မဲခေါင်၊ ဧပြီ ၂၁
ထိုင်း – မြန်မာနယ်စပ်ပြည်နယ်များဖြစ်သော မယ်ဟောင်ဆောင်၊ ချင်းမိုင်၊ ချင်းရိုင် နှင့် တာ့ခ် ပြည်နယ်မှ ဒေသအုပ်ချုပ်ရေးမှူးများအနေဖြင့် လုံခြုံရေးအစီအစဉ်များကို တင်းကျပ်ရန်၊ မြန်မာဘက်မှ ဆက်လက် ဖြစ်ပေါ်နေသော တိုက်ခိုက်မှုများကို အနီးကပ်စောင့်ကြည့်ရန် နှင့် ထိခိုက်ခဲ့သောဒေသခံများအား ၂၄ နာရီပတ်လုံး အကူအညီပေးရန် ထိုင်းပြည်ထဲရေးဝန်ကြီးဌာန၊ ဒေသန္တရအုပ်ချုပ်ရေးဦးစီးဌာနက အရေးပေါ် ထုတ်ပြန် ညွှန်ကြားလိုက်ကြောင်း သိရသည်။
မြန်မာဘက်တွင် မတည်မငြိမ်မှုများ ဆက်ရှိနေပြီး လက်နက်ကိုင်တိုက်ခိုက်မှုများက ထိုင်းနယ်စပ်ဧရိယာများထဲအထိ ရောက်ရှိလာခဲ့ပြီးနောက် အထက်ပါ အမိန့် ထွက်လာခဲ့ခြင်း ဖြစ်သည်။
၎င်းပြည်နယ် ၄ ခုတွင် လုံခြုံရေးအေဂျင်စီများ၊ ကျေးရွာအကြီးအကဲများ၊ ရပ်မိရပ်ဖများ၊ ဒေသခံ ပြည်သူ့စစ်များ၊ ကျေးရွာ လုံခြုံရေးအဖွဲ့များနှင့် အနီးကပ်ပူးပေါင်း ဆောင်ရွက်သွားကြရန် ခရိုင်အကြီးအကဲများကို ဦးစီးဌာနက ပြောကြားခဲ့ကာ အဓိကအရေးပေါ် အစီအစဉ် ၃ ခုကို ကိုင်တွယ်သွားကြရန် ညွှန်ကြားသည်။
ပထမဆုံးအချက် အနေဖြင့် ကင်းလှည့်မှုများ၊ မသင်္ကာသူများအား ရပ်တန့်စစ်ဆေးခြင်းကို တိုးမြှင့်သွားရန် ဦးစီးဌာနက ပြောကြားထားရာတွင် စစ်ဆေးရေးဂိတ်များ၊ စခန်းများ ထူထောင်ရန်၊ တရားဝင် နယ်စပ်လမ်းကြောင်းများအပြင် တရားမဝင် ဖြတ်သန်းသော လမ်းကြောင်းများကို လည်း စောင့်ကြည့်ပြီး မသင်္ကာဖွယ်ရာများ တွေ့ရှိခဲ့ပါက ဒေသအာဏာ ပိုင်များကို အချိန်နှင့်တပြေးညီ အကြောင်းကြားကြရန် ညွှန်ကြားထားသည်။
တိုက်ခိုက်မှုများကြောင့် ဒေသခံများ၏နေအိမ်နှင့် အဆောက်အဦးများ ထိခိုက်ပျက်စီးခဲ့ပါကလည်း ချက်ခြင်း ကူညီကယ်ဆယ်ရေး နှင့် ကနဦး အကူအညီပေးခြင်းများ လုပ်ဆောင်ရန်၊ ရေရှည်ပြန်လည် ထူထောင်ရေးအတွက်လည်း သက်ဆိုင်ရာ အစိုးရဌာနများနှင့် ချိတ်ဆက် လုပ်ဆောင်ကြရန် ဒုတိယအချက်တွင် ညွှန်ကြားထားကြောင်း သိရသည်။
ထိခိုက်ဒဏ်ရာရခြင်းများ၊ အသက်အန္တရာယ် ခြိမ်းခြောက်မှုများ နှင့် ကျန်းမာရေးကိစ္စများကို ဦးစားပေးဆောင်ရွက်ပြီး အရေးပေါ် အထောက်အပံ့များပေးရန် တတိယအချက်တွင် ပြောကြားသည်။
ခရိုင်ကျန်းမာရေးဌာနများ ၊ ဆေးရုံများ၊ ကျေးရွာကျန်းမာရေးပရဟိတလုပ်သားများနှင့် ပေါင်းစည်း၍ ပြည်သူ့ကျန်းမာရေး စောင့်ရှောက်မှုကို ထောက်ပံ့ပေးကြရန် ညွှန်ကြားချက်က ဆိုသည်။
ယင်းညွှန်ကြားချက်များမှာ နယ်စပ်တွင် နေထိုင်သူများအတွက် ငြိမ်းချမ်းမှု ဆက်ရှိပြီး ပြည်သူများအတွက် အမြင့်ဆုံးလုံခြုံမှုပေးနိုင်ရန် ရည်ရွယ်ထားသည်ဟု ထိုင်းပြည်ထဲရေးက ပြောကြားသည်။
အေးကျော်
Ref: The Nation
#MeKongNews
#မြန်မာ
#နယ်စပ်ပြည်နယ်
#လုံခြုံရေး
#ထိုင်းပြည်ထဲရေး
#အမိန့်ထုတ်
