စောင့်ဆိုင်းနေစဉ်အတွင်း ယခုကဲ့သို့ ဖမ်းဆီးခံရခြင်းဖြစ်သည်။
အဖမ်းခံရသည့် ရွှေ့ပြောင်းလုပ်သားများ၏ ထွက်ဆိုချက်အရ ၎င်းတို့သည် ပွဲစားခအဖြစ် တစ်ဦးလျှင် ဘတ် ၈၅၀၀ မှ တစ်သောင်းအထိ ပေးဆောင်ခဲ့ရကြောင်း သိရသည်။
၎င်းတို့အနက် အချို့မှာ နယ်စပ်ဖြတ်ကျော်ခွင့်လက်မှတ် ကိုင်ဆောင်ထားသော်လည်း ထိုင်းနိုင်ငံ၏ ဥပဒေအရ တရားဝင် ဝင်ရောက်ခွင့် အထောက်အထားများ ပြည့်စုံခြင်း မရှိကြောင်း စစ်ဆေးတွေ့ရှိရသည်။
၎င်းတို့အား တရားမဝင် ဝင်ရောက်မှုဖြင့် အမှုဖွင့်ထားပြီး ဥပဒေအရ ဆက်လက် အရေးယူနိုင်ရန် ဖယောင်း ရဲစခန်းရှိ စုံစမ်းစစ်ဆေးရေး အရာရှိများထံ လွှဲပြောင်းပေးထားပြီး ဖြစ်သည်။
အသက်မပြည့်သေးသည့် ကလေးသူငယ် ၃ ဦးကိုမူ ခရိုင်ကလေးသူငယ်နှင့် မိသားစုစောင့်ရှောက်ရေးဂေဟာသို့ ပို့ဆောင်ထားသည်။
ကလေးသူငယ်များအား နေရပ်ပြန်မပို့မီ လူကုန်ကူးမှု၏ သားကောင်ဖြစ်ခဲ့ရခြင်း ရှိ၊ မရှိ အကာအကွယ်ပေးရေးဆိုင်ရာ ဆန်းစစ်ချက်များကို တာဝန်ရှိသူများက ဦးစွာ ဆောင်ရွက်သွားမည် ဖြစ်ကြောင်း သိရသည်။
Ref: Khaosod
#MeKongNews
#ထိုင်းမြောက်ပိုင်း
#ပုန်းအောင်း
#မြန်မာ
#ဖမ်းမိ
