မဲခေါင်၊ ဧပြီ ၁၆
တာချီလိတ်မြို့တွင် ဆိုင်ကယ်သူခိုးများ သောင်းကျန်းနေပြီး နေရာပြ GPS စနစ်နှင့် အချက်ပြ Alarm များ တပ်ဆင်ထားသည့် ဆိုင်ကယ်များကိုပါ ကျွမ်းကျင်စွာ ဖြုတ်ခိုးနိုင်သည့် သူခိုးများ ရှိလာနေကြောင်း သိရသည်။
ဧပြီလ ၁၄ ရက်၊ နံနက် ၇ နာရီဝန်းကျင်က တာချီလိတ်မြို့၊ ဝိန်းကျောက်ရပ်ကွက်ရှိ အိမ်ငှားဆောင်တစ်ခုတွင် အစောင့်များရှိနေသည့်ကြားမှ ဆိုင်ကယ်အများအပြားထဲတွင် ဝယ်ယူထားသည်မှာ မကြာသေးသည့် တန်ဖိုးကြီး ဆိုင်ကယ်တစ်စီးကို ရွေးချယ်ခိုးယူခံခဲ့ရခြင်း ဖြစ်ကြောင်း ရပ်ကွက်နေ ပြည်သူများထံမှ သိရသည်။
“အောက်ထပ်မှာ ဆိုင်ကယ်တွေ အများကြီးရှိတဲ့ထဲကမှ ရွေးခိုးသွားတာ။ ဘတ် ၆ သောင်းကျော် တန်ပါတယ်။ Alarm မြည်နေတာကို ခဏလေးနဲ့ ဖြုတ်နိုင်တာ CCTV မှာ တွေ့ရတယ်။ GPS က ကျိုင်းတုံဘက် ပြနေလို့ လိုက်သွားတာ GPS ကို ဖြုတ်လွှင့်ပစ်ခဲ့တာဆိုတော့ သူခိုးက အတော်ကျွမ်းတာ။ သေချာစောင့်ကြည့်ပြီးမှ ခိုးတာဖြစ်နိုင်လို့ ဘယ်အကာအကွယ်မှ မလုံခြုံတော့သလိုပဲ။ ရဲစခန်းတော့ တိုင်ထားပါတယ်” ဟု ဆိုင်ကယ်ခိုးခံရသူ၏ မိတ်ဆွေတစ်ဦးက ပြောသည်။
CCTV မှတ်တမ်းအရ ခိုးယူသူနှစ်ဦး၏ ပုံရိပ်များကို ပြတ်သားစွာ တွေ့ရှိရသော်လည်း ယခုအချိန်ထိ ဖမ်းဆီးရမိခြင်း မရှိသေးကြောင်း သိရသည်။
ထို့အတူ ဧပြီလ ၁၄ ရက်နေ့ကပင် တာချီလိတ် ပါလျံ (၂) ရပ်ကွက်ရှိ ဆိုင်ရှေ့တွင် ရပ်ထားသည့် ဆိုင်ကယ်တစ်စီးလည်း ထပ်မံခိုးယူခံခဲ့ရသည်။
ပြီးခဲ့သည့် ဧပြီလ ၁၃ ရက်နေ့ကလည်း ဟုံလုံဈေး အငှားဂိတ်အနီးတွင် ရပ်ထားသည့် ဆိုင်ကယ်တစ်စီး အခိုးခံခဲ့ရကြောင်း ဒေသခံများထံမှ သိရသည်။
တာချီလိတ်တွင် ဆိုင်ကယ်များ မကြာခဏ လုယက်ခိုးယူခံနေရသဖြင့် ပိုင်ရှင်များက နည်းပညာသုံး အကာအကွယ်များ ပြုလုပ်ထားသော်လည်း ယင်းတို့ကိုပါ ကျွမ်းကျင်စွာ ဖြုတ်ခိုးနိုင်သည့် သူခိုးများ ရှိလာနေခြင်းက ပြည်သူများ၏ လူမှုဘဝ လုံခြုံမှုမရှိခြင်းကို ပြဆိုနေသည်။
#MeKongNews
#တာချီလိတ်
#ဆိုင်ကယ်သူခိုး
#CCTV
#GPS
