မဲခေါင်၊ မတ် ၁၆
အီရန်နိုင်ငံ၏ ရေနံ နိုင်ငံခြားတင်ပို့မှု ၉၀ ရာခိုင်နှုန်းကို ကိုင်တွယ်နေသော ခါ့ဂ်ကျွန်းကို ထပ်မံ တိုက်ခိုက်သွားနိုင်ကြောင်း အမေရိကန်သမ္မတ ဒေါ်နယ်ထရမ့်က ခြိမ်းခြောက် ပြောဆိုလိုက်ချိန်မှာပင် ၎င်းတို့၏ လက်တုံ့ပြန်မှုများကို တိုးမြှင့်သွားမည်ဟု အီရန်ကလည်း ကြုံးဝါးခဲ့သဖြင့် သီတင်း ၃ ပတ်ကြာမြင့်လာသော စစ်ပွဲ အရှိန်ကျသွားမည့် လက္ခဏာ မတွေ့ရသေးပေ။
အမေရိကန်၏ တိုက်ခိုက်မှုများကြောင့် ခါ့ဂ်ကျွန်းမှ နေရာအများစု လုံးဝ ပျက်စီးသွားခဲ့ပြီဟု ထရမ့်က ပြောကြားပြီး တိုက်ခိုက်မှုများ ထပ်မံ လုပ်ဆောင်နိုင်ကြောင်း ဆက်ပြောသည်။
“အပျော်သဘောနဲ့ အဲဒီကျွန်းကို ကျနော်တို့ ထပ်ပြီး တိုက်ခိုက်သွားနိုင်ပါတယ်” ဟု ထရမ့်က NBC ရုပ်သံအား ပြောကြားသည်။
ရေတပ်၏ မိုင်း သိုလှောင်စခန်းများ၊ ဒုံးကျည်သိုလှောင် ဘန်ကာများနှင့် အခြားစစ်စခန်းများ အပါအဝင် ခါ့ဂ်ကျွန်းပေါ်မှ ပစ်မှတ်ပေါင်း ၉၀ ကျော်ကို ပစ်ခတ်ချေမှုန်းခဲ့သည်ဟု အမေရိကန်အလယ်ပိုင်း စစ်ဦးစီးချုပ်ရုံးက ပြောကြားသည်။
အီရန်ကမူ ခါ့ဂ်ကျွန်းပေါ်မှ ပျက်စီးမှုအတိုင်းအတာကို လျှော့ချပြောဆိုခဲ့သည်။
အီရန်၏ ပင်လယ်ကွေ့ကမ်းရိုးတန်းမှာ ၂၄ ကီလိုမီတာကွာဝေးသော ကျွန်းပေါ်မှ စစ်ရေးပစ်မှတ်များကိုသာ တိုက်ခိုက်ခဲ့ကြောင်း နှင့် ရေနံလုပ်ငန်းကို မထိခဲ့ကြောင်း အမေရိကန်ကလည်း ပြောကြားသည်။
ဟောမုဇ်ရေလက်ကြားကို အီရန်က ဆက်လက်ပိတ်ဆို့ထားခဲ့ပါက ခါ့ဂ်ကျွန်းပေါ်မှ ရေနံလုပ်ငန်းနေရာ ဌာနများကို ပစ်မှတ်ထားသွားနိုင်ကြောင်း ဒေါ်နယ်ထရမ့်က ယမန်နေ့တွင် ခြိမ်းခြောက်ခဲ့သေးသည်။
ယင်းနှင့်ပတ်သက်၍ စွမ်းအင်လုပ်ငန်း နေရာများအပေါ် တိုက်ခိုက်မှုမှန်သမျှကို အီရန်က လက်တုံ့ပြန်သွားမည်ဟု အီရန်နိုင်ငံခြားရေးဝန်ကြီး အဘတ်စ်အာရက်ချီက သန္နိဌာန်ပြုခဲ့ပြီး ယူအေအီးနိုင်ငံဆီသို့ ပဲ့ထိန်းဒုံးကျည် ၉ စင်းနှင့် ဒရုန်း ၃၃ စင်း ပစ်လွှတ်ခဲ့ကြောင်း အီရန်စစ်ဘက်က ယမန်နေ့တွင် ကြေညာခဲ့သည်။
ယင်းနှင့်အတူ ယူအေအီးနိုင်ငံ ဒူဘိုင်းမှ ဂျယ်ဘယ်အလီ ဆိပ်ကမ်း၊ အဘူဒါဘီဒေသ ခါလီဖာဆိပ်ကမ်း နှင့် ဖူဂျိုင်ရားရေနံလုပ်ငန်း ဆိပ်ကမ်းအနီး နေထိုင်သူများ တိမ်းရှောင်နေကြရန် အီရန်က သတိပေး ပြောကြားပြီး ပင်လယ်ကွေ့မှ အမေရိကန် ဘဏ်များကို ပစ်မှတ်ထားသွားမည်ဟုလည်း ပြောကြားသည်။
ဖူဂျိုင်ရားရေနံလုပ်ငန်း ဆိပ်ကမ်းသည် တစ်နေ့လျှင် ရေနံစိမ်းစည်ပေါင်း တစ်သန်းခန့် တင်ပို့နေသော ဆိပ်ကမ်းဖြစ်ပြီး ယင်းမှာ ကမ္ဘာ့နေ့စဉ်လိုအပ်ချက်၏ တစ်ရာခိုင်နှုန်းရှိသည်။
အီရန်ခါ့ဂ်ကျွန်းအပေါ် တိုက်ခိုက်မှုများအား ယူအေအီးနိုင်ငံမှ စတင်ခဲ့သည်ဆိုခြင်းကို ယူအေအီးက ငြင်းဆိုထားသည်။
အေးကျော်
Ref: Reuters
#MeKongNews
#အီရန်
#ခါ့ဂ်ကျွန်း
#ထရမ့်
#ခြိမ်းခြောက်
