မဲခေါင်၊ ဖေဖော်ဝါရီ ၂၆
ဒေသတွင်းတင်းမာမှုများ တအုံနွေးနွေးဖြစ်နေစဉ် ၂၀၃၁ ခုနှစ်တွင် နိုင်ငံအနောက်ဘက် ဝေးလံသော ထိုင်ဝမ် အနီးမှကျွန်း၌ မြေပြင်မှ ဝေဟင်ပစ် ဒုံးကျည်များ ဖြန့်ကြက်သွားရန် ဂျပန်က စီစဉ်ထားသည်ဟု ဂျပန် ကာကွယ်ရေးဝန်ကြီးက ပြောသည်။
၂၀၂၂ ခုနှစ်က အစီအစဉ်ကို ဖော်ဆောင်ခဲ့ပြီး နောက်ပိုင်း ယိုနာဂူနီကျွန်း၌ ဒုံးကျည်ချထားမည့် အစီအစဉ်ကို ဂျပန်က ပထမဆုံးအကြိမ် အချိန်နှင့်တကွ ထုတ်ပြောလာခြင်းဖြစ်သည်။
၆၈ မိုင်သာကွာဝေးသော ယိုနာဂူနီကျွန်းကို ရာသီဥတုသာယာပါက ထိုင်ဝမ်မှပင် လှမ်းမြင်နိုင်သည်။
အမျိုးသားလုံခြုံရေးကို အကြောင်းပြ၍ ဂျပန်ကုမ္ပဏီ ၂၀ အပေါ် ပို့ကုန်ထိန်းချုပ်မှုများ ချမှတ်၍ တရုတ်က အရေးယူခဲ့ပြီး နောက်တစ်ရက်တွင် ဂျပန်၏ ဒုံးကျည်ချထားမည့် အချိန်ကို ကာကွယ်ရေးဝန်ကြီး ရှင်ဂျီရိုကိုအိဇူမိက ထုတ်ပြောလာခြင်း ဖြစ်သည်။
ယိုနာဂူနီတွင် မြေပြင်မှဝေဟင်ပစ် တာလတ်ပစ် ဒုံးကျည်များကို ချထားမည်ဖြစ်ကာ ၎င်းတို့က ဝင်ရောက်လာသော ဒုံးကျည်များ၊ လေယာဉ်များကို ကြားဖြတ် ပစ်ချနိုင်သည်ဟု ကိုအိဇုမိက ပြောသည်။
၎င်း၏ ကြေညာချက်နှင့် ပတ်သက်၍ တရုတ်က တုံ့ပြန်မှုမလုပ်သေးပေ။
သို့ရာတွင် နိုဝင်ဘာလက ယင်းကျွန်းသို့ ကိုအိဇုမိ သွားရောက်ချိန်တွင် ဂျပန်သည် ဒေသတွင်းတင်းမာမှု ဖန်တီးပြီး စစ်ဘက် ထိပ်တိုက်ရင်ဆိုင်မှု ဖြစ်ရေး လှုံ့ဆော်ရန် လုပ်ဆောင်နေသည်ဟု ပေကျင်းက ပြောကြားခဲ့သည်။
ထို့နောက်တွင် ဂျပန်ကျွန်းအနီးသို့ တရုတ်က ဒရုန်းများ ပျံသန်းခဲ့ရာတွင် ဂျပန်ကလည်း တိုက်လေယာဉ်များ စေလွှတ်ခဲ့ကြောင်း သိရသည်။
လောလောဆယ်တွင် ယိုနာဂူနီကျွန်းပေါ်၌ ကမ်းရိုးတန်း စောင့်ကြည့်လေ့လာရေးစခန်းကို ဂျပန်ကို ထားရှိပြီး ဂျပန်တပ်ဖွဲ့ဝင် ၁၆၀ ကိုလည်း တပ်စွဲထားကြောင်း သိရသည်။
ရန်သူ့ဆက်သွယ်ရေးနှင့် ရေဒါများကို နှောင့်ယှက်နိုင်သော အီလက်ထရွန်းနစ် စစ်ဆင်ရေးအဖွဲ့ကိုလည်း ၂၀၂၆ ခုနှစ်တွင် ထူထောင်သွားရန်လည်း ဂျပန်က စီစဉ်ထားသည်။
ကိုယ်ပိုင်အုပ်ချုပ်နေသော ထိုင်ဝမ်ကို ၎င်းပိုင်နယ်မြေ အဖြစ် တရုတ်က ပြောကြားပြီး ပြန်လည်ပေါင်းစည်းရန် အင်အားသုံးမည့် အရေးကိုလည်း ပယ်ချမထားပေ။
ထိုင်ဝမ်ကို တိုက်ခိုက်မှု ဖြစ်ပေါ်ခဲ့ပါက ဂျပန်က စစ်ရေးအရ တုံ့ပြန်နိုင်သည့်သဘော ဂျပန်ဝန်ကြီးချုပ် ဆာနာအဲတာကာအိချိက နိုဝင်ဘာလတွင် ပြောကြားခဲ့ပြီးနောက် တိုကျိုနှင့် ပေကျင်းကြား တင်းမာမှုများ မြင့်တက်နေသည်။
အေးကျော်
Ref: BBC
#MeKongNews
#ထိုင်ဝမ်
#ဂျပန်
#ဒုံးကျည်များ
#ဖြန့်ကြက်
