မဲခေါင်၊ ဖေဖော်ဝါရီ ၁၁
ရုရှားနိုင်ငံ၊ ခရက်စ်နိုယက်ဗ် ဒေသရှိ မွေးမြူရေးခြံတစ်ခုတွင် အလုပ်ရှင်၏ ၁၇ နှစ်အရွယ် သမီးဖြစ်သူကို အဓမ္မကျင့်ကာ သတိလစ်သွားသည်အထိ ထိုးကြိတ် ရိုက်နှက်ပြီးနောက် ဝက်ခြံအတွင်း ပစ်ထားခဲ့သဖြင့် ဝက်များ ကိုက်ဖြတ် စားသောက်ခြင်း ခံခဲ့ရသည့်အမှုမှ တရားခံကို ထောင်ဒဏ် ၂၃ နှစ် ချမှတ်လိုက် သည်။
အသက် ၄၂ နှစ်အရွယ် တရားခံ အီဂေါ ဇိုင်ကော့ဗ် ဆိုသူသည် ယခင်က ၎င်း၏ ညီအရင်းကို သတ်ဖြတ်မှုဖြင့် ထောင်ဒဏ်ကျခံခဲ့ဖူးသူ ဖြစ်သည်။
၎င်းထောင်မှ ပြန်လည် လွတ်မြောက်လာချိန်တွင် မွေးမြူရေးခြံပိုင်ရှင်က ဒုတိယအကြိမ် အခွင့်အရေး ပေးသည့်အနေဖြင့် အလုပ်ခန့်ထားခဲ့ခြင်း ဖြစ်သော်လည်း ဇိုင်ကော့ဗ်နှင့် အလုပ်ရှင်တို့အကြား ကာလရှည် အငြိုးအတေးများ ရှိခဲ့သည်။
အခင်းဖြစ်ပွားသည့်နေ့တွင် ဇိုင်ကော့ဗ်သည် အလုပ်ရှင်နှင့် စကားများခဲ့ပြီးနောက် တိရစ္ဆာန်များကို သတ်ဖြတ်ကာ မွေးမြူရေးတဲများကို မီးရှို့ပစ်မည်ဟူသော ရည်ရွယ်ချက်ဖြင့် အရက်မူးကာ ဝက်ခြံအတွင်း ဝင်လာခဲ့သည်။
ထိုစဉ် ပိုင်ရှင်၏ သမီးဖြစ်သူ မီလီနာရှီဗယ်ယိုဗာက ဝက်စာကျွေးနေသည်ကို တွေ့ရှိခဲ့သဖြင့် ၎င်းကို တုတ်ဖြင့်ရိုက်၊ လက်သီးဖြင့် ခေါင်းကို အဆက်မပြတ် ထိုးကြိတ်ခဲ့ရာမှ မီလီနာမှာ သတိလစ် မေ့မျောသွားခဲ့ခြင်း ဖြစ်သည်။
၎င်းနောက် တရားခံသည် မီလီနာ၏ လက်ကိုင်ဖုန်းကို ယူဆောင်ကာ ထွက်ပြေးခဲ့ပြီး ရိုက်နှက်ခဲ့သည့် တုတ်နှင့် ဖုန်းကို မီးဖိုအတွင်း ထည့်ကာ သက်သေ ဖျောက်ဖျက်ခဲ့သည်။
မေ့မျောနေသည့် မီလီနာကို သွေးနံ့ရရှိသည့် ဝက်များက ကိုက်ဖဲ့စားသောက်ရာမှ ပေါင်ရှိ သွေးလွှတ်ကြောကြီး ပေါက်ထွက်သွားသည်အထိ ဒဏ်ရာရရှိခဲ့ပြီး သွေးထွက်လွန်ကာ သေဆုံးသွားခဲ့ရခြင်း ဖြစ်သည်။
မွေးမြူရေးခြံပိုင်ရှင် ဇနီးမောင်နှံမှာ ထိုအချိန်တွင် စျေးဝယ်ထွက်နေသဖြင့် သမီးဖြစ်သူထံ ဖုန်းဆက်ရာတွင် ဆက်သွယ်၍ မရသောကြောင့် မီလီနာ၏ ရည်စားဖြစ်သူအား သွားရောက် ကြည့်ရှုခိုင်းခဲ့သည်။
မီလီနာ၏ ရည်စားက ဝက်တဲအတွင်း ရုပ်ပျက်ဆင်းပျက် ဖြစ်နေသော အလောင်းကို တွေ့ရှိခဲ့ရသဖြင့် ထိတ်လန့်တကြား အော်ဟစ် အော့အန်ခဲ့ရပြီး ရဲတပ်ဖွဲ့ကို အကြောင်းကြားခဲ့ခြင်း ဖြစ်သည်။
ထို့နောက် ရဲတပ်ဖွဲ့က ဇိုင်ကော့ဗ်ကို ဖမ်းဆီးစစ်ဆေးခဲ့ရာ ၎င်းက အဓမ္မကျူးလွန်ခဲ့ခြင်း မရှိကြောင်း ငြင်းဆိုခဲ့သော်လည်း ဆေးစစ်ချက်များအရ ပြုကျင့်ထားသည့် အထောက်အထားများ တွေ့ရှိခဲ့ရသဖြင့် တရားရုံးက ထောင်ဒဏ် ၂၃ နှစ် ချမှတ်လိုက်ခြင်း ဖြစ်သည်။
ကိုကလင်း
Ref:The Sun
#MeKongnews
#ရုရှား
#ဆယ်ကျော်သက်
#မိန်းကလေး
#အဓမ္မကျင့်
#သေဆုံးမှု
