မဲခေါင်၊ မတ် ၂၅
ရှမ်းပြည်အရှေ့ပိုင်း၊ တာချီလိတ်မြို့၌ ဆိုင်ကယ်သူခိုးများ အုပ်စုလိုက် သောင်းကျန်းနေရာ ပြီးခဲ့သည့် ရက်ပိုင်းကလည်း ပါလျှံ (၂) ရပ်ကွက်တွင် ဆိုင်ကယ်ခိုးမှုတစ်ခု ဖြစ်ပွားခဲ့ပြီး သူခိုးများမှာ လူ ၃ ဦးပါဝင်သည့် အုပ်စုဖြစ်ကြောင်း ဒေသခံများထံမှ သိရသည်။
ပြီးခဲ့သည့် မတ် ၂၂ ရက်တွင် ယင်းခိုးမှု ဖြစ်ပွားခဲ့ပြီး သူခိုးများမှာ အုပ်စုလိုက် လှုပ်ရှားနေပြီး ယင်းရပ်ကွက်အတွင်း သောင်းကျန်းနေကြောင်းလည်း ဒေသခံများက ဆိုသည်။
“CCTV မှာလည်း တွေ့ရတယ်။ ဆိုင်ကယ်က ဝယ်ထားတာ တစ်လတောင် မပြည့်သေးပါဘူး၊ သံကြိုး ဖျက်ပြီးခိုးသွားတယ်၊ သော့ဖျက်တဲ့ ကတ်ကြေးပါထားခဲ့တာ။ အခုလို အုပ်စုလိုက် လုပ်နေတော့ စိုးရိမ်ရတယ်။ ” ဟု ဆိုင်ကယ်ပိုင်ရှင်နှင့် နီးစပ်သူတစ်ဦးက ပြောသည်။
ထို့ပြင် ဒေသခံများအဆိုအရ ခိုးယူသူများသည် ရပ်ကွက်အတွင်း လူများ၏ လှုပ်ရှားမှုများကို ကြိုတင် စောင့်ကြည့်ပြီးမှ ခိုးယူနေကြောင်းလည်း သိရသည်။
“ဆိုင်ကယ်ပျောက်တဲ့ချိန်က အပေါ်ထပ်မှာ လူတွေလည်းရှိတယ်။ ခေါင်းရင်း အိမ်က သီချင်းဖွင့်ထားတော့ မကြားလိုက်တာ၊ သံဖျက်သံလည်း မကြားလိုက်ဘူး။ ဒီသူခိုးအုပ်စုက သူများတွေလည်း တင်တဲ့ CCTV တိုင်းမှာ တွေ့ရပါတယ်၊ အဲကောင်တွေက တော်တော် သောင်ကျန်းနေတာပါ။ ကြာနေပါပြီ”ဟု ဒေသခံတစ်ဦးက ပြောသည်။
ယခုလို ဆိုင်ကယ်ခိုးမှုများ ဖြစ်ပွားလာမှုကြောင့် ဒေသခံများအနေဖြင့် လုံခြုံရေးအပေါ် စိုးရိမ်မှုများ မြင့်တက်လာပြီး ကိုယ်ပိုင်ပစ္စည်းများကို ပိုမိုသတိထား စောင့်ရှောက်ရန် လိုအပ်လာကြောင်း ဆိုကြသည်။
ပြီးခဲ့သည့် မတ်လ ပထမပတ်တွင်လည်း ရန်အောင်မြေရပ်ကွက်တွင် ဆိုင်ကယ် ၂ စီး တပြိုင်တည်း ခိုးယူခံမှုလည်း ရှိခဲ့ကြောင်း ဒေသခံများက ပြောသည်။
#MeKongNews
#တာချီလိတ်
#ဆိုင်ကယ်သူခိုး
#အုပ်စုလိုက်
#သောင်းကျန်း
