မဲခေါင်၊ ဖေဖော်ဝါရီ ၁၅

ရှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာမြို့မှ ကားပွဲစားညီအကို ၂ ဦးကို ဝယ်လက်က လုယက်ရန်ကြိုးစားရာမှ ညီဖြစ်သူ အသတ်ခံခဲ့ရကြောင်း မြို့ခံများထံမှ သိရသည်။

ယမန်နေ့ နံနက်ပိုင်းက ကားပွဲစား ကိုသက်ကိုဖြိုးနှင့် ကိုသက်မော်ထူးတို့ ညီအစ်ကို ၂ ဦးက လူမှုကွန်ရက်ပေါ် အရောင်းတင်ထားသည့် ကားအား ဝယ်ယူရန်စိတ်ဝင်စားသဖြင့် ကြည့်ချင်သည်ဟုဆိုကာ ချိန်းဆိုထားသော ဝယ်လက်အား အောင်ပန်းမြို့တွင် ကားသွားပြရာ ဝယ်လက်ဘက်မှ တစ်ဦးက ၎င်းတို့ကို လုယက်ရန်ကြိုးစားပြီး ညီဖြစ်သူ ကိုသက်မော်ထူးအား ဓားဖြင့်ထိုးခဲ့သဖြင့် သေဆုံးခဲ့ရကြောင်း သိရသည်။

“အောင်ပန်းကို ညီအကို ၂ယောက်ထဲ ကားသွားပြလိုက်တာ၊ ကားစကြည့်မယ်လုပ်တော့ ကားကြည့်တဲ့ဘက်က ဒေါင်ကောင်းကောင်း၊ အသက်နည်းနည်းကြီး (၄၀ကျော်ခန့်) လူက စလုပ်တော့ သူတို့ ညီအစ်ကို၂ယောက်က လူကောင်သေးတော့ သူချကိုယ်ချ ပြန်ချပေမယ့် လူအားမမျှဘူးတဲ့။ အဲ့ချိန်မှာ အဲ့လူက ဓားထုတ်လာပြီး အငယ်ကောင်လေးကို ထိုးလိုက်တာ။ အကြီးတစ်ယောက်ကလည်း တော်တော် ဒဏ်ရာရသွားတယ် ပြောတယ်” ဟု တောင်ကြီး ကားပွဲစား အသိုင်းဝိုင်းမှ လူတစ်ဦးက မဲခေါင်ကို ပြောသည်။

၎င်းတို့ ညီအစ်ကို ၂ ဦးသည် ပအိုဝ်းတိုင်းရင်းသား လူငယ်များ ဖြစ်ကြပြီး သေဆုံးသူ ကိုသက်မော်ထူးသည် အသက် ၂၁ နှစ်သာ ရှိသေးကြောင်း သိရသည်။

၎င်းတို့သည် ကား၊ ဆိုင်ကယ်၊ ဖုန်းအရောင်းအဝယ်လုပ်ငန်းကို သူငယ်ချင်းများနှင့် အကျိုးတူလုပ်ကိုင်နေကြခြင်း ဖြစ်သည်။

လူသတ်မှု ကျူးလွန်ခဲ့သည့် ကားဝယ်လက်ဘက်မှ အနည်းဆုံး လူ ၂ ဦးခန့်ပါကြောင်း အစ်ကိုသက်ကိုဖြိုး၏ အပြောအရ သိရပြီး တရားခံများကို ဖမ်းမိထားပြီဟု အောင်ပန်းရဲစခန်းကဆိုသော်လည်း မည်သူမည်ဝါဖြစ်ကြောင်း နစ်နာသူမိသားစုများအား မပြောသေးသလို ဘယ်နှဦးမိထားကြောင်းကိုလည်း အသိမ​ပေးသေးကြောင်း သိရသည်။

ရှမ်းပြည်တောင်ပိုင်းတွင် ယခုလပိုင်းအတွင်း လိုင်စင်မဲ့ယာဉ်များအား တင်းကြပ်စွာ ဖမ်းဆီးမှုများကြောင့် ကား၊ ဆိုင်ကယ် အရောင်းအဝယ် ပါးလျက်ရှိသလို ပွဲစားအချင်းချင်း ပြိုင်ဆိုင်မှုများလာကြောင်း ပွဲစားများကဆိုသည်။

#MeKongNews
#ပွဲစား
#လူသတ်မှု
#ကားဝယ်လက်
#အောင်ပန်း
#အေးသာယာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)