မဲခေါင်၊ မတ် ၁၆
ရှမ်းပြည်မြောက်ပိုင်းတွင် ကိုးကန့်တပ် – MNDAA က တအာင်းတပ် – TNLA စခန်းများကို စတင်တိုက်ခိုက်လာရာ ယနေ့နံနက်ပိုင်းတွင် နမ့်ဖတ်ကာနှင့် နမ့်ခမ်းကြားရှိ ၁၂ မိုင်ကုန်းကို ဒရုန်းများဖြင့် တိုက်ခိုက်နေကြောင်း ဒေသတွင်း သတင်းရင်းမြစ်များထံမှ သိရသည်။
ယမန်နေ့ မတ်လ ၁၅ ရက် ညနေပိုင်းက ကွတ်ခိုင်မြို့ကို MNDAA က အလုံးစုံနီးပါး ထိန်းချုပ်လိုက်ပြီးနောက် ယခုအခါ TNLA ထိန်းချုပ်ထားသည့် နမ့်ခမ်းမြို့ဘက်သို့ စစ်မီးဖြန့်ကျက်လာနေခြင်း ဖြစ်သည်။
“မနက်အစောကြီးကတည်းက ၁၂ မိုင်ဘက်မှာ ပေါက်ကွဲသံတွေ ကြားနေရတယ်။ နမ့်ခမ်းကို ကိုးကန့်တွေ တိုက်လာနိုင်တယ်။ နမ့်ခမ်းက TNLA ရဲ့ နယ်စပ်အသက်ရှူပေါက်ဖြစ်နေတော့ အဲဒီနေရာကို ကိုးကန့်က ရသွားရင် TNLA အတွက် အခြေအနေ မကောင်းနိုင်ဘူး” ဟု မူဆယ်ဒေသခံတစ်ဦးက မဲခေါင်သို့ ပြောသည်။
ကွတ်ခိုင်မြို့တွင် ယမန်နေ့ ညနေ ၇ နာရီဝန်းကျင်အထိ TNLA တပ်ဧရိယာနှင့် တပ်အနောက်ဘက်သို့ ဒရုန်းဗုံးများ ပစ်ချတိုက်ခိုက်မှုများ ရှိခဲ့သော်လည်း ရပ်ကွက်နေပြည်သူများမှာမူ လက်ရှိအချိန်အထိ ထိခိုက်မှု မရှိကြောင်း သိရသည်။
ညပိုင်းတွင် TNLA ၏ ကွတ်ခိုင်ကွပ်ကဲရေးဌာနချုပ်ကို MNDAA က သိမ်းယူနိုင်ခဲ့သဖြင့် TNLA တပ်ဖွဲ့ဝင်များသည် ဂါလိုင်ဘက်သို့ ဆုတ်ခွာသွားခဲ့ကြောင်း မြေပြင်သတင်းများအရ သိရသည်။
ယင်းတိုက်ပွဲများကြောင့် လားရှိုးမြို့သို့ ခရီးသည်တင်ယာဉ် ပြေးဆွဲမှုများ ရပ်တန့်နေသော်လည်း တရုတ်ကုန်တင်တွဲကားကြီးများမှာမူ သီပေါ ၉ မိုင်လမ်းခွဲမှတစ်ဆင့် ပုံမှန်အတိုင်း သွားလာနေဆဲဖြစ်ကြောင်း ခရီးသွားများက ပြောသည်။
“ကားတွေ အားလုံး ရပ်ထားရတယ်။ တိုက်ပွဲကြား ပိတ်မိနေတဲ့ကားတွေကို ကိုးကန့်ဘက်က ပြန်လွှတ်ပေးပေမဲ့ လမ်းကြောင်းအတက်အဆင်းကိုတော့ ခွင့်မပြုသေးဘူး။ ထိခိုက်မှာစိုးလို့ မလွှတ်သေးတာလို့ ပြောတယ်။ အခြေအနေငြိမ်မှဆိုရင် တစ်ပတ်လောက်တော့ ကြာနိုင်တယ်” ဟု ကားဂိတ်မှူးတစ်ဦးက ဆိုသည်။
TNLA ဘက်ကမူ ယမန်နေ့အထိ MNDAA ၏ တိုက်ခိုက်မှုများအပေါ် ပြန်လည်တုံ့ပြန်တိုက်ခိုက်ရန် အမိန့်မပေးသေးဘဲ စေ့စပ်ညှိနှိုင်းမှုများဖြင့်သာ ဖြေရှင်းသွားမည်ဟု ပြောကြားထားပါသည်။
#MeKongNews
#ကွတ်ခိုင်
#နမ့်ခမ်း
#MNDAA
#TNLA
#စစ်မီး
#ရှမ်းမြောက်
