မဲခေါင်၊ ဖေဖော်ဝါရီ ၂၅
အမေရိကန်စစ်ဘက်၏ ရာထူးအမြင့်ဆုံး ဗိုလ်ချုပ်ကြီးက အီရန်အပေါ် ကြီးမားသောစစ်ပွဲဆင်နွှဲခြင်း၏ အန္တရာယ်များအား သတိပေးခဲ့သည် ဆိုသော သတင်းများကို သမ္မတ ဒေါ်နယ်ထရမ်က ငြင်းဆိုခဲ့ပြီး စစ်ဖြစ်ခဲ့လျှင် ဝါရှင်တန်က တီဟီရန်ကို အလွယ်တကူ အနိုင်ရမည်ဖြစ်ကြောင်း ပြောကြားသည်။
ရေရှည် ပါဝင်ပတ်သက်ရမှု အပါအဝင် အီရန်အပေါ် တိုက်ခိုက်မှုများနှင့် ဆက်စပ်၍ ဖြစ်ပေါ်လာနိုင်သော အန္တရာယ်အမျိုးမျိုးကို စစ်ဦးစီးချုပ်များဥက္ကဌ ဗိုလ်ချုပ်ကြီး ဒန်ကိန်းက သတိပေးခဲ့ကြောင်း အမေရိကန်မီဒီယာများက ရေးသား ဖော်ပြခဲ့ကြကြောင်း သိရသည်။
အီရန်အား တိုက်ခိုက်မှုတွင် ဗိုလ်ချုပ်ကြီး ဒန်ကိန်းက မိမိတို့နှင့် ဆန့်ကျင်နေသည် ဆိုခြင်းမှာ ရာနှုန်းပြည့် မှန်ကန်မှု မရှိကြောင်း ဒေါ်နယ်ထရမ့်က ၎င်း၏ လူမှုကွန်ရက် Truth Social ပေါ်တွင် ပြောသည်။
မိမိတို့ အားလုံးကဲ့သို့ပင် ဗိုလ်ချုပ်ကြီးကိန်းကလည်း စစ်မတိုက်ချင်ကြောင်း သို့သော်လည်း အီရန်အားတိုက်ရန် စစ်ရေးအဆင့်တွင် ဆုံးဖြတ်ခဲ့ပါက အလွယ်တကူ အနိုင်ရရှိမည်ဆိုခြင်းမှာ ၎င်း၏ ထင်မြင်ချက်ဖြစ်ကြောင်း ထရမ့်က ပြောသည်။
“အီရန်ကို မတိုက်ဖူးလို့ သူမပြောပါဘူး။ ကျနော် ဖတ်ရှုနေရတဲ့ အကန့်အသတ်နဲ့ တိုက်ခိုက်မှု အတုအကြောင်းတောင် သူက မပြောပါဘူး။ သူသိတာ ဘယ်လို အနိုင်ရမလဲဆိုတာ တစ်ခုတည်း ရှိပါတယ်။ သူ့ကို လုပ်ခိုင်းလိုက်ရင်၊ သူကအဖွဲ့ကို ဦးဆောင်သွားပါလိမ့်မယ်” ဟု ထရမ့်က ဆိုသည်။
လက်နက်ခဲယမ်း မလုံလောက်မှုနှင့် မဟာမိတ်များ၏ ထောက်ခံမှု နည်းပါးခြင်းက အမေရိကန်စစ်သားများအပေါ် အန္တရာယ်များစေနိုင်ကြောင်းကို ဗိုလ်ချုပ်ကြီးက အိမ်ဖြူတော်နှင့် ပင်တဂွန်တွင် ပြောကြားခဲ့သည်ဟု ဝါရှင်တန်ပို့စ်သတင်းစာက ရေးသားခဲ့သည်။
အမေရိကန်က အီရန်ကို တိုက်ခိုက်ခဲ့ပါက အမေရိကန်နှင့် မဟာမိတ်တပ်များ ထိခိုက်ပျက်စီးနိုင်ခြေနှင့်အတူ အမေရိကန် လေကြောင်းရန်ကာကွယ်ရေးစနစ်များ ပျက်သုဉ်းသွားမည့် အန္တရာယ်များနှင့်ပတ်သက်ပြီး ထိပ်တန်း ဗိုလ်ချုပ်ကြီးနှင့် အခြား ပင်တဂွန်အရာရှိများကလည်း သတိပေး ပြောကြားခဲ့သည်ဟု ဝေါလ်စထရိဂျာနယ်က ဖော်ပြသည်။
အမေရိကန်သည် အီရန်တွင် တာရှည်မည့် ပဋိပက္ခထဲတွင် ပါဝင်ပတ်သက်ရနိုင်ကြောင်း ဗိုလ်ချုပ်ကြီးကိန်းက သတိပေးခဲ့ကြောင်း Axios သတင်းဌာနက ဖော်ပြသည်။
ထို့ပြင် အီရန်နှင့် စုန်ချီဆန်ချီ ညှိ နှိုင်းမှုများ လုပ်ဆောင်နေသော စတိဗ်ဝစ်ကော့ဗ်နှင့် သားမက်ဖြစ်သူ ဂျာရက်ကုရှ်နာတို့ကလည်း စစ်ဆင်နွှဲခြင်းကို ဆိုင်းထားပြီး သံတမန်ရေးကို အခွင့်အရေးပေးရန် သမ္မတကို တိုက်တွန်းနေကြောင်း Axios သတင်းက ဆက်လက်ဖော်ပြသည်။
သို့သော်လည်း အမေရိကန် မီဒီယာများက ရည်ရွယ်ချက်ရှိရှိဖြင့် မမှန်မကန် ရေးသားနေကြောင်း ထရမ့်က စွပ်စွဲ ပြောကြားသည်။
“ကျနော်က ဆုံးဖြတ်ချက်ချတဲ့သူပါ။ ကျွန်တော်က သဘောတူညီချက်ရဖို့ကို ပိုပြီး လိုလားပါတယ်။ ဒါပေမယ့်လည်း သဘောတူညီချက် မရခဲ့ရင်တော့ ဒါဟာ အဲဒီနိုင်ငံနဲ့ သူ့ရဲ့ ပြည်သူတွေအတွက် ဆိုးရွားတဲ့နေ့ ဖြစ်ပါလိမ့်မယ်” ဟု ၎င်းက ဆိုသည်။
အေးကျော်
Ref: AFP
#MeKongNews
#အီရန်
#တိုက်ခိုက်
#အမေရိကန်
#ဗိုလ်ချုပ်ကြီး
#ထရမ့်
