မဲခေါင်၊ ဇန်နဝါရီ ၃၀
ထိုင်းနိုင်ငံတွင် ဖေဖော်ဝါရီ ၈ ရက်ရွေးကောက်ပွဲ မတိုင်မီ ပြုလုပ်ခဲ့သော လူထုစစ်တမ်းနှစ်ခုတွင် တိုးတက်သော အမြင်ရှိသူ ပြည်သူ့ပါတီခေါင်းဆောင် နက်သာဖောက်ရူအန်ပန်ယာဝတ်က ဆက်လက် ဦးဆောင်နေသည်ကို တွေ့ရှိရပြီး ယင်းနှင့်အတူ အာဏာ ဆက်လက်ရယူနိုင်ရန် လက်ရှိဝန်ကြီးချုပ် အနုတင်ချန်ဗီရာကူးလ် ရင်ဆိုင်နေရသော စိန်ခေါ်မှုများကို မီးမောင်းထိုးပြနေသည်။
ထိုင်းရွေးကောက်ပွဲသည် အနုတင်၏ ကွန်ဆာဗေးတစ် ဘွန်ဂျိုင်ထိုင်းပါတီ၊ အာဏာရပါတီဟောင်း ဖွေထိုင်းနှင့် ပြုပြင်ပြောင်းလဲလမ်းစဉ်လိုက်သည့် ပြည်သူ့ပါတီ တို့ကြား သုံးပွင့်ဆိုင်ပြိုင်ပွဲ ဖြစ်လာခဲ့သည်။
Suan Dusit တက္ကသိုလ်က ယနေ့ ထုတ်ပြန်ခဲ့သော စစ်တမ်းရလဒ်တွင် နက်သာဖောင်က ထောက်ခံမှု ၃၅ ဒသမ ၁ ရာခိုင်နှုန်း၊ အနုတင်က ထောက်ခံမှု ၁၆ ဒသမ ၁ ရာခိုင်နှုန်းဖြင့် တတိယနေရာတွင် ရှိနေကာ ဝန်ကြီးချုပ်ဟောင်း သက်ဆင် တည်ထောင်ခဲ့သည့် ဖွေထိုင်းပါတီ ကိုယ်စားလှယ် ယိုရှာနန်ဝေါင်ဆာဝတ်က ထောက်ခံမှု ၂၁ ဒသမ ၅ ရာခိုင်နှုန်းဖြင့် ဒုတိယ လိုက်နေသည်။
ဇန်နဝါရီ ၁၆ ရက် နှင့် ၂၈ ရက်ကြားတွင် လူပေါင်း ၂၆၆၂၁ ဦးအား မေးမြန်း၍ စစ်တမ်းကောက်ထားကြောင်း သိရသည်။
ပြည်သူ့ပါတီ – People’s Party သည် ၂၀၂၃ ခုနှစ်ရွေးကောက်ပွဲတွင် အနိုင်ရရှိခဲ့သော်လည်း ကွန်ဆာဗေးတစ်အမတ်များက အစိုးရဖွဲ့ခွင့်ကို တားဆီးခဲ့ပြီး နောက်ပိုင်းတွင် တရားရုံးအမိန့်ဖြင့် ဖျက်သိမ်းခဲ့သော ရှေ့သို့ချီပါတီ- Move Forward ကို ဆက်ခံသော ပါတီဖြစ်သည်။
လွှတ်တော်တွင် အယုံအကြည်မရှိအဆို တင်သွင်းခံရပြီး ၎င်းတို့ လူနည်းစုအစိုးရ ပြုတ်ကျမည့်အန္တရာယ် ရှိလာခဲ့ပြီးနောက် ဝန်ကြီးချုပ်အဖြစ် တာဝန်ထမ်းဆောင်မှု ရက်ပေါင်း ၁၀၀ မပြည့်မီ အနုတင်က ဒီဇင်ဘာ ၁၂ ရက်တွင် ရွေးကောက်ပွဲ ခေါ်ယူခဲ့သည်။
ထိုကာလသည် ထိုင်း – ကမ္ဘောဒီးယား ၂၁ ရက် ကြာ ပဋိပက္ခနှင့်လည်း တိုက်ဆိုင်နေခဲ့သည်။
National Institute of Development Administration က လုပ်ဆောင်ခဲ့သည့် စစ်တမ်းတွင်လည်း နက်သာဖောင်က ထောက်ခံမှု ၂၉ ရာခိုင်နှုန်း ရရှိထားကာ အနုတင်က ၂၂ ဒသမ ၂ ရာခိုင်နှုန်းသာ ရရှိကြောင်း တွေ့ရှိထားသည်။
အေးကျော်
Ref: Reuters
#MeKongNews
#ထိုင်းရွေးကောက်ပွဲ
#လူထုစစ်တမ်း
#နက်သာဖောင်
#ဦးဆောင်
