မဲခေါင်၊ မတ် ၁၂
ရှမ်းပြည်တောင်ပိုင်း၊ ပင်လောင်းမြို့နယ်၊ ပေါင်းလောင်းမြို့တွင် စစ်မှုထမ်းစရိတ်အတွက် လစဉ် ငွေကြေးကောက်ခံမှုများ ပိုမိုတိုးလာနေခြင်းကြောင့် ဒေသခံပြည်သူများ စားဝတ်နေရေး အခက်အခဲများ ကြုံတွေ့နေရကြောင်း ဒေသခံများထံမှ စုံစမ်းသိရှိရသည်။
ဒေသခံများ၏ ပြောကြားချက်အရ ၂၀၂၄ ခုနှစ်မှ စတင်ကာ စစ်ကောင်စီက စစ်မှုထမ်းစရိတ်အဖြစ် လစဉ် ငွေကောက်ခံလာခဲ့ပြီး အစပိုင်းတွင် တစ်အိမ်ထောင်လျှင် တစ်သောင်းခွဲမှ ၂ သောင်းကျပ်အထိသာ ကောက်ခံခဲ့သော်လည်း လက်ရှိတွင် တစ်အိမ်ထောင်လျှင် ၅ သောင်းကျပ်အထိ တိုးမြှင့်ကောက်ခံနေကြောင်း သိရသည်။
“အခုဆို လတိုင်း ၅ သောင်းထိ ပေးရတယ်။ အရင်ကတော့ နည်းနည်းပဲ ကောက်တာ၊ အခုက တဖြည်းဖြည်း တိုးလာပြီး ပြည်သူတွေ မခံနိုင်တော့တဲ့ အခြေအနေ ဖြစ်လာတယ်။ ဝင်ငွေက မတိုးဘူး၊ ကုန်ဈေးနှုန်းကပဲ တက်နေတော့ တော်တော် ခက်ခဲနေကြတယ်” ဟု ပေါင်းလောင်းမြို့ ဒေသခံတစ်ဦးက မဲခေါင်သို့ ပြောသည်။
ယင်းငွေများကို ဒေသခံ အုပ်ချုပ်ရေးမှူးများ မှတစ်ဆင့် လစဉ်ကောက်ခံနေပြီး လကုန်ချိန်တိုင်း တစ်လစာအပြီး ပေးဆောင်ရကြောင်း ဒေသခံများက ဆိုသည်။
“တချို့အိမ်တွေဆို ဝင်ငွေမလောက်တော့လို့ အကြွေးယူပြီး ပေးနေရတယ်။ မပေးရင်လည်း အဆင်မပြေတော့ မဖြစ်မနေ ထည့်နေရတဲ့ အခြေအနေပါ” ဟု အခြား ဒေသခံတစ်ဦးကလည်း ပြောသည်။
ပေါင်းလောင်းမြို့သည် ကျေးရွာအုပ်စု ၂ ခုနှင့် မြို့ပေါ်ရပ်ကွက် ၆ ခုဖြင့် ဖွဲ့စည်းထားပြီး ဒေသခံများသည် စပါး၊ သရက်သီးနှင့် ငှက်ပျောသီး စိုက်ပျိုးခြင်း၊ ငါးဖမ်းလုပ်ငန်းများနှင့် အမဲလိုက်ခြင်းတို့ဖြင့် အဓိက အသက်မွေးဝမ်းကျောင်း ပြုနေကြကြောင်း သိရသည်။
လက်ရှိတွင် စီးပွားရေးအခြေအနေ မကောင်းသည့်ကြားမှ စစ်မှုထမ်းစရိတ်အတွက် လစဉ် ငွေကောက်ခံမှုများ တိုးလာခြင်းကြောင့် ဒေသခံ အိမ်ထောင်စုများအတွက် စားဝတ်နေရေး ပိုမိုခက်ခဲလာနေကြောင်း ဒေသခံများက ပြောကြသည်။
#MeKongNews
#ပင်လောင်း
#စစ်မှုထမ်းစရိတ်
#ဒေသခံများ
#အကျပ်ရိုက်
