မဲခေါင်၊ မတ် ၂၁

ယခင်က မူးယစ်ဆေးဝါး ဖမ်းဆီးရရှိမှုများတွင် ပိုင်ရှင်မဲ့ဆိုသည့် စကားလုံးကို တွင်တွင်ကြားဖူးကြပေလိမ့်မည်။ တချို့သော ပိုင်ရှင်မဲ့မှုများသည့် အံအားသင့်လောက်စရာပင် ရှိသည်မို့ ရင်ဘတ်ဖိယူရသည်။ ယခုတော့ မူးယစ်ဆေးမှုတွင်ပင်မဟုတ် ကျားဖြန့်မှုများတွင်ပါ ပိုင်ရှင်မဲ့လာပြီဖြစ်သည်။

မတ်လ ၂၀ရက်တွင် စစ်ကောင်စီက မူဆယ်မြို့ရှိ မူဆယ်မြို့၊ ကောင်းမှုတုံရပ်ကွက်၊ တော်ရွက် ရပ်ကွက်နှင့် စွမ်စော် ရပ်ကွက်များအတွင်း ကျားဖြန့်ဖမ်းဆီးခဲ့ပြီး ကောင်းမှုတုံရပ်ကွက်၌သာ တရုတ်နိုင်ငံသား ၈၅ ဦးနှင့် ဆက်စပ်ပစ္စည်းများကို သိမ်းဆည်းရရှိခဲ့သည်။ တော်ရွက် ရပ်ကွက်နှင့် စွမ်စော်ရပ်ကွက်များတွင်မူ ကျားဖြန့်လုပ်ရာတွင် အသုံးပြုသည့် ဖုန်းနှင့် ကွန်ပြူတာများကိုသာ မိပြီး လူမမိခဲ့ပေ။

ယင်းသာမက မတ်လ ၂၀ရက်တွင်ပင် ရှမ်းပြည်တောင်ပိုင်း၊ လဲချားမြို့နယ်၊ ကောင်းစံကျေးရွာအနီးတစ်ဝိုက်တွင် စစ်ကောင်စီတပ်များ ကျားဖြန့်ဖမ်းဆီးရာ လူနေအဆောက်အဦများ၊ စတားလင့်စက်များ၊ ကွန်ပြူတာများနှင့် ပါဝါစတေရှင်များ အမြောက်အများဖမ်းဆီးရမိသော်လည်း လူတစ်ဦးမျှ မမိပေ။

ထို့ကြောင့် လက်ရှိတွင် မူးယစ်မှုများသာမက လူဦးရေ ဆယ်ဂဏန်း၊ ရာဂဏန်းဖြင့် လုပ်ကိုင်ရသည့် ကျားဖြန့်အမှုများတွင်ပါ လူမမိတော့ဘဲ ကျားဖြန့်ပစ္စည်းများကိုသာ ပိုင်ရှင်မဲ့ ဖမ်းမိလာသည့်အကြောင်း ထူးဆန်းသည့် သတင်းအား အယ်ဒီတာမှ စာဖတ်ပရိသတ်များအား မျှဝေအသိပေးခြင်းဖြစ်သည်။

#MeKongNews
#ကျားဖြန့်
#ပိုင်ရှင်မဲ့
#မူဆယ်
#လဲချား
#ထူးဆန်းပါပေ့သတင်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)