မဲခေါင်၊ မတ် ၆
ရှမ်းပြည်တောင်ပိုင်း၊ နောင်တရားဒေသတွင် စက်သုံးဆီဈေးနှုန်း မြင့်တက်လာပြီး ဝယ်ယူရန်ခက်ခဲလာခြင်းကြောင့် အာလူးစိုက်တောင်သူများ စိုက်ခင်းများကို အချိန်မီ ရေမဖျန်းပေးနိုင်တော့သဖြင့် အချို့တောင်သူများသည် အရှုံးခံကာ စိုက်ခင်းများကို ပစ်ထားရကြောင်း ဒေသခံများထံမှ သိရသည်။
ဒေသခံတောင်သူများ အဆိုအရ အာလူးစိုက်ခင်းများတွင် ရေဖျန်းရန်အတွက် ရေတင်စက်များကို အသုံးပြုရပြီး စက်သုံးဆီမှာ အဓိကလိုအပ်သော အရင်းအမြစ်တစ်ခုဖြစ်ကြောင်း ပြောသည်။
သို့သော် လက်ရှိတွင် ဆီဈေးနှုန်းများ မြင့်တက်လာသည့်အပြင် ဝယ်ယူရလည်း ခက်ခဲလာသဖြင့် စိုက်ခင်းများကို အချိန်မီ ရေမဖျန်းနိုင်တော့ကြောင်း တောင်သူများက ဆိုသည်။
“အာလူးခင်းတွေက ရေမဖျန်းရင် မဖြစ်ဘူး၊ ဒါပေမယ့် အခု ဆီဈေးက အရမ်းတက်နေတယ်။ တချို့နေရာတွေမှာ ဝယ်လို့တောင် မရဘူး၊ ရေမဖျန်းနိုင်တော့ အာလူးပင်တွေ ခြောက်သွားတာရှိတယ်။ အချို့အခင်းတွေဆို အရှုံးခံပြီး ဒီအတိုင်းပစ်ထားရတာလည်း ရှိတယ်” ဟု နောင်တရားဒေသခံ တောင်သူတစ်ဦးက ပြောသည်။
ထို့ပြင် စိုက်ပျိုးရေးအတွက် လိုအပ်သည့် မျိုးစေ့၊ ဓာတ်မြေဩဇာနှင့် ပိုးသတ်ဆေးများ၏ ဈေးနှုန်းများလည်း မြင့်တက်နေသော်လည်း အာလူးဈေးနှုန်း မကောင်းသည့်အတွက် တောင်သူများ အခက်အခဲ ပိုကြုံတွေ့နေရကြောင်း သိရသည်။
“မျိုး၊ ဓာတ်မြေဩဇာ၊ ဆေးတွေကလည်း ဈေးကြီးနေတယ်။ အခု ဆီဈေးတက်လို့ ရေတောင် မဖျန်းနိုင်တော့ဘူး။ ဒီလို ဆက်ဖြစ်နေမယ်ဆိုရင် ဒီနှစ် အာလူးစိုက်တဲ့ တောင်သူတွေ အရှုံးကြီးနိုင်တယ်” ဟု ဒေသခံ တောင်သူတစ်ဦးက ပြောသည်။
နောင်တရားဒေသသည် ရှမ်းပြည်တောင်ပိုင်းတွင် အာလူးအဓိက စိုက်ပျိုးသည့် ဒေသတစ်ခုဖြစ်ပြီး စိုက်ပျိုးရာတွင် ရေတင်စနစ်အတွက် စက်သုံးဆီကို အဓိကအသုံးပြုရသည့်အတွက် ဆီဈေးနှုန်းမြင့်တက်မှုနှင့် ဆီပြတ်လပ်မှုများကြောင့် စိုက်ပျိုးရေးလုပ်ငန်းများ ထိခိုက်မှုများ ဖြစ်ပေါ်လာနေကြောင်း တောင်သူများကပြောသည်။
ဒေသခံတောင်သူအချို့သည် အာလူးခင်းများ မခြောက်သွားစေရန် အခြားနည်းလမ်းများဖြင့် ရေဖျန်းရန် ကြိုးစားနေကြသော်လည်း စက်သုံးဆီ မရရှိပါက စိုက်ခင်းများကို ဆက်လက်ထိန်းသိမ်းရန် ခက်ခဲလာနိုင်ကြောင်း ဒေသခံများက ဆိုသည်။
#MeKongNews
#စက်သုံးဆီ
#နောင်တရား
#အာလူးစိုက်
#တောင်သူများ
#အရှုံးပေါ်
