မဲခေါင်၊ ဧပြီ ၂၀
ရှမ်းပြည်တောင်ပိုင်း၊ ကျောက်တစ်လုံးကြီးမြို့တွင် PNO ပြည်သူ့စစ်အဖွဲ့က စစ်အသုံးစရိတ်များ အပါအဝင် လူမှုရေးပွဲများအတွက် ကောက်ခံငွေများသည် ၆ လအတွင်း တစ်အိမ်ထောင် ၇ သိန်းကျော်အထိ ရှိလာပြီး ဒေသခံများအတွက် အခက်အခဲများ ဖြစ်ပေါ်နေကြောင်း သိရသည်။
ဒေသခံများ၏ ပြောကြားချက်အရ ကောက်ခံသည့်ငွေများတွင် စစ်ကောင်စီနှင့် ဆက်စပ်သည့် စစ်ရေးအသုံးစရိတ်များအပြင် နောင်ကားဘောလုံးပွဲနှင့် ပအိုဝ်းအမျိုးသားနေ့ကဲ့သို့ လူမှုရေးပွဲများ ကျင်းပရန်အတွက်လည်း ပါဝင်နေသည်။
ထိုကဲ့သို့ ဆက်တိုက် ကောက်ခံမှုများကြောင့် ဝင်ငွေနည်းပါးသည့် မိသားစုများအတွက် နေထိုင်ရေးနှင့် နေ့စဉ်အသုံးစရိတ်များကို ဖြည့်ဆည်းရန် ပိုမိုခက်ခဲလာကြောင်း ဒေသခံများက ဆိုသည်။
“၆ လအတွင်း ၇ သိန်းကျော် ပေးထားရတယ်။ အလုပ်မပြေလို့ ဝင်ငွေလည်းနည်းတဲ့အချိန်မှာ အတော်လေးပင်ပန်းတယ်။ အကြောင်းအမျိုးမျိုးနဲ့ ကောက်ခံတာတွေ များလာတော့ မခံနိုင်တော့ဘူး။ ခုက စစ်ကောင်စီအတွက် စစ်အသုံးစရိတ်ကိုပါ PNO က ကောက်ပေးနေတာကြောင့် အခက်အခဲ အရမ်းဖြစ်စေတယ်” ဟု ဒေသခံတစ်ဦးက မဲခေါင်သို့ ပြောသည်။
ဒေသခံများက ထိုကဲ့သို့ ကောက်ခံသည့် ဆက်ကြေးများကို မထည့်ပါက အကြမ်းဖက်အားပေးသည်ဟု စွပ်စွဲကာ ဖမ်းဆီးခြင်း၊ ရွာမှ နှင်ထုတ်ခြင်းနှင့် သာရေးနာရေး မကူညီမှုများ ပြုလုပ်မည်ဟု PNO ဘက်မှ ခြိမ်းခြောက်မှုများ ရှိနေသဖြင့် မဖြစ်မနေ ပေးဆောင်နေရကြောင်းလည်း ဆိုသည်။
ထို့ပြင် တောင်ကြီးမြို့နယ်၊ နောင်ကားကျေးရွာအုပ်စုအတွင်းတွင်လည်း အိမ်ခွန် တစ်အိမ်လျှင် ၅ သောင်းကျပ်နှင့် ပြည်သူ့စစ်စရိတ် တစ်အိမ်လျှင် ၂ သောင်းကျပ်ကို ဆက်လက် ကောက်ခံနေကြောင်း ဒေသခံများထံမှ သိရသည်။
ပအိုဝ်းအမျိုးသားအဖွဲ့ချုပ် – PNO သည် ရှမ်းပြည်တောင်ပိုင်းဒေသများတွင် လှုပ်ရှားခဲ့သော နိုင်ငံရေးနှင့် လုံခြုံရေးဆိုင်ရာ အင်အားတစ်ရပ်ဖြစ်ခဲ့ပြီး ၁၉၉၁ ခုနှစ်တွင် စစ်အစိုးရနှင့် အပစ်အခတ်ရပ်စဲရေး သဘောတူညီချက် လက်မှတ်ရေးထိုးခဲ့သည်။
ထို့နောက် ဒေသတွင်း လုံခြုံရေးနှင့် အုပ်ချုပ်ရေးကဏ္ဍများတွင် ပါဝင်လာကာ ပြည်သူ့စစ်အဖြစ် ဆက်လက် ရပ်တည်နေသည်။
#MeKongNews
#ကျောက်တစ်လုံးကြီးမြို့
#PNO
#ဆက်ကြေးကောက်
#တစ်အိမ်ထောင်
