မဲခေါင်၊ ဖေဖော်ဝါရီ ၉
စစ်ရေးတည်ဆောက်မှုများ ရှိနေပြီး နယ်စပ်ပဋိပက္ခ ထပ်မံ ဖြစ်ပွားနိုင်ခြေရှိကြောင်း ထိုင်းမီဒီယာများ၏ ဖော်ပြချက်ကို ကမ္ဘောဒီးယား လုံခြုံရေး တာဝန်ရှိသူများက ပယ်ချလိုက်ပြီး ထိုပြောဆိုချက်များမှာ အခြေအမြစ်မရှိကြောင်း တုံ့ပြန်လိုက်သည်။
ထိုင်း ရွေးကောက်ပွဲကာလအတွင်း ဖနွမ်းပင်က အဆင့်မြင့်လေကြောင်းရန် ကာကွယ်ရေးလက်နက်များ ဝယ်ယူခဲ့သဖြင့် တတိယအကြိမ် နယ်စပ်စစ်ပွဲ ဖြစ်ပွားလာနိုင်ကြောင်း သတိပေးထားသည်ဟု အမည်မဖော်လိုသော လုံခြုံရေး ရင်းမြစ်များကို ကိုးကား၍ ထိုင်းသတင်းဌာန အများအပြားက မကြာသေးမီက ဖော်ပြခဲ့သည်။
၎င်းဖြစ်ပေါ်မှုများသည် ထိုင်းနိုင်ငံက ရေရှည်ရယူထားသည့် လေကြောင်း အသာစီးရမှုကို အားနည်းသွားစေနိုင်ပြီး နယ်စပ်တွင် တိုက်ပွဲများ ထပ်မံ ဖြစ်ပွားနိုင်ခြေရှိကြောင်း သတင်းများက ဆိုသည်။
သို့ရာတွင် ကမ္ဘောဒီးယား လုံခြုံရေးအရာရှိတစ်ဦးက ထိုင်းသတင်းများကို ပယ်ချလိုက်ပြီး ၂၀၂၅ ခုနှစ်၊ ဒီဇင်ဘာလ ၂၇ ရက်က နှစ်နိုင်ငံကြား ချုပ်ဆိုခဲ့သော အပစ်အခတ်ရပ်စဲရေး သဘောတူညီချက် အပါအဝင် လက်ရှိ တည်ရှိနေသော ၂ နိုင်ငံ ငြိမ်းချမ်းရေး ယန္တရားများအပေါ် ကမ္ဘောဒီးယားက ဆက်လက်လိုက်နာနေကြောင်း ပြောကြားခဲ့သည်။
“နယ်စပ်တစ်လျှောက် ငြိမ်းချမ်းရေးနဲ့ တည်ငြိမ်မှုကို ဆက်လက်ထိန်းသိမ်းဖို့ အပစ်အခတ် ရပ်စဲမှုကို ယုံကြည်ချက်အပြည့်နဲ့ တင်းတင်းကျပ်ကျပ် အကောင်အထည်ဖော်နေပါတယ်” ဟု ကမ္ဘောဒီးယား အရာရှိကြီးက ဆိုသည်။
ကမ္ဘောဒီးယားအနေဖြင့် အိမ်နီးချင်း နိုင်ငံများနှင့် ငြိမ်းချမ်းစွာ ဆွေးနွေးခြင်းကို ဆက်လက် ဦးစားပေးနေသလို တစ်ဖက်တွင်လည်း မိမိတို့၏ အချုပ်အခြာ အာဏာနှင့် ပိုင်နက်နယ်မြေကို ကျူးကျော်တိုက်ခိုက်မှု မှန်သမျှမှ ကာကွယ်သွားရန် စိတ်ပိုင်းဖြတ်ထားကြောင်း ၎င်းက ဆက် လက် ပြောကြားခဲ့သည်။
အေးကျော်
Ref:Khmer Tlmes
#MeKongnews
#စစ်ရှိန်
#မြှင့်တင်
#ထိုင်းမီဒီယာ
#ကမ္ဘောဒီးယား
#ငြင်းဆို
