မဲခေါင်၊ ဇန်နဝါရီ ၁၅
ထိုင်းနိုင်ငံ၊ ဘန်ကောက်မြို့ ဆင်ခြေဖုံးရှိ အဝေးပြေးလမ်းမ ဆောက်လုပ်ရေး လုပ်ငန်းခွင်တစ်ခုတွင် ယနေ့ ဇန်နဝါရီ ၁၅ ရက်က ကရိန်းပြိုကျမှုကြောင့် လူ ၂ ဦး သေဆုံးကြောင်း ဒေသခံ ရဲအရာရှိတစ်ဦးက AFP သို့ ပြောသည်။
ယင်းဖြစ်စဉ်သည် ထိုင်းနိုင်ငံတွင် ရထားတစ်စီးပေါ်သို့ ကရိန်းပြိုကျကာ လူ ၃၂ ဦး သေဆုံးခဲ့ရသည့် ဖြစ်စဉ်အပြီး တစ်ရက်အကြာတွင်ပင် ထပ်မံဖြစ်ပွားခြင်း ဖြစ်သည်။
ဘန်ကောက်မြို့အပြင်ဘက်၊ စမွတ်စခွန်ပြည်နယ်ရှိ တည်ဆောက်ဆဲ ရာမ ၂ အမြန်လမ်းမကြီးတွင် ယနေ့ နံနက်ပိုင်းက ကရိန်းပြိုကျခဲ့ခြင်း ဖြစ်ကြောင်း ရဲမှူးကြီး ဆစ်သီပွန်းကာဆီက ပြောသည်။
ယင်းခုံးကျော် အဝေးပြေးလမ်းမကြီး တည်ဆောက်ရေးတွင် အသုံးပြုနေသည့် ကရိန်းမှာ အောက်ရှိ လမ်းမပေါ်သို့ ပြိုကျခဲ့ခြင်းဖြစ်ကြောင်း ကာဆီက ဆိုသည်။
အခြား ရဲအရာရှိတစ်ဦးကမူ ထိုမတော်တဆမှုအတွင်း လူ ၅ ဦးလည်း ဒဏ်ရာရရှိခဲ့ကြောင်း ရိုက်တာသတင်းဌာနသို့ ပြောသည်။
ယင်းဖြစ်စဉ်သည် Paris Inn Garden ဟိုတယ်ရှေ့တွင် ဖြစ်ပွားခဲ့ခြင်း ဖြစ်ကြောင်း ဒေသတွင်း သတင်းဌာနများက ဖော်ပြကြပြီး၊ ရုပ်သံမှတ်တမ်းများအရ ဧရာမ ကရိန်းကြီးတစ်ခုသည် ဆောက်လုပ်ဆဲ ကွန်ကရစ်တံတားပေါ်သို့ ပြိုကျသွားပြီးနောက် လုပ်ငန်းခွင် တစ်ခုလုံး ဖုန်မှုန့်များနှင့် အပျက်အစီးများ ပြန့်ကြဲသွားသည်ကို တွေ့ရသည်။
ယင်းဖြစ်စဉ်အတွင်း လမ်းမကြီးပေါ်မောင်းနှင်နေသည့် ကား ၂ စီးအပေါ် ပြိုကျခဲ့ရာ လူသေဆုံးမှုများ ဖြစ်ပေါ်ခဲ့ခြင်းဖြစ်သည်။
ရာမ ၂ အမြန်လမ်းမကြီးပေါ်တွင် လမ်းကြေး ကောက်ခံမည့် လမ်းမကြီး တည်ဆောက်ရေး အပါအဝင် အဓိက အခြေခံ အဆောက်အအုံ စီမံကိန်း အများအပြားကို လုပ်ဆောင်နေခြင်းဖြစ်သည်။
ယင်းလမ်းမကြီးပေါ်တွင် မကြာသေးမီ နှစ်များအတွင်း လူသေဆုံးသည့် မတော်တဆမှု များစွာ ဖြစ်ပွားခဲ့သဖြင့် မရဏလမ်း ဟူသောအမည်ဖြင့် ကျော်ကြားလျက်ရှိသည်။
ယနေ့ ဖြစ်ရပ်သည် ဘန်ကောက်မြို့တော်၏ အရှေ့မြောက်ဘက်ရှိ နခွန်ရက်ချာစီမာပြည်နယ်တွင် ယမန်နေ့က ဖြစ်ပွားခဲ့သည့် အလားတူ ကရိန်းပြိုကျမှု တစ်ခုအပြီး ထပ်မံ ပေါ်ပေါက်လာခြင်း ဖြစ်သည်။
တရုတ်နောက်ခံ အမြန်ရထားစီမံကိန်း တည်ဆောက်ရေးတွင် အသုံးပြုနေသော ဧရာမ ကရိန်းကြီး ယမန်နေ့ နံနက်ပိုင်းက အောက်ရှိလမ်းပေါ် ပြိုကျခဲ့ပြီး ခရီးသည်တင် ရထားက ဝင်တိုက်မိရာမှ လူ ၃၂ ဦး သေဆုံးခဲ့သေးသည်။
ယင်းရထားပေါ်တွင် လိုက်ပါလာသည့် ခရီးသည် ၁၉၅ ဦးအနက် ၆၆ ဦးလည်း ဒဏ်ရာရရှိခဲ့ကြောင်း အာဏာပိုင်များက ပြောသည်။
လက်ရှိတွင် လတ်တလော ဖြစ်ရပ်များအား စုံစမ်းစစ်ဆေးမှုများ ဆက်လက် လုပ်ဆောင်နေဆဲ ဖြစ်သည်။
#MeKongNews
#ဆောက်လုပ်ရေး
#ကရိန်း
#ပြိုကျ
#သေဆုံး
#ထိုင်း
