မဲခေါင်၊ မတ် ၅
ရုရှား၏ သဘော၀ဓာတ်ငွေ့အရည် (LNG) တန် ၆၂၀၀၀ တင် ဆောင်မောင်းနှင်လာသော Arctic Metagaz သင်္ဘောကြီးသည် လစ်ဗျားနှင့် မော်လ်တာနိုင်ငံအကြား မြေထဲပင်လယ်အတွင်း ပြီးခဲ့သည့် မတ် ၃ ရက်ညပိုင်းက မီးလောင်ကာ ပေါက်ကွဲ နစ်မြုပ်သွားရမှုမှာ ယူကရိန်း ပင်လယ်ဒရုန်းများကြောင့် ဖြစ်သည်ဟု ရုရှားဘက်က စွပ်စွဲခဲ့သည်။
Arctic Metagaz သင်္ဘောသည် ၂၀၂၂ ခုနှစ်က ယူကရိန်းကို ရုရှား ကျူးကျော်စစ် စတင်ဆင်နွှဲပြီးနောက် အနောက်နိုင်ငံများမှ ပိတ်ဆို့အရေးယူသည့် သင်္ဘောများစာရင်းထဲ ပါဝင်သွားခဲ့ပြီး ရုရှားမြောက်ပိုင်း မာမန့်စ် ဆိပ်ကမ်းမှ အီဂျစ်နိုင်ငံ ဆတ်ဒ်ဆိပ်ကမ်းသို့ ဦးတည်မောင်းနှင်နေစဉ် လစ်ဗျားနိုင်ငံ ဆာတေဆိပ်ကမ်းမှ ရေမိုင် ၁၃၀ အကွာတွင် မီးလောင်ပေါက်ကွဲကာ နစ်မြုပ်သွားရခြင်း ဖြစ်သည်။
ထိုဖြစ်စဉ်အတွက် ရုရှားသမ္မတပူတင် ဒေါသထွက် ပေါက်ကွဲခဲ့ပြီး ယူကရိန်းလက်ချက်ဖြစ်ကာ ယခုမှ ပထမဆုံး အကြမ်းဖက်ခံရသည့်ကိစ္စ၊ ပယ်လယ်အတွင်း ဓားပြတိုက်ခံရသည့်ကိစ္စ ရှိသည်မဟုတ်ဟု ယူကရိန်းရေတပ်ကို စွပ်စွဲ ပြောဆိုသွားခဲ့သည်။
ပင်လယ်ဒရုန်းဖြင့် ပစ်ခတ်မှုသည် လစ်ဗျားကမ်းခြေတစ်ခုမှ ပစ်ခတ်လာခြင်းဖြစ်ပြီး ယခင်က မြေထဲပင်လယ်အတွင်း တိုက်ခိုက်မှုမှာမူ မရှိခဲ့ဖူးပေ။
ရုရှားပို့ဆောင်ရေးဝန်ကြီးက သင်္ဘောပေါ်တွင် သင်္ဘောသား ၃၀ ပါဝင်သည်ဟု ကနဦး ထုတ်ပြန်ကာ ၎င်းတို့အားလုံးကို အသက်ကယ်လှေပေါ်မှ ဘေးကင်းစွာ ကယ်တင်နိုင်ခဲ့သည်ဟု သွားရောက်ကယ်ဆယ်ခဲ့သည့် မော်လ်တာ လက်နက်ကိုင်တပ်ဘက်မှ ထုတ်ပြန်သွားခဲ့သည်။
ရုရှားဘက်မှ စွပ်စွဲသော်လည်း ယူကရိန်းစစ်ထောက်လှမ်းရေး – SBU ဘက်ကရော ယူကရိန်း အစိုးရဘက်ကပါ ထိုသင်္ဘော ပေါက်ကွဲနစ်မြုပ်မှုသည် ၎င်းတို့လက်ချက် ဟုတ်၊ မဟုတ် မည်သည့် ထုတ်ပြန်ချက်မှ မလုပ်သေးပေ။
ကိုကလင်း
Ref: BBC
#MeKongNews
#LNG
#သင်္ဘော
#ပေါက်ကွဲနစ်မြုပ်
#ယူကရိန်း
#ရုရှား
