မဲခေါင်၊ ဇန်နဝါရီ ၃၀
မူဆယ်မြို့ရှိ တရားမဝင် လုပ်ငန်းများတွင် ရဲအရာရှိများကိုယ်တိုင် ရှယ်ယာပါဝင်နေပြီး ယင်းလုပ်ငန်းများအား အကာကွယ်ပေးနေကြောင်း အတွင်း သတင်းရင်းမြစ်များထံမှ သိရသည်။
လက်ရှိ၌ ရဲလိုင်းကြေးပေးပြီး ဖေဖော်ဝါရီ ၁ ရက်တွင် တရားဝင်ဖွင့်လှစ်မည့် မူးယစ်ဆေးဝါး လက်လီ၊ လက်ကားအရောင်းဆိုင်၂၃ ဆိုင်တွင် ရဲအရာရှိ ၂၈ ယောက်က ရှယ်ယာထည့်ဝင်ထားကြောင်း သတင်းရင်းမြစ်များထံမှ သိရသည်။
ယင်းမတိုင်မီ လားရှိုး ကားကြီးဝန်းအတွင်းရှိ 1256 အနှိပ်ခန်းအမည်ခံပြီး လူကုန်ကူးခြင်းနှင့် ပြည့်တန်ဆာလုပ်ငန်းများတွင် နယ်ထိန်းခေါင်းဆောင်နှင့် ရဲအရာရှိကြီးများ ပါဝင်ပတ်သက်နေကြောင်း လူမှုကွန်ရက်တွင် သတင်းများ ထွက်ပေါ်လာပြီးနောက် ယမန်နှစ် နိုဝင်ဘာက အပြီးပိတ်သိမ်းလိုက်ရသည့် ဖြစ်စဥ်ရှိခဲ့သေးသည်။
လက်ရှိတွင် မူဆယ်ခရိုင်နှင့် မြို့နယ်ရဲတပ်ဖွဲ့မှ အရာရှိအများစုသည် ကျားဖြန့်၊ လောင်းကစား၊ အနှိပ်ခန်း၊ အပေါင်ဆိုင်နှင့် မူးယစ်ဆေးဝါးလက်ကား အရောင်းဆိုင်များတွင်လည်း အစုရှယ်ယာ ထည့်ဝင်ထားကြောင်း မဲခေါင်က စုံစမ်းသိရှိရသည်။
“ကျနော်တို့ အခက်အခဲရှိလို့ ဂိမ်းဆိုင်လေးတွေမှာ လက်ဖက်ရည်ဖိုး သွားတောင်းတာရှိပါတယ်။ ဒါလည်း တစ်ခါတလေမှပါ။ ဒါကို မတောင်းနဲ့လို့ တားရင် စခန်းမှူး၊ နယ်ထိန်းနဲ့ တခြားအရာရှိတွေ ကျားဖြန့်မှာ မူးယစ်ဆေးရောင်းတဲ့ဆီမှာ ရှယ်ယာထည့်ထားတဲ့ အကြောင်း ကျနော်တို့လည်း တိုင်မှာ”ဟု အမည်မဖော်လိုသူ ရဲတပ်ဖွဲ့ဝင်တစ်ဦးက မဲခေါင်သို့ ပြောသည်။
ထိုအတောအတွင်း လာမည့် မတ်လ အပြောင်းအရွှေ့ စာရင်းတွင်ပါသည့် စခန်းမှူး ဒုရဲမှူး နေယုဆန်း၏ တရားမဝင်လုပ်ငန်း အသီးသီးရှိ အစုရှယ်ယာ ခန့်မှန်းတန်ဖိုး ကျပ်သိန်းပေါင်း ၂ သောင်းခန့်ကို နယ်ထိန်းခေါင်းဆောင် ဒုရဲမှူးရဲနောင်က ပြန်လည်ဝယ်ယူမည်ဟု စုံစမ်းသိရှိရသည်။
“မူဆယ်မှာ ကျားဖြန့်နဲ့ မူးယစ်ဆေးဝါးကို အမြစ်ပြတ်အောင် မလုပ်တာက ဒီလုပ်ငန်းတွေမှာ ရဲကပါဝင်ပတ်သက်နေလိုပဲ။ ၂၀၂၅၊ အောက်တိုဘာလထိ မူးယစ်ဆေးဝါးကို ရဲက ကိုယ်တိုင် ရောင်းတယ်။ အခုတော့ ရောင်းနေတဲ့ လက်ကားသမားတွေဆီမှာ ရှယ်ထည့်ပြီး လုပ်လာကြတယ်။ သူတို့က ကျားဖြန့်တွေမှာလည်း ရှယ်ယာ ထည့်ထားကြတယ်။ တရုတ်ဖက်က ဝင်ဖမ်းလို့မိတာပဲ ရှိတယ်။ ဗမာဘက်က ဖမ်းမှ မဖမ်းတာ”ဟု ရဲတပ်ဖွဲ့နှင့် နီးစပ်သူ ပြည်သူ့စစ်တစ်ဦးက မဲခေါင်သို့ ဖွင့်ဟ ပြောကြားသည်။
မူဆယ်မြို့တွင် ကျားဖြန့်၊ အနှိပ်ခန်း၊ ပြည့်တန်ဆာရုံ၊ လောင်းကစားဝိုင်းနှင့် အပေါင်ဆိုင် စသည့် တရားမဝင် လုပ်ငန်းများမှာ လိုင်စင်ရသည့်အလား ပြောင်ပြောင်တင်းတင်း လုပ်ဆောင်နေပြီး စစ်ကောင်စီ လက်အောက်ခံ နယ်မြေခံ အာဏာပိုင်များအတွက် ငွေတွင်းသဖွယ်လည်း ဖြစ်နေသည်။
#MeKongNews
#မူဆယ်
#ကျားဖြန့်
#မူးယစ်ဆေး
#တရားမဝင်
#ရဲအရာရှိ
#ရှယ်ယာထည့်
