မဲခေါင်၊ မတ် ၉
ရှမ်းပြည်တောင်ပိုင်း၊ ဆီဆိုင်မြို့နယ်၊ ဆိုက်ခေါင် စံပြကျေးရွာရှိ နေအိမ်တစ်အိမ်ကို စစ်ယူနီဖောင်းဝတ်ထားသူတစ်ဦးက ဓားပြတိုက်ခဲ့ကြောင်း သတင်းရင်းမြစ်များထံမှ သိရသည်။
ဆိုက်ခေါင်စံပြကျေးရွာ၊ ဘုရားဖြူရပ်ကွက်ရှိ နေအိမ်တစ်အိမ်ကို ယမန်နေ့ညနေ ၆ နာရီခန့်တွင် စစ်ယူနီဖောင်းဝတ်တစ်ဦးက ဓားပြတိုက်ခဲ့ခြင်းဖြစ်ကာ ရွှေဆွဲကြိုးနှင့် ငွေသားအချို့ ပါသွားခဲ့ကြောင်းသိရသည်။
“အိမ်မှာ မိန်းမနဲ့ကလေးပဲ ရှိနေတဲ့အချိန် စစ်ယူနီဖောင်းဝတ်ထားတဲ့ သူတစ်ဦးက ဝင်လာပြီး ဓားပြတိုက်သွားတာဗျ။ ရွှေဆွဲကြိုး ပါသွားတယ်၊ ကလေးတွေကို ဘာမှ မလုပ်သွားတာပဲ ကံကောင်းတယ်။ ခေတ်က ပျက်နေတော့ လူတွေက အလွယ်လမ်း လိုက်နေကြတာ၊ မူးယစ်ဆေးဝါး လောင်းကစားလည်း ပေါလာတော့ အိမ်ထဲမှာတောင် မလုံခြုံတော့ဘူး” ဟု ဆိုက်ခေါင်ဒေသခံတစ်ဦးက ပြောသည်။
ဓားပြတိုက်ခံရသည့် နေအိမ်သည် ဆိုက်ခေါင်ကျေးရွာ၊ ဘုရားဖြူရပ်ကွက်နေ ကိုမလေးရှား ဆိုသူ၏ နေအိမ်ဖြစ်ပြီး တရားခံဓားပြကိုမူ ယနေ့အထိ ဖမ်းမိခြင်း မရှိသေးကြောင်း သတင်းရင်းမြစ်ထံမှ သိရသည်။
“ခေတ်ကပျက် အွန်လိုင်းလောင်းကစား စလော့တွေက ထိန်းမနိုင် သိမ်းမနိုင် ဖြစ်နေတော့ ရပ်ရွာလုံခြုံရေးကို စနစ်တကျပြုပြင်နိုင်မှ ရမယ်ဗျ။ ခုက ခေတ်ပျက်ချိန် သေနတ်တစ်လက်၊ ဓားတစ်လက် လက်ထဲရှိတာနဲ့ အလွယ်လမ်းလိုက် ဓားပြတိုက်တာတွေ များလာတယ်လေ” ဟု ဆိုက်ခေါင် ဒေသခံတစ်ဦးက ဆိုသည်။
စစ်ကောင်စီနှင့် PNO ပြည်သူ့စစ်က ပူးတွဲအုပ်ချုပ်နေသည့် ဆိုက်ခေါင် စံပြကျေးရွာသည် PNO ပြည်သူ့စစ်၏ ဗဟိုအောင်ဆုဗွေတပ်စခန်းနှင့် ဗဟိုစစ်သင်တန်းကျောင်း တည်ရှိသည့်နေရာ ဖြစ်သည်။
ဆီဆိုင်မြို့နယ်၊ ဆိုက်ခေါင်စံပြကျေးရွာသည် ရပ်ကွက် ၁၁ ခုဖြင့် ဖွဲ့စည်းထားပြီး ကမ္ဘောဇဘဏ်က ဘဏ်လုပ်ငန်းများပါ ဖွင့်လှစ်လည်ပတ်နေသည့် ရွာကြီးဖြစ်သည်။
#MeKongNews
#ဆီဆိုင်
#စစ်ယူနီဖောင်းဝတ်
#နေအိမ်
#ဓားပြတိုက်
