မဲခေါင်၊ ဇန်နဝါရီ ၃၁
ရုရှားနိုင်ငံမှ စစ်ပစ္စည်းထုတ်လုပ်သော လုပ်ငန်းများ၏ နိုင်ငံခြားတင်ပို့မှု မှတ်တမ်းကို သမ္မတ ဗလာဒီမာပူတင်က ယမန်နေ့တွင် ချီးကျူး ပြောကြားလိုက်ပြီး အနောက်တိုင်း၏ ဖိအားများ ရှိနေသော်လည်း ရုရှားစစ်ပစ္စည်း လုပ်ငန်းက ဈေးကွက်နှင့် အလားအလာများကို ချဲ့ထွင်နိုင်ခဲ့သည်ဟု ပြောသည်။
“ရုရှားထုတ် စစ်လက်နက်ပစ္စည်းတွေကို ပြီးခဲ့တဲ့နှစ်က နိုင်ငံပေါင်း ၃၀ ကျော်ကို တင်ပို့ခဲ့ပြီး အဲဒီလုပ်ငန်းက ရရှိခဲ့တဲ့ နိုင်ငံခြားဝင်ငွေဟာ အမေရိကန်ဒေါ်လာ ၁၅ ဘီလီယံကျော်ရှိပါတယ်” ဟု ကရင်မလင်တွင် ပြုလုပ်ခဲ့သော စစ်ဘက်နှင့် နည်းပညာပိုင်း ပူးပေါင်းဆောင်ရွက်မှု အစည်းအဝေး ဗီဒီယိုတွင် ပူတင်က ပြောကြားသည်။
ယင်းလုပ်ငန်းကဏ္ဍက ရှုပ်ထွေးသော အခြေအနေများ အောက်တွင် လုပ်ကိုင်နေရသည်ဟုလည်း ၎င်းက ပြောကြားသည်။
“အနောက်နိုင်ငံတွေဆီက ဖိအားတွေ ဆက်ရှိနေပါတယ်။ ရုရှားနဲ့ စီးပွားရေးဆက်ဆံမှုကို နှေးကွေးအောင်လုပ်ဖို့ ၊ တားဆီးပိတ်ပင်ဖို့ ပိုလို့တောင် ဖိအားများလာနေပါတယ်။ အဲဒီလို ကြိုးပမ်းမှုတွေ ရှိနေပေမယ့်လည်း ကျနော်တို့ရဲ့ နိုင်ငံခြားတင်ပို့မှု ကန်ထရိုက်တွေကို မှန်မှန်ကြီး ဖြည့်ဆည်းပေးနေပါတယ်” ဟု ၎င်းက ဆက်ပြောသည် ။
အထူးသဖြင့် ရုရှားစစ်ဘက် ထုတ်ကုန်များကို အာဖရိကနိုင်ငံများက အထူးစိတ်ဝင်စားမှု ပြသကြသည်ဟုလည်း ၎င်းက ဆက်ပြောသည်။
“အနောက်တိုင်းရဲ့ ဖိအားတွေ ရှိနေပေမယ့်လည်း စစ်ဘက်နဲ့ စစ်ဘက်နည်းပညာ နယ်ပယ်တွေမှာ ရုရှားနဲ့ သူတို့ရဲ့ ဆက်ဆံရေးကို တိုးချဲ့ဖို့ အသင့်ရှိတယ်ဆိုတာ အာဖရိက မိတ်ဖက်တွေက ပြသနေပါတယ်” ဟု ၎င်းက ပြောသည်။
ရုရှားသည် စစ်ဘက် ပူးပေါင်းဆောင်ရွက်မှုများ အပါအဝင် အာဖရိကနိုင်ငံ အများအပြားနှင့် ဆက်ဆံရေး တိုးတက်ရန် လုပ်ဆောင်နေသည်။
ဗဟိုအာဖရိကနိုင်ငံက သူပုန်အုပ်စုများကို နှိမ်နင်းရန် ၂၀၁၈ ခုနှစ်တွင် ရုရှားမှ ဝက်ဂနာ ကြေးစားစစ်သားများအား ခေါ်ယူအသုံးပြုခဲ့သည်။
မကြာသေးမီက ပြန်လည်ရွေးကောက် တင်မြှောက်ခံခဲ့ရသော သမ္မတ ဖော်စတင်အာချန် ဂီတူအာဒီရာကလည်း ၎င်းတို့နိုင်ငံသို့ လာရောက်လည်ပတ်ရန် ပူတင်အား ယခုလအတွင်း ဖိတ်ကြားခဲ့သည်။
ရုရှားသည် မာလီနှင့် ဘာကီနာဖာဆိုနိုင်ငံတို့မှ စစ်အစိုးရများနှင့် ဆက်ဆံရေးကိုလည်း တိုးမြှင့်ခဲ့သည်။
အေးကျော်
Ref: Reuters
#MeKongNews
#ရုရှား
#စစ်ပစ္စည်း
#သမ္မတပူတင်
#ချီးကျူး
