မဲခေါင်၊ ဇန်နဝါရီ ၂၀
ထိုင်းနိုင်ငံ၊ အန်ထောင်ပြည်နယ်တွင် တရားမဝင် ခိုးဝင်မှုဖြင့် ဖမ်းဆီးခံလိုက်ရသည့် မြန်မာရွှေ့ပြောင်း လုပ်သားများက ရဲတစ်ဦး၏ မွေးနေ့အား ဆုတောင်းသီချင်း ပါဝင်သီဆိုပေးခဲ့ကြောင်း ထိုင်းသတင်းများအရ သိရသည်။
ယင်းမြန်မာလုပ်သားများအား အမှုစစ်နေစဉ်အတွင်း အဝေးပြေးလမ်း ရဲတပ်ဖွဲ့မှ တပ်စုခေါင်းဆောင် တပ်ကြပ်ကြီး ဝီချိုင်းတမ်စမိုင်၏ မွေးနေ့ဖြစ်ကြောင်း ရဲများကသိရှိခဲ့ရာ ၎င်းအတွက် မွေးနေ့ကိတ်ဖြင့် အံ့ဩပျော်ရွှင်အောင် ပြုလုပ်ပေးခဲ့ကြပြီး၊ အဖမ်းခံထားရသူများကလည်း လက်ခုပ်တီးကာ မွေးနေ့သီချင်း အတူတူ သီဆိုပေးခဲ့ကြသည်ဟု ထိုင်းရဲတပ်ဖွဲ့က ပြောသည်။
ထိုင်းအာဏာပိုင်များ၏ ထုတ်ပြန်ချက်အရ ယမန်နေ့ည ညနှောင်းပိုင်းတွင် အန်ထောင်ပြည်နယ်၊ အာရှလမ်းမကြီးပေါ်၌ ပစ်ကပ်ကားနှစ်စီးကို တားဆီးစစ်ဆေးခဲ့ရာမှ တရားမဝင် မြန်မာ ရွှေ့ပြောင်းလုပ်သား ၂၂ ဦးနှင့် လူမှောင်ခိုဟု သံသယရှိသူ ၃ ဦးကို အဝေးပြေးလမ်းရဲတပ်ဖွဲ့နှင့် လူဝင်မှုကြီးကြပ်ရေးအရာရှိများက ဖမ်းမိခဲ့ကြောင်း သိရသည်။
ယမန်နေ့ည ၁၁ နာရီခွဲခန့်၌ နောက်ခန်းကို မိုးကာဖြင့်အုပ်ထားပြီး မှန်အနက်များဖြင့် ပစ်ကပ် ၂ စီး အရှိန်ပြင်းစွာ မောင်းနေကာ ရုတ်တရက် လမ်းလွှဲသွားသည်ကို တွေ့ရှိရာမှ ရဲတပ်ဖွဲ့က သံသယဖြစ်ကာ တားဆီးခဲ့ခြင်းဖြစ်သည်။
ထို့နောက် ရဲတပ်ဖွဲ့က ကားများကို ရပ်တန့်စစ်ဆေးရာ ယာဉ်မောင်းခန်းနှင့် အနောက်ကုန်တင်ခန်းများအတွင်း ပုန်းအောင်း လိုက်ပါလာသည့် မြန်မာ ရွှေ့ပြောင်းလုပ်သား စုစုပေါင်း ၂၂ ဦးကို တွေ့ရှိခဲ့ရသည်။
၎င်းတို့အားလုံးတွင် နိုင်ငံကူးလက်မှတ် သို့မဟုတ် တရားဝင် ခရီးသွားလာခွင့် စာရွက်စတမ်းများ တစ်စုံတစ်ရာ မရှိကြကြောင်း အရာရှိများက ပြောကြားခဲ့သည်။
၎င်းတို့သည် ချင်းရိုင်ခရိုင်၊ မယ်ဆိုင်မြို့ မှတစ်ဆင့် မြန်မာနိုင်ငံမှ ထိုင်းနိုင်ငံအတွင်းသို့ လှေဖြင့် ဝင်ရောက်လာခဲ့ကြခြင်း ဖြစ်ပြီး အလုပ်ရရှိရန် ပွဲစားများကို တစ်ဦးလျှင် ဘတ် ၁၃၀၀၀ ခန့် ပေးခဲ့ရကြောင်း ယင်းရွှေ့ပြောင်းလုပ်သားများက စကားပြန်မှတစ်ဆင့် ရဲတပ်ဖွဲ့ကို ပြောခဲ့ကြသည်။
ထို့နောက် လူမှောင်ခို သံသယရှိသူ ၃ ဦးကို တရားမဝင် ရွှေ့ပြောင်းလုပ်သားများအား ခိုလှုံခွင့်ပေးမှု၊ ကူညီမှုတို့ဖြင့် တရားစွဲဆိုထားပြီး၊ ရွှေ့ပြောင်းလုပ်သားများကိုမူ နိုင်ငံအတွင်း တရားမဝင် ဝင်ရောက်မှုဖြင့် ထိုင်းရဲတပ်ဖွဲ့က အမှုဖွင့်ထားသည်။
#MeKongNews
#ခိုးဝင်
#မြန်မာရွှေ့ပြောင်း
#ထိုင်းရဲ
#ဆုတောင်းသီချင်း
