မဲခေါင်၊ မတ်လ ၁၉
တာချီလိတ်မြို့ ဆန်ဆိုင်း(ခ) ရပ်ကွက်အတွင်းရှိ FIN KTV ဆိုင်မှ ထွက်ပေါ်နေသော ဆူညံသံများကြောင့် အနီးဝန်းကျင်တွင် နေထိုင်သူများ အချိန်ရှည်ကြာစွာ ဆင်းရဲဒုက္ခ ကြုံတွေ့နေရကြောင်း ဒေသခံများက ပြောကြားသည်။
ဒေသခံများ၏ ပြောကြားချက်အရ ယင်း KTV မှ ဆူညံသံများသည် နေ့ညမပြတ် ထွက်ပေါ်နေပြီး အထူးသဖြင့် အဆောက်အဦအမိုးကို သွပ်ဖြင့် ဆောက်လုပ်ထားခြင်းကြောင့် အသံမလုံဘဲ အနီးဝန်းကျင်နေထိုင်သူများ ဆူညံသံများကို ခံစားနေရခြင်းဖြစ်ကြောင်း ဒေသခံတစ်ဦးက ပြောသည်။
“တစ်နေ့မှ မရပ်ဘူး၊ ၅နှစ် ၆ နှစ်လောက်ရှိနေပြီ။ နေ့တိုင်း စိတ်ဆင်းရဲရတယ်။ အသက်ကြီးသူတွေလည်းရှိ၊ လေဖြတ်လူနာတွေပါရှိတော့ နေထိုင်ရတာအဆင်မပြေဘူး” ဟု ၎င်းက မဲခေါင်သို့ ပြောသည်။
ဒေသခံများအနေဖြင့် ၂၀၂၄ ခုနှစ်ကတည်းက ရပ်ကွက်ရုံးနှင့် မြို့နယ်ရုံးများသို့ လက်မှတ်ရေးထိုးကာ အကြိမ်ကြိမ် တိုင်ကြားခဲ့သော်လည်း ထိရောက်သော အရေးယူမှုမရှိခဲ့ကြောင်း သိရသည်။
“လာတိုင်တဲ့သူ ၃၀ ကျော်ရှိပြီလို့ ရုံးကပြောတယ်။ ဒါပေမယ့် အဲဆိုင်ကို အရေးမယူနိုင်သေးဘူး။ လာတိုင်သူတွေကိုလည်း ရက်ကွက်ရုံးက လျှို့ဝှက်မှတ်တမ်းယူထားပါတယ်။ အဲဒီ KTVက အကြီးအကဲတစ်ယောက်ပါတယ်။ ငှာနဆိုင်ရာလူတွေပါတယ်။ အဆောက်ဦးမြေပိုင်ရှင်ပါတယ်။ ထိုင်းလူမျိုးပါတယ်။ အားလုံးရှယ်ယာ ၈ယောက်လို့သိရပါတယ်” ဟု ဒေသခံတစ်ဦးက ပြောသည်။
ယခင်ကလည်း တာဝန်ရှိသူများ လာရောက်စစ်ဆေးကာ သတိပေးခဲ့သော်လည်း တစ်ရက်၊ ၂ရက်သာ တိတ်ဆိတ်ပြီး နောက်တွင် ယခင်အတိုင်း ဆူမြဲသာဖြစ်ကြောင်း ဒေသခံများထံမှ သိရသည်။
“အဲဒီ KTV က ထိုင်းတွေအများဆုံးလာတယ်။ ထိုင်းတရားခံပြေးတွေ စားကျက်ပဲ” ဟု ဒေသခံတစ်ဦးက ပြောသည်။
ဒေသခံများအဆိုအရ ယင်း KTV လုပ်ငန်းတွင် အာဏာပိုင်များနှင့် ဆက်စပ်သူများ ပါဝင်နေကြောင်း သတင်းများလည်း ထွက်ပေါ်နေပြီး ထိုကြောင့် အရေးမယူနိုင်ခြင်း ဖြစ်နိုင်ကြောင်း ယူဆနေကြသည်။
ယခုကဲ့သို့ အချိန်ကြာမြင့်စွာ ဆူညံသံပြဿနာ ကြုံတွေ့နေရသည့်အတွက် သက်ဆိုင်ရာ တာဝန်ရှိသူများမှ ထိရောက်စွာ စစ်ဆေး၍ အသံလုံခြုံရေးစနစ်များ တပ်ဆင်ပေးရန်နှင့် လိုအပ်ပါက ဥပဒေအရ အရေးယူဆောင်ရွက်ပေးရန် ဒေသခံများက တောင်းဆိုထားသည်။
#MeKongNews
#တာချီလိတ်
#KTV
#ဆူညံသံ
#အာဏာပိုင်
