မဲခေါင်၊ ဇန်နဝါရီ ၂၁
နယ်စပ်ခရိုင် မဲဆောက်တွင် တရားမဝင်လက်နက် အရောင်းအဝယ်အား ဖမ်းဆီးမည့် အသွင်ယူ စစ်ဆင်ရေးတစ်ခုတွင် မြန်မာနိုင်ငံသားတစ်ဦးက ပစ်ခတ်မှုကြောင့် ထိုင်းရဲတပ်ဖွဲ့ဝင်တစ်ဦး အပြင်းအထန် ဒဏ်ရာရခဲ့ပြီးနောက် ထိုင်းရဲတပ်ဖွဲက အင်အား ၁၀၀ ကျော်ြဖင့် ၎င်းတရားခံကို ပိုက်စိပ်တိုက် ရှာဖွေနေကြောင်း ထိုင်းသတင်းများအရ သိရသည်။
တာ့ခ်ပြည်နယ်၊ မဲကူခရိုင်ခွဲ ၊ မဲဆောက် – အမ်ဖမ်းအဝေးပြေးလမ်းမပေါ်မှ ဖာလက်ကျေးရွာမှ ဈေးဆိုင်တစ်ခုအနီး လမ်းဘေးတွင် မဲဆောက်ရဲတပ်ဖွဲ့၏ အသွင်ယူ စစ်ဆင်ရေးတစ်ခု၌ ယင်းပစ်ခတ်မှု ဖြစ်ပွားခဲ့ခြင်း ဖြစ်သည်။
နယ်စပ်ဖြတ်ကျော် လက်နက်ရောင်းဝယ်ရေး ကွန်ရက်မှဟု သံသယရှိသူ ၂ ဦးထံမှ လက်နက်ဝယ်ယူရန် ရဲအရာရှိများက စီစဉ်ခဲ့သည်။
ထို့နောက် ဖမ်းဆီးမှုများလုပ်ရန် ရဲတပ်ဖွဲ့က လှုပ်ရှားစဉ် သံသယရှိသူတစ်ဦးက အဖမ်းမခံဘဲ ပြန်လည်ခုခံခဲ့ရာ မဲဆောက်ရဲစခန်းမှ အသက် ၅၁ နှစ်အရွယ် ရဲတပ်ကြပ်ကြီးတစ်ဦး၏ ဝမ်းဗိုက်ကို ကျည်ထိမှန်ခဲ့ပြီး ဒဏ်ရာပြင်းထန်သဖြင့် ၎င်းအား မဲဆောက်ဆေးရုံသို့ ပို့ဆောင်ကာ အရေးပေါ် ခွဲစိတ်ကုသခဲ့ရသည်။
ထိုင်းရဲတပ်ကြပ်ကြီးသည် အသက်အန္တရာယ် မစိုးရိမ်ရတော့သော်လည်း ၂၄ နာရီ စောင့်ကြည့်မှု ခံယူနေရကြောင်း သိရသည်။
ပစ်ခတ်မှုတွင် အတူပါဝင်သူ မြန်မာနိုင်ငံသား စိုးမင်းသူ ၂၀ နှစ်ကို ရဲတပ်ဖွဲ့က ဖမ်းဆီးကာ စစ်ဆေးမေးမြန်းနေကြောင်း သိရပြီး အသေးစိတ်ကို ရဲတပ်ဖွဲ့က မပြောပေ။
မြန်မာနိုင်ငံသား တစ်ဦးပင်ဖြစ်ပြီး နိုင်လင်းအောင် ၂၀ နှစ်ဟု ဖော်ထုတ်ထားသော ဒုတိယသံသယရှိသူသည် ပစ်ခတ်ပြီးနောက် သေနတ်တစ်လက်နှင့် အတိအကျမသိရသော ခဲယမ်းများဖြင့် ထွက်ပြေး လွတ်မြောက်သွားခဲ့ပြီး သစ်တောထူထပ်သော ထိုင်း – မြန်မာ နယ်စပ်ဧရိယာသို့ ထွက်ပြေးသွားသည်ဟု ရဲတပ်ဖွဲ့က ယူဆထားသည်။
နယ်စပ် ကင်းလှည့်ရဲတပ်ဖွဲ့ အပါအဝင် အခြား တာဝန်ရှိသော အဖွဲ့အစည်းများနှင့် ပူးပေါင်း၍ မဲဆောက်ရဲတပ်ဖွဲ့က ညလုံးပေါက် ရှာဖွေနေခဲ့သော်လည်း ယမန်နေ့ နံနက်ပိုင်းအထိ ပစ်ခတ်သူကို ရှာမတွေ့သေးပေ။
နောက်ပိုင်းတွင် ၎င်းတို့၏ ပိုက်စိတ်တိုက်ရှာဖွေမှု ဗျူဟာကို အာဏာပိုင်များက ပြောင်းလဲလိုက်ကာ သံသယရှိ၏ဓာတ်ပုံကို ဒေသတွင်း လူမှုမီဒီယာ၌ ဖြန့်ဝေခဲ့ပြီး ၎င်းအားတွေ့ရှိပါက ရပ်ကွက် အကြီးအကဲများထံ ချက်ချင်း အကြောင်းကြားရန် ဒေသခံများအား တိုက်တွန်းခဲ့သည်။
၎င်း၏ အသေးစိတ် အချက်အလက်များကိုလည်း ထိုင်းထောက်လှမ်းရေးအဖွဲ့များက မြန်မာ ထောက်လှမ်းရေးအဖွဲ့အား ပေးအပ်၍ ကူညီတားဆီးပေးရန် တောင်းဆိုထားသည်။
ထို့ပြင် နယ်စပ်အနီး လမ်းမကြီးများနှင့် အခြားလမ်းများတွင်လည်း လုံခြုံရေး တင်းကျပ်ထားကာ စစ်ဆေးရေးဂိတ်များ ဖွင့်ထားပြီး ပစ်မှတ်ဧရိယာများ၌ လက်နက်ကိုင်တပ်ဖွဲ့များကိုလည်း ချထားသည်။
အချို့နေရာများတွင် ရေခန်းခြောက်နေသည့် သောင်ရင်းမြစ်ကို ဖြတ်၍ သံသယရှိသူ ထွက်ပြေးသွားနိုင်သည် ဆိုသော စိုးရိမ်မှုများရှိနေစဉ် ပစ်ခတ်ထွက်ပြေးရန် ကြိုးစားခဲ့ပါက ပြတ်သားစွာ တုံ့ပြန်သွားမည်ဟု ထိုင်းအရာရှိများက သတိပေးထားသည်။
ထိုအတောအတွင်းမှာပင် မြန်မာများနှင့် ပတ်သက်သော လတ်တလော ဖြစ်စဉ်များကြောင့် ထိုင်းအာဏာပိုင်များ စစ်ဆေးဖမ်းဆီးမှုများ တိုးမြှင့်နေ၍ ထိုင်းရောက် မြန်မာနိုင်ငံသားများ သတိပြု နေထိုင်သွားလာရန် အချင်းချင်း တိုက်တွန်းမှုများလည်း ရှိနေသည်။
အေးကျော်
Ref:Khaosod English
#MeKongNews
#ထိုင်းရဲ
#ပစ်ခတ်
#မြန်မာ
#ပိုက်စိတ်တိုက်
#ရှာဖွေ
