မဲခေါင်၊ မတ် ၃၀
ရှမ်းပြည်မြောက်ပိုင်း၊ ကွတ်ခိုင်ပဋိပက္ခအတွင်းအသက်ရှင်လျက်ဖမ်းမိသည့် TNLA တပ်ဖွဲ့ဝင် ၃ ဦးကို MNDAA က ပစ်သတ်ပြီး မြေမြှုပ်ခဲ့ကြောင်း သတင်းရင်းမြစ်များထံမှ သိရသည်။
ဘန်ကာထဲ မြုပ်နှံခဲ့သည့် ယင်းရုပ်အလောင်းများကို တူးဖော်ရရှိသည့် ရုပ်သံဖိုင်အား သတင်းရင်းမြစ်တစ်ဦးက ယနေ့ မတ် ၃၀ရက်တွင် မဲခေါင်သို့ ပေးပို့လာသည်။
ယင်း TNLA တပ်ဖွဲ့ဝင် ၃ ဦးကို မတ် ၁၅ ရက်က ကွတ်ခိုင်မြို့အရှေ့ဘက်၊ တာမိုးညဲ၏ အရှေ့မြောက်ဘက်၊ နမ့်ဟူးရွာအရှေ့ဘက် စခန်း၌ MNDAA များက ဖမ်းဆီးရမိသည့် ရုပ်သံတွင် ကြိုးတုတ်ခံထားရပြီး အသက်ရှင်လျက် တွေ့ရသည်။
သို့ရာတွင် သေဆုံးသူများ၏ မိတ်ဆွေ၊ မိသားစုများက အစုလိုက် မြုပ်နှံထားသည့် ဘန်ကာကျင်းအတွင်းမှ ၎င်းတို့ရုပ်အလောင်းများကို မတ်၂၈ ရက်က ပြန်လည်တူးဖော် တွေ့ရှိခဲ့ကြောင်း သိရသည်။
“သူတို့မိသားစုတွေက မူဆယ်နားက ဆိုက်ခေါင်ရွာကလို့ သိရတယ်၊ သူတို့အလောင်းတွေကို ပထမရက်တွေထဲကရှာတာ မတွေ့ရဘူး။ တနေ့ကမှ တွေ့ရတာ၊ ခုလို ဖြစ်သလို မြုပ်နှံထားတဲ့အစား ကောင်း ကောင်းမွန်မွန် ပြန်သင်္ဂြိုဟ်ဖို့ မိသားစုတွေက လိုက်ရှာသယ်ယူတာပါ” ဟု ကွတ်ခိုင် ဂရုဏာအသင်းမှ လူမှုကူညီသူတစ်ဦးက ပြောသည်။
ယင်းကိစ္စနှင့်ပတ်သက်၍ MNDAA ရော TNLA ကပါ မည့်သို့မျှ ပြောဆိုခြင်း ယခုချိန်ထိ မတွေ့ရသေးပေ။
“လက်နက်ချဖမ်းမိ သုံ့ပန်းကို သတ်တာ စစ်ရာဇဝတ်မှု ကျူးလွန်တာပဲ၊ ပြီးတော့ သူတို့က အထက်အမိန့်အရ မတိုက်ပဲ လက်နက်ချတာလို့ ကြားတယ်။ ဒီအတိုင်း မှန်ရင်တော့ စစ်ရာဇဝတ်မှုပဲ၊ MNDAA က စစ်ကောင်စီသုံ့ပန်းတွေကျတော့ ထောင်ချီ လွှတ်ပေးခဲ့ပြီး ခုဘယ်လို ဖြစ်တာလည်းမသိ။ အောက်ခြေတပ်ဖွဲ့က လုပ်တာဆိုရင်လည်း အထက်က တာဝန်ယူပေးရမှာပဲ” ဟု စစ်ရေးလေ့လာသူတစ်ဦးက မဲခေါင်သို့ ပြောသည်။
ကွတ်ခိုင်မြို့ကို MNDAA တပ်မဟာ ၅၁၁ နှင့် ကျောက်မဲခရိုင် တပ်မဟာတို့က မတ် ၁၅ ရက်တွင် TNLA ထံမှ တိုက်ခိုက်သိမ်းပိုက်ခဲ့ခြင်း ဖြစ်သည်။
#MeKongNews
#ကွတ်ခိုင်မြို့
#တိုက်ပွဲအတွင်း
#အရှင်ဖမ်းမိ
#TNLA
#MNDAA
#သတ်ဖြတ်
