မဲခေါင်၊ မတ် ၆
အီရန်စစ်ပွဲတွင် အသုံးပြုနိုင်ရန် တောင်ကိုရီးယားနိုင်ငံတွင် ထားရှိသော အမေရိကန်ပက်ထရီယော့ ဒုံးခွင်းဒုံးစနစ်များအား ရွှေ့ပြောင်းချထားနိုင်ရေးကို အမေရိကန်နှင့် တောင်ကိုရီးယားစစ်ဘက်တို့က ဆွေးနွေးနေသည်ဟု တောင်ကိုရီးယား နိုင်ငံခြားရေးဝန်ကြီး ချိုဟွန်းက ပြောကြားသည်။
ရွှေ့ပြောင်းနိုင်သော အမေရိကန်ဒုံးခွင်းဒုံးစနစ်များအား နိုင်ငံ၏ အခြားနေရာများမှ အိုဆန်လေ တပ်စခန်းသို့ ပြောင်းရွှေ့ထားသည်ဟု မီဒီယာသတင်းများထွက်ပေါ်ခဲ့ပြီးနောက် ပါလီမန်၌ မေးမြန်းမှုတွင် ချိုဟွန်းက ယင်းကဲ့သို့ ပြန်ကြားခြင်းဖြစ်သည်။
အီရန်ပဋိပက္ခတွင် အသုံးပြုနိုင်ရန် ပက်ထရီယော့ ဒုံးကျည်များကို အမြန်ရွှေ့ပြောင်းရေး အမေရိကန်က စီစဉ်နေသလားဟု မေးမြန်းရာတွင် ၎င်းအနေဖြင့် မှတ်ချက်မပေးနိုင်ကြောင်း ဝန်ကြီးက ပြောသည်။
အီရန်အရေးတွင် မည်သည့်နိုင်ငံမှ မည်သည့် အကူအညီကိုမဆို အမေရိကန်က လက်ခံသွားမည်ဖြစ်ကြောင်း အမေရိကန်သမ္မတ ဒေါ်နယ်ထရန့်က ပြောကြားထားသော်လည်း ဝါရှင်တန်ထံမှ စစ်ရေးအကူအညီတောင်းခံမှုကို ဆိုးလ်က လက်ခံရရှိထားခြင်း မရှိကြောင်း တောင်ကိုရီးယား နိုင်ငံခြားရေးဝန်ကြီးက ပြောကြားသည်။
စစ်ဆင်ရေးပိုင်းဆိုင်ရာ လုံခြုံရေး အကြောင်းပြချက်များကြောင့် စစ်လက်နက်ပစ္စည်းများ၊ စွမ်းဆောင်မှုများ ပြောင်းရွှေ့နေရာချထားနိုင်ခြေ၊ နေရာချထားခြင်း၊ ပြောင်းရွှေ့ခြင်းများကို မှတ်ချက်မပေးကြောင်း တောင်ကိုရီးယားနိုင်ငံရှိ အမေရိကန်စစ်တပ်က ပြောကြားသည်။
ပက်ထရီယော့စနစ်များကို အရှေ့အလယ်ပိုင်းသို့ ပြောင်းရွှေ့ချထားရန် အသင့်ပြင်ဆင်နေကြောင်းနှင့် ၎င်းတို့အား သယ်ဆောင်ရန် အမေရိကန်စစ်တပ် သယ်ယူပို့ဆောင်ရေး လေယာဉ်ကြီးများ အိုဆန်လေဆိပ်သို့ ရောက်ရှိလာခဲ့ကြောင်း အစိုးရ သတင်းရင်းမြစ်များကို ကိုးကား၍ မီဒီယာများက သတင်းဖော်ပြခဲ့ကြသည်။
နျူကလီးယားလက်နက် ပိုင်ဆိုင်သော မြောက်ကိုရီးယားကြောင့် တောင်ကိုရီးယားနိုင်ငံသည် ပူးတွဲကာကွယ်ရေးအတွက် ကြီးမားသော အမေရိကန်တပ်ဖွဲ့ကို လက်ခံထားကာ အမေရိကန်တပ်ဖွဲ့ဝင် ၂၈၅၀၀ အပြင် ပက်ထရီယော့ဒုံးခွင်းဒုံးစနစ်များ အပါအဝင် မြေပြင်မှ ဝေဟင်ပစ် ကာကွယ်ရေးစနစ်များကိုလည်း လက်ခံထားရှိသည်။
အေးကျော်
Ref: Reuters
#MeKongNews
#အီရန်စစ်ပွဲ
#ပက်ထရီယော့
#ရွှေ့ပြောင်းရေး
#တောင်ကိုရီးယား
#အမေရိကန်
